From StotraSamhita

caturdazO'dhyAyaH

zrIzuka uvAca

athAtaH zrUyatAM rAjanvaMzaH sOmasya pAvanaH| yasminnailAdayO bhUpAH kIrtyantE puNyakIrtayaH||1||

sahasrazirasaH puMsO nAbhihradasarOruhAt| jAtasyAsItsutO dhAturatriH pitRsamO guNaiH||2||

tasya dRgbhyO'bhavatputraH sOmO'mRtamayaH kila| viprauSadhyuDugaNAnAM brahmaNA kalpitaH patiH||3||

sO'yajadrAjasUyEna vijitya bhuvanatrayam| patnIM bRhaspatErdarpAttArAM nAmAharadbalAt||4||

yadA sa dEvaguruNA yAcitO'bhIkSNazO madAt| nAtyajattatkRtE jajJE suradAnavavigrahaH||5||

zukrO bRhaspatErdvESAdagrahItsAsurODupam| harO gurusutaM snEhAtsarvabhUtagaNAvRtaH||6||

sarvadEvagaNOpEtO mahEndrO gurumanvayAt| surAsuravinAzO'bhUtsamarastArakAmayaH||7||

nivEditO'thAGgirasA sOmaM nirbhartsya vizvakRt| tArAM svabhartrE prAyacchadantarvatnImavaitpatiH||8||

tyaja tyajAzu duSprajJE matkSEtrAdAhitaM paraiH| nAhaM tvAM bhasmasAtkuryAM striyaM sAntAnikE'sati||9||

tatyAja vrIDitA tArA kumAraM kanakaprabham| spRhAmAGgirasazcakrE kumArE sOma Eva ca||10||

mamAyaM na tavEtyuccaistasminvivadamAnayOH| papracchurRSayO dEvA naivOcE vrIDitA tu sA||11||

kumArO mAtaraM prAha kupitO'lIkalajjayA| kiM na vacasyasadvRttE AtmAvadyaM vadAzu mE||12||

brahmA tAM raha AhUya samaprAkSIcca sAntvayan| sOmasyEtyAha zanakaiH sOmastaM tAvadagrahIt||13||

tasyAtmayOnirakRta budha ityabhidhAM nRpa| buddhyA gambhIrayA yEna putrENApODurANmudam||14||

tataH purUravA jajJE ilAyAM ya udAhRtaH| tasya rUpaguNaudArya zIladraviNavikramAn||15||

zrutvOrvazIndrabhavanE gIyamAnAnsurarSiNA| tadantikamupEyAya dEvI smarazarArditA||16||

mitrAvaruNayOH zApAdApannA naralOkatAm nizamya puruSazrESThaM kandarpamiva rUpiNam dhRtiM viSTabhya lalanA upatasthE tadantikE||17||

sa tAM vilOkya nRpatirharSENOtphullalOcanaH| uvAca zlakSNayA vAcA dEvIM hRSTatanUruhaH||18||

zrIrAjOvAca

svAgataM tE varArOhE AsyatAM karavAma kim| saMramasva mayA sAkaM ratirnau zAzvatIH samAH||19||

urvazyuvAca

kasyAstvayi na sajjEta manO dRSTizca sundara| yadaGgAntaramAsAdya cyavatE ha riraMsayA||20||

EtAvuraNakau rAjannyAsau rakSasva mAnada| saMraMsyE bhavatA sAkaM zlAghyaH strINAM varaH smRtaH||21||

ghRtaM mE vIra bhakSyaM syAnnEkSE tvAnyatra maithunAt| vivAsasaM tattathEti pratipEdE mahAmanAH||22||

ahO rUpamahO bhAvO naralOkavimOhanam| kO na sEvEta manujO dEvIM tvAM svayamAgatAm||23||

tayA sa puruSazrESThO ramayantyA yathArhataH| rEmE suravihArESu kAmaM caitrarathAdiSu||24||

ramamANastayA dEvyA padmakiJjalkagandhayA| tanmukhAmOdamuSitO mumudE'hargaNAnbahUn||25||

apazyannurvazImindrO gandharvAnsamacOdayat| urvazIrahitaM mahyamAsthAnaM nAtizObhatE||26||

tE upEtya mahArAtrE tamasi pratyupasthitE| urvazyA uraNau jahrurnyastau rAjani jAyayA||27||

nizamyAkranditaM dEvI putrayOrnIyamAnayOH| hatAsmyahaM kunAthEna napuMsA vIramAninA||28||

yadvizrambhAdahaM naSTA hRtApatyA ca dasyubhiH| yaH zEtE nizi santrastO yathA nArI divA pumAn||29||

iti vAksAyakairbiddhaH pratOttrairiva kuJjaraH| nizi nistriMzamAdAya vivastrO'bhyadravadruSA||30||

tE visRjyOraNau tatra vyadyOtanta sma vidyutaH| AdAya mESAvAyAntaM nagnamaikSata sA patim||31||

ailO'pi zayanE jAyAmapazyanvimanA iva| taccittO vihvalaH zOcanbabhrAmOnmattavanmahIm||32||

sa tAM vIkSya kurukSEtrE sarasvatyAM ca tatsakhIH| paJca prahRSTavadanaH prAha sUktaM purUravAH||33||

ahO jAyE tiSTha tiSTha ghOrE na tyaktumarhasi| mAM tvamadyApyanirvRtya vacAMsi kRNavAvahai||34||

sudEhO'yaM patatyatra dEvi dUraM hRtastvayA| khAdantyEnaM vRkA gRdhrAstvatprasAdasya nAspadam||35||

urvazyuvAca

mA mRthAH puruSO'si tvaM mA sma tvAdyurvRkA imE| kvApi sakhyaM na vai strINAM vRkANAM hRdayaM yathA||36||

striyO hyakaruNAH krUrA durmarSAH priyasAhasAH| ghnantyalpArthE'pi vizrabdhaM patiM bhrAtaramapyuta||37||

vidhAyAlIkavizrambhamajJESu tyaktasauhRdAH| navaM navamabhIpsantyaH puMzcalyaH svairavRttayaH||38||

saMvatsarAntE hi bhavAnEkarAtraM mayEzvaraH| raMsyatyapatyAni ca tE bhaviSyantyaparANi bhOH||39||

antarvatnImupAlakSya dEvIM sa prayayau purIm| punastatra gatO'bdAntE urvazIM vIramAtaram||40||

upalabhya mudA yuktaH samuvAsa tayA nizAm| athainamurvazI prAha kRpaNaM virahAturam||41||

gandharvAnupadhAvEmAMstubhyaM dAsyanti mAmiti tasya saMstuvatastuSTA agnisthAlIM dadurnRpa urvazIM manyamAnastAM sO'budhyata caranvanE||42||

sthAlIM nyasya vanE gatvA gRhAnAdhyAyatO nizi| trEtAyAM sampravRttAyAM manasi trayyavartata||43||

sthAlIsthAnaM gatO'zvatthaM zamIgarbhaM vilakSya saH| tEna dvE araNI kRtvA urvazIlOkakAmyayA||44||

urvazIM mantratO dhyAyannadharAraNimuttarAm| AtmAnamubhayOrmadhyE yattatprajananaM prabhuH||45||

tasya nirmanthanAjjAtO jAtavEdA vibhAvasuH| trayyA sa vidyayA rAjJA putratvE kalpitastrivRt||46||

tEnAyajata yajJEzaM bhagavantamadhOkSajam| urvazIlOkamanvicchansarvadEvamayaM harim||47||

Eka Eva purA vEdaH praNavaH sarvavAGmayaH| dEvO nArAyaNO nAnya EkO'gnirvarNa Eva ca||48||

purUravasa EvAsIttrayI trEtAmukhE nRpa agninA prajayA rAjA lOkaM gAndharvamEyivAn||49||

||iti zrImadbhAgavatE mahApurANE pAramahaMsyAM saMhitAyAM navamaskandhE caturdazO'dhyAyaH||

See Also

• http://vedabase.net/sb/9/14/en