From StotraSamhita
< Bhagavatam | Skandha 03
aSTAviMzO'dhyAyaH
zrIbhagavAnuvAca
yOgasya lakSaNaM vakSyE sabIjasya nRpAtmajE| manO yEnaiva vidhinA prasannaM yAti satpatham||1|| |
svadharmAcaraNaM zaktyA vidharmAcca nivartanam| daivAllabdhEna santOSa AtmaviccaraNArcanam||2|| |
grAmyadharmanivRttizca mOkSadharmaratistathA| mitamEdhyAdanaM zazvadviviktakSEmasEvanam||3|| |
ahiMsA satyamastEyaM yAvadarthaparigrahaH| brahmacaryaM tapaH zaucaM svAdhyAyaH puruSArcanam||4|| |
maunaM sadAsanajayaH sthairyaM prANajayaH zanaiH| pratyAhArazcEndriyANAM viSayAnmanasA hRdi||5|| |
svadhiSNyAnAmEkadEzE manasA prANadhAraNam| vaikuNThalIlAbhidhyAnaM samAdhAnaM tathAtmanaH||6|| |
Etairanyaizca pathibhirmanO duSTamasatpatham| buddhyA yuJjIta zanakairjitaprANO hyatandritaH||7|| |
zucau dEzE pratiSThApya vijitAsana Asanam| tasminsvasti samAsIna RjukAyaH samabhyasEt||8|| |
prANasya zOdhayEnmArgaM pUrakumbhakarEcakaiH| pratikUlEna vA cittaM yathA sthiramacaJcalam||9|| |
manO'cirAtsyAdvirajaM jitazvAsasya yOginaH| vAyvagnibhyAM yathA lOhaM dhmAtaM tyajati vai malam||10|| |
prANAyAmairdahEddOSAndhAraNAbhizca kilbiSAn| pratyAhArENa saMsargAndhyAnEnAnIzvarAnguNAn||11|| |
yadA manaH svaM virajaM yOgEna susamAhitam| kASThAM bhagavatO dhyAyEtsvanAsAgrAvalOkanaH||12|| |
prasannavadanAmbhOjaM padmagarbhAruNEkSaNam| nIlOtpaladalazyAmaM zaGkhacakragadAdharam||13|| |
lasatpaGkajakiJjalka pItakauzEyavAsasam| zrIvatsavakSasaM bhrAjatkaustubhAmuktakandharam||14|| |
mattadvirEphakalayA parItaM vanamAlayA| parArdhyahAravalaya kirITAGgadanUpuram||15|| |
kAJcIguNOllasacchrONiM hRdayAmbhOjaviSTaram| darzanIyatamaM zAntaM manOnayanavardhanam||16|| |
apIcyadarzanaM zazvatsarvalOkanamaskRtam| santaM vayasi kaizOrE bhRtyAnugrahakAtaram||17|| |
kIrtanyatIrthayazasaM puNyazlOkayazaskaram| dhyAyEddEvaM samagrAGgaM yAvanna cyavatE manaH||18|| |
sthitaM vrajantamAsInaM zayAnaM vA guhAzayam| prEkSaNIyEhitaM dhyAyEcchuddhabhAvEna cEtasA||19|| |
tasminlabdhapadaM cittaM sarvAvayavasaMsthitam| vilakSyaikatra saMyujyAdaGgE bhagavatO muniH||20|| |
saJcintayEdbhagavatazcaraNAravindaM vajrAGkuzadhvajasarOruhalAJchanADhyam| uttuGgaraktavilasannakhacakravAla jyOtsnAbhirAhatamahaddhRdayAndhakAram||21|| |
yacchaucaniHsRtasaritpravarOdakEna tIrthEna mUrdhnyadhikRtEna zivaH zivO'bhUt| dhyAturmanaHzamalazailanisRSTavajraM dhyAyEcciraM bhagavatazcaraNAravindam||22|| |
jAnudvayaM jalajalOcanayA jananyA lakSmyAkhilasya suravanditayA vidhAtuH| UrvOrnidhAya karapallavarOciSA yat saMlAlitaM hRdi vibhOrabhavasya kuryAt||23|| |
UrU suparNabhujayOradhi zObhamAnAv OjOnidhI atasikAkusumAvabhAsau| vyAlambipItavaravAsasi vartamAna kAJcIkalApaparirambhi nitambabimbam||24|| |
nAbhihradaM bhuvanakOzaguhOdarasthaM yatrAtmayOnidhiSaNAkhilalOkapadmam| vyUDhaM harinmaNivRSastanayOramuSya dhyAyEddvayaM vizadahAramayUkhagauram||25|| |
vakSO'dhivAsamRSabhasya mahAvibhUtEH puMsAM manOnayananirvRtimAdadhAnam| kaNThaM ca kaustubhamaNEradhibhUSaNArthaM kuryAnmanasyakhilalOkanamaskRtasya||26|| |
bAhUMzca mandaragirEH parivartanEna nirNiktabAhuvalayAnadhilOkapAlAn| saJcintayEddazazatAramasahyatEjaH zaGkhaM ca tatkarasarOruharAjahaMsam||27|| |
kaumOdakIM bhagavatO dayitAM smarEta digdhAmarAtibhaTazONitakardamEna| mAlAM madhuvratavarUthagirOpaghuSTAM caityasya tattvamamalaM maNimasya kaNThE||28|| |
bhRtyAnukampitadhiyEha gRhItamUrtEH saJcintayEdbhagavatO vadanAravindam| yadvisphuranmakarakuNDalavalgitEna vidyOtitAmalakapOlamudAranAsam||29|| |
yacchrInikEtamalibhiH parisEvyamAnaM bhUtyA svayA kuTilakuntalavRndajuSTam| mInadvayAzrayamadhikSipadabjanEtraM dhyAyEnmanOmayamatandrita ullasadbhru||30|| |
tasyAvalOkamadhikaM kRpayAtighOra tApatrayOpazamanAya nisRSTamakSNOH| snigdhasmitAnuguNitaM vipulaprasAdaM dhyAyEcciraM vipulabhAvanayA guhAyAm||31|| |
hAsaM harEravanatAkhilalOkatIvra zOkAzrusAgaravizOSaNamatyudAram| sammOhanAya racitaM nijamAyayAsya bhrUmaNDalaM munikRtE makaradhvajasya||32|| |
dhyAnAyanaM prahasitaM bahulAdharOSTha bhAsAruNAyitatanudvijakundapaGkti| dhyAyEtsvadEhakuharE'vasitasya viSNOr bhaktyArdrayArpitamanA na pRthagdidRkSEt||33|| |
EvaM harau bhagavati pratilabdhabhAvO bhaktyA dravaddhRdaya utpulakaH pramOdAt| autkaNThyabASpakalayA muhurardyamAnas taccApi cittabaDizaM zanakairviyuGktE||34|| |
muktAzrayaM yarhi nirviSayaM viraktaM nirvANamRcchati manaH sahasA yathArciH| AtmAnamatra puruSO'vyavadhAnamEkam anvIkSatE pratinivRttaguNapravAhaH||35|| |
sO'pyEtayA caramayA manasO nivRttyA tasminmahimnyavasitaH sukhaduHkhabAhyE| hEtutvamapyasati kartari duHkhayOryat svAtmanvidhatta upalabdhaparAtmakASThaH||36|| |
dEhaM ca taM na caramaH sthitamutthitaM vA siddhO vipazyati yatO'dhyagamatsvarUpam| daivAdupEtamatha daivavazAdapEtaM vAsO yathA parikRtaM madirAmadAndhaH||37|| |
dEhO'pi daivavazagaH khalu karma yAvat svArambhakaM pratisamIkSata Eva sAsuH| taM saprapaJcamadhirUDhasamAdhiyOgaH svApnaM punarna bhajatE pratibuddhavastuH||38|| |
yathA putrAcca vittAcca pRthaGmartyaH pratIyatE| apyAtmatvEnAbhimatAddEhAdEH puruSastathA||39|| |
yathOlmukAdvisphuliGgAddhUmAdvApi svasambhavAt| apyAtmatvEnAbhimatAdyathAgniH pRthagulmukAt||40|| |
bhUtEndriyAntaHkaraNAtpradhAnAjjIvasaMjJitAt| AtmA tathA pRthagdraSTA bhagavAnbrahmasaMjJitaH||41|| |
sarvabhUtESu cAtmAnaM sarvabhUtAni cAtmani| IkSEtAnanyabhAvEna bhUtESviva tadAtmatAm||42|| |
svayOniSu yathA jyOtirEkaM nAnA pratIyatE| yOnInAM guNavaiSamyAttathAtmA prakRtau sthitaH||43|| |
tasmAdimAM svAM prakRtiM daivIM sadasadAtmikAm durvibhAvyAM parAbhAvya svarUpENAvatiSThatE||44|| |
||iti zrImadbhAgavatE mahApurANE pAramahaMsyAM saMhitAyAM tRtIyaskandhE aSTAviMzO'dhyAyaH||
