From StotraSamhita
< Bhagavatam | Skandha 03
aSTAdazO'dhyAyaH
maitrEya uvAca
tadEvamAkarNya jalEzabhASitaM mahAmanAstadvigaNayya durmadaH| harErviditvA gatimaGga nAradAdrasAtalaM nirvivizE tvarAnvitaH||1|| |
dadarza tatrAbhijitaM dharAdharaM prOnnIyamAnAvanimagradaMSTrayA| muSNantamakSNA svarucO'ruNazriyA jahAsa cAhO vanagOcarO mRgaH||2|| |
AhainamEhyajJa mahIM vimuJca nO rasaukasAM vizvasRjEyamarpitA| na svasti yAsyasyanayA mamEkSataH surAdhamAsAditasUkarAkRtE||3|| |
tvaM naH sapatnairabhavAya kiM bhRtO yO mAyayA hantyasurAnparOkSajit| tvAM yOgamAyAbalamalpapauruSaM saMsthApya mUDha pramRjE suhRcchucaH||4|| |
tvayi saMsthitE gadayA zIrNazIrSaNyasmadbhujacyutayA yE ca tubhyam| baliM harantyRSayO yE ca dEvAH svayaM sarvE na bhaviSyantyamUlAH||5|| |
sa tudyamAnO'riduruktatOmarairdaMSTrAgragAM gAmupalakSya bhItAm| tOdaM mRSanniragAdambumadhyAdgrAhAhataH sakarENuryathEbhaH||6|| |
taM niHsarantaM salilAdanudrutO hiraNyakEzO dviradaM yathA jhaSaH| karAladaMSTrO'zaninisvanO'bravIdgatahriyAM kiM tvasatAM vigarhitam||7|| |
sa gAmudastAtsalilasya gOcarE vinyasya tasyAmadadhAtsvasattvam| abhiSTutO vizvasRjA prasUnairApUryamANO vibudhaiH pazyatO'rEH||8|| |
parAnuSaktaM tapanIyOpakalpaM mahAgadaM kAJcanacitradaMzam| marmANyabhIkSNaM pratudantaM duruktaiH pracaNDamanyuH prahasaMstaM babhASE||9|| |
zrIbhagavAnuvAca
satyaM vayaM bhO vanagOcarA mRgA yuSmadvidhAnmRgayE grAmasiMhAn| na mRtyupAzaiH pratimuktasya vIrA vikatthanaM tava gRhNantyabhadra||10|| |
EtE vayaM nyAsaharA rasaukasAM gatahriyO gadayA drAvitAstE| tiSThAmahE'thApi kathaJcidAjau sthEyaM kva yAmO balinOtpAdya vairam||11|| |
tvaM padrathAnAM kila yUthapAdhipO ghaTasva nO'svastaya AzvanUhaH| saMsthApya cAsmAnpramRjAzru svakAnAM yaH svAM pratijJAM nAtipipartyasabhyaH||12|| |
maitrEya uvAca
sO'dhikSiptO bhagavatA pralabdhazca ruSA bhRzam| AjahArOlbaNaM krOdhaM krIDyamAnO'hirADiva||13|| |
sRjannamarSitaH zvAsAnmanyupracalitEndriyaH| AsAdya tarasA daityO gadayA nyahanaddharim||14|| |
bhagavAMstu gadAvEgaM visRSTaM ripuNOrasi| avaJcayattirazcInO yOgArUDha ivAntakam||15|| |
punargadAM svAmAdAya bhrAmayantamabhIkSNazaH| abhyadhAvaddhariH kruddhaH saMrambhAddaSTadacchadam||16|| |
tatazca gadayArAtiM dakSiNasyAM bhruvi prabhuH| AjaghnE sa tu tAM saumya gadayA kOvidO'hanat||17|| |
EvaM gadAbhyAM gurvIbhyAM haryakSO harirEva ca| jigISayA susaMrabdhAvanyOnyamabhijaghnatuH||18|| |
tayOH spRdhOstigmagadAhatAGgayOH kSatAsravaghrANavivRddhamanyvOH| vicitramArgAMzcaratOrjigISayA vyabhAdilAyAmiva zuSmiNOrmRdhaH||19|| |
daityasya yajJAvayavasya mAyA gRhItavArAhatanOrmahAtmanaH| kauravya mahyAM dviSatOrvimardanaM didRkSurAgAdRSibhirvRtaH svarAT||20|| |
AsannazauNDIramapEtasAdhvasaM kRtapratIkAramahAryavikramam| vilakSya daityaM bhagavAnsahasraNIrjagAda nArAyaNamAdisUkaram||21|| |
brahmOvAca
ESa tE dEva dEvAnAmaGghrimUlamupEyuSAm| viprANAM saurabhEyINAM bhUtAnAmapyanAgasAm||22|| |
AgaskRdbhayakRdduSkRdasmadrAddhavarO'suraH| anvESannapratirathO lOkAnaTati kaNTakaH||23|| |
mainaM mAyAvinaM dRptaM niraGkuzamasattamam| AkrIDa bAlavaddEva yathAzIviSamutthitam||24|| |
na yAvadESa vardhEta svAM vElAM prApya dAruNaH| svAM dEva mAyAmAsthAya tAvajjahyaghamacyuta||25|| |
ESA ghOratamA sandhyA lOkacchambaTkarI prabhO| upasarpati sarvAtmansurANAM jayamAvaha||26|| |
adhunaiSO'bhijinnAma yOgO mauhUrtikO hyagAt| zivAya nastvaM suhRdAmAzu nistara dustaram||27|| |
diSTyA tvAM vihitaM mRtyumayamAsAditaH svayam vikramyainaM mRdhE hatvA lOkAnAdhEhi zarmaNi||28|| |
||iti zrImadbhAgavatE mahApurANE pAramahaMsyAM saMhitAyAM tRtIyaskandhE aSTAdazO'dhyAyaH||
