From StotraSamhita
< Bhagavatam | Skandha 01
caturthO'dhyAyaH
vyAsa uvAca
iti bruvANaM saMstUya munInAM dIrghasatriNAm| vRddhaH kulapatiH sUtaM bahvRcaH zaunakO'bravIt||1|| |
zaunaka uvAca
sUta sUta mahAbhAga vada nO vadatAM vara| kathAM bhAgavatIM puNyAM yadAha bhagavAJchukaH||2|| |
kasminyugE pravRttEyaM sthAnE vA kEna hEtunA| kutaH saJcOditaH kRSNaH kRtavAnsaMhitAM muniH||3|| |
tasya putrO mahAyOgI samadRGnirvikalpakaH| EkAntamatirunnidrO gUDhO mUDha ivEyatE||4|| |
dRSTvAnuyAntamRSimAtmajamapyanagnaM dEvyO hriyA paridadhurna sutasya citram| tadvIkSya pRcchati munau jagadustavAsti strIpumbhidA na tu sutasya viviktadRSTEH||5|| |
kathamAlakSitaH pauraiH samprAptaH kurujAGgalAn| unmattamUkajaDavadvicarangajasAhvayE||6|| |
kathaM vA pANDavEyasya rAjarSErmuninA saha| saMvAdaH samabhUttAta yatraiSA sAtvatI zrutiH||7|| |
sa gOdOhanamAtraM hi gRhESu gRhamEdhinAm| avEkSatE mahAbhAgastIrthIkurvaMstadAzramam||8|| |
abhimanyusutaM sUta prAhurbhAgavatOttamam| tasya janma mahAzcaryaM karmANi ca gRNIhi naH||9|| |
sa samrATkasya vA hEtOH pANDUnAM mAnavardhanaH| prAyOpaviSTO gaGgAyAmanAdRtyAdhirATzriyam||10|| |
namanti yatpAdanikEtamAtmanaH zivAya hAnIya dhanAni zatravaH| kathaM sa vIraH zriyamaGga dustyajAM yuvaiSatOtsraSTumahO sahAsubhiH||11|| |
zivAya lOkasya bhavAya bhUtayE ya uttamazlOkaparAyaNA janAH| jIvanti nAtmArthamasau parAzrayaM mumOca nirvidya kutaH kalEvaram||12|| |
tatsarvaM naH samAcakSva pRSTO yadiha kiJcana| manyE tvAM viSayE vAcAM snAtamanyatra chAndasAt||13|| |
sUta uvAca
dvAparE samanuprAptE tRtIyE yugaparyayE| jAtaH parAzarAdyOgI vAsavyAM kalayA harEH||14|| |
sa kadAcitsarasvatyA upaspRzya jalaM zuciH| vivikta Eka AsIna uditE ravimaNDalE||15|| |
parAvarajJaH sa RSiH kAlEnAvyaktaraMhasA| yugadharmavyatikaraM prAptaM bhuvi yugE yugE||16|| |
bhautikAnAM ca bhAvAnAM zaktihrAsaM ca tatkRtam| azraddadhAnAnniHsattvAndurmEdhAnhrasitAyuSaH||17|| |
durbhagAMzca janAnvIkSya munirdivyEna cakSuSA| sarvavarNAzramANAM yaddadhyau hitamamOghadRk||18|| |
cAturhOtraM karma zuddhaM prajAnAM vIkSya vaidikam| vyadadhAdyajJasantatyai vEdamEkaM caturvidham||19|| |
RgyajuHsAmAtharvAkhyA vEdAzcatvAra uddhRtAH| itihAsapurANaM ca paJcamO vEda ucyatE||20|| |
tatrargvEdadharaH pailaH sAmagO jaiminiH kaviH| vaizampAyana EvaikO niSNAtO yajuSAmuta||21|| |
atharvAGgirasAmAsItsumanturdAruNO muniH| itihAsapurANAnAM pitA mE rOmaharSaNaH||22|| |
ta Eta RSayO vEdaM svaM svaM vyasyannanEkadhA| ziSyaiH praziSyaistacchiSyairvEdAstE zAkhinO'bhavan||23|| |
ta Eva vEdA durmEdhairdhAryantE puruSairyathA| EvaM cakAra bhagavAnvyAsaH kRpaNavatsalaH||24|| |
strIzUdradvijabandhUnAM trayI na zrutigOcarA karmazrEyasi mUDhAnAM zrEya EvaM bhavEdiha iti bhAratamAkhyAnaM kRpayA muninA kRtam||25|| |
EvaM pravRttasya sadA bhUtAnAM zrEyasi dvijAH| sarvAtmakEnApi yadA nAtuSyaddhRdayaM tataH||26|| |
nAtiprasIdaddhRdayaH sarasvatyAstaTE zucau| vitarkayanviviktastha idaM cOvAca dharmavit||27|| |
dhRtavratEna hi mayA chandAMsi guravO'gnayaH| mAnitA nirvyalIkEna gRhItaM cAnuzAsanam||28|| |
bhAratavyapadEzEna hyAmnAyArthazca pradarzitaH| dRzyatE yatra dharmAdi strIzUdrAdibhirapyuta||29|| |
tathApi bata mE daihyO hyAtmA caivAtmanA vibhuH| asampanna ivAbhAti brahmavarcasya sattamaH||30|| |
kiM vA bhAgavatA dharmA na prAyENa nirUpitAH| priyAH paramahaMsAnAM ta Eva hyacyutapriyAH||31|| |
tasyaivaM khilamAtmAnaM manyamAnasya khidyataH| kRSNasya nAradO'bhyAgAdAzramaM prAgudAhRtam||32|| |
tamabhijJAya sahasA pratyutthAyAgataM muniH pUjayAmAsa vidhivannAradaM surapUjitam||33|| |
||iti zrImadbhAgavatE mahApurANE pAramahaMsyAM saMhitAyAM prathamaskandhE caturthO'dhyAyaH||
