From StotraSamhita
< Bhagavatam | Skandha 06
tRtIyO'dhyAyaH
zrIrAjOvAca
nizamya dEvaH svabhaTOpavarNitaM pratyAha kiM tAnapi dharmarAjaH| EvaM hatAjJO vihatAnmurArErnaidEzikairyasya vazE janO'yam||1|| |
yamasya dEvasya na daNDabhaGgaH kutazcanarSE zrutapUrva AsIt| EtanmunE vRzcati lOkasaMzayaM na hi tvadanya iti mE vinizcitam||2|| |
zrIzuka uvAca
bhagavatpuruSai rAjanyAmyAH pratihatOdyamAH| patiM vijJApayAmAsuryamaM saMyamanIpatim||3|| |
yamadUtA UcuH
kati santIha zAstArO jIvalOkasya vai prabhO| traividhyaM kurvataH karma phalAbhivyaktihEtavaH||4|| |
yadi syurbahavO lOkE zAstArO daNDadhAriNaH| kasya syAtAM na vA kasya mRtyuzcAmRtamEva vA||5|| |
kintu zAstRbahutvE syAdbahUnAmiha karmiNAm| zAstRtvamupacArO hi yathA maNDalavartinAm||6|| |
atastvamEkO bhUtAnAM sEzvarANAmadhIzvaraH| zAstA daNDadharO nRRNAM zubhAzubhavivEcanaH||7|| |
tasya tE vihitO daNDO na lOkE vartatE'dhunA| caturbhiradbhutaiH siddhairAjJA tE vipralambhitA||8|| |
nIyamAnaM tavAdEzAdasmAbhiryAtanAgRhAn| vyAmOcayanpAtakinaM chittvA pAzAnprasahya tE||9|| |
tAMstE vEditumicchAmO yadi nO manyasE kSamam| nArAyaNEtyabhihitE mA bhairityAyayurdrutam||10|| |
zrIbAdarAyaNiruvAca
iti dEvaH sa ApRSTaH prajAsaMyamanO yamaH| prItaH svadUtAnpratyAha smaranpAdAmbujaM harEH||11|| |
yama uvAca
parO madanyO jagatastasthuSazca OtaM prOtaM paTavadyatra vizvam| yadaMzatO'sya sthitijanmanAzA nasyOtavadyasya vazE ca lOkaH||12|| |
yO nAmabhirvAci janaM nijAyAM badhnAti tantryAmiva dAmabhirgAH| yasmai baliM ta imE nAmakarma nibandhabaddhAzcakitA vahanti||13|| |
ahaM mahEndrO nirRtiH pracEtAH sOmO'gnirIzaH pavanO viriJciH| AdityavizvE vasavO'tha sAdhyA marudgaNA rudragaNAH sasiddhAH||14|| |
anyE ca yE vizvasRjO'marEzA bhRgvAdayO'spRSTarajastamaskAH| yasyEhitaM na viduH spRSTamAyAH sattvapradhAnA api kiM tatO'nyE||15|| |
yaM vai na gObhirmanasAsubhirvA hRdA girA vAsubhRtO vicakSatE| AtmAnamantarhRdi santamAtmanAM cakSuryathaivAkRtayastataH param||16|| |
tasyAtmatantrasya harEradhIzituH parasya mAyAdhipatErmahAtmanaH| prAyENa dUtA iha vai manOharAzcaranti tadrUpaguNasvabhAvAH||17|| |
bhUtAni viSNOH surapUjitAni durdarzaliGgAni mahAdbhutAni| rakSanti tadbhaktimataH parEbhyO mattazca martyAnatha sarvatazca||18|| |
dharmaM tu sAkSAdbhagavatpraNItaM na vai vidurRSayO nApi dEvAH| na siddhamukhyA asurA manuSyAH kutO nu vidyAdharacAraNAdayaH||19|| |
svayambhUrnAradaH zambhuH kumAraH kapilO manuH| prahlAdO janakO bhISmO balirvaiyAsakirvayam||20|| |
dvAdazaitE vijAnImO dharmaM bhAgavataM bhaTAH| guhyaM vizuddhaM durbOdhaM yaM jJAtvAmRtamaznutE||21|| |
EtAvAnEva lOkE'sminpuMsAM dharmaH paraH smRtaH| bhaktiyOgO bhagavati tannAmagrahaNAdibhiH||22|| |
nAmOccAraNamAhAtmyaM harEH pazyata putrakAH| ajAmilO'pi yEnaiva mRtyupAzAdamucyata||23|| |
EtAvatAlamaghanirharaNAya puMsAM saGkIrtanaM bhagavatO guNakarmanAmnAm| vikruzya putramaghavAnyadajAmilO'pi nArAyaNEti mriyamANa iyAya muktim||24|| |
prAyENa vEda tadidaM na mahAjanO'yaM dEvyA vimOhitamatirbata mAyayAlam| trayyAM jaDIkRtamatirmadhupuSpitAyAM vaitAnikE mahati karmaNi yujyamAnaH||25|| |
EvaM vimRzya sudhiyO bhagavatyanantE sarvAtmanA vidadhatE khalu bhAvayOgam| tE mE na daNDamarhantyatha yadyamISAM syAtpAtakaM tadapi hantyurugAyavAdaH||26|| |
tE dEvasiddhaparigItapavitragAthA yE sAdhavaH samadRzO bhagavatprapannAH| tAnnOpasIdata harErgadayAbhiguptAn naiSAM vayaM na ca vayaH prabhavAma daNDE||27|| |
tAnAnayadhvamasatO vimukhAnmukunda pAdAravindamakarandarasAdajasram| niSkiJcanaiH paramahaMsakulairasaGgair juSTAdgRhE nirayavartmani baddhatRSNAn||28|| |
jihvA na vakti bhagavadguNanAmadhEyaM cEtazca na smarati taccaraNAravindam| kRSNAya nO namati yacchira EkadApi tAnAnayadhvamasatO'kRtaviSNukRtyAn||29|| |
tatkSamyatAM sa bhagavAnpuruSaH purANO nArAyaNaH svapuruSairyadasatkRtaM naH| svAnAmahO na viduSAM racitAJjalInAM kSAntirgarIyasi namaH puruSAya bhUmnE||30|| |
tasmAtsaGkIrtanaM viSNOrjaganmaGgalamaMhasAm| mahatAmapi kauravya viddhyaikAntikaniSkRtam||31|| |
zRNvatAM gRNatAM vIryANyuddAmAni harErmuhuH| yathA sujAtayA bhaktyA zuddhyEnnAtmA vratAdibhiH||32|| |
kRSNAGghripadmamadhuliNna punarvisRSTa mAyAguNESu ramatE vRjinAvahESu| anyastu kAmahata AtmarajaH pramArSTum IhEta karma yata Eva rajaH punaH syAt||33|| |
itthaM svabhartRgaditaM bhagavanmahitvaM saMsmRtya vismitadhiyO yamakiGkarAstE| naivAcyutAzrayajanaM pratizaGkamAnA draSTuM ca bibhyati tataH prabhRti sma rAjan||34|| |
itihAsamimaM guhyaM bhagavAnkumbhasambhavaH kathayAmAsa malaya AsInO harimarcayan||35|| |
||iti zrImadbhAgavatE mahApurANE pAramahaMsyAM saMhitAyAM SaSThaskandhE tRtIyO'dhyAyaH||
