From StotraSamhita
< Bhagavatam | Skandha 10
EkapaJcAzattamO'dhyAyaH
zrIzuka uvAca
taM vilOkya viniSkrAntamujjihAnamivODupam| darzanIyatamaM zyAmaM pItakauzEyavAsasam||1|| |
zrIvatsavakSasaM bhrAjatkaustubhAmuktakandharam| pRthudIrghacaturbAhuM navakaJjAruNEkSaNam||2|| |
nityapramuditaM zrImatsukapOlaM zucismitam| mukhAravindaM bibhrANaM sphuranmakarakuNDalam||3|| |
vAsudEvO hyayamiti pumAnzrIvatsalAJchanaH| caturbhujO'ravindAkSO vanamAlyatisundaraH||4|| |
lakSaNairnAradaprOktairnAnyO bhavitumarhati| nirAyudhazcalanpadbhyAM yOtsyE'nEna nirAyudhaH||5|| |
iti nizcitya yavanaH prAdravadtaM parAGmukham| anvadhAvajjighRkSustaM durApamapi yOginAm||6|| |
hastaprAptamivAtmAnaM harINA sa padE padE| nItO darzayatA dUraM yavanEzO'drikandaram||7|| |
palAyanaM yadukulE jAtasya tava nOcitam| iti kSipannanugatO nainaM prApAhatAzubhaH||8|| |
EvaM kSiptO'pi bhagavAnprAvizadgirikandaram| sO'pi praviSTastatrAnyaM zayAnaM dadRzE naram||9|| |
nanvasau dUramAnIya zEtE mAmiha sAdhuvat| iti matvAcyutaM mUDhastaM padA samatADayat||10|| |
sa utthAya ciraM suptaH zanairunmIlya lOcanE| dizO vilOkayanpArzvE tamadrAkSIdavasthitam||11|| |
sa tAvattasya ruSTasya dRSTipAtEna bhArata| dEhajEnAgninA dagdhO bhasmasAdabhavatkSaNAt||12|| |
zrIrAjOvAca
kO nAma sa pumAnbrahmankasya kiMvIrya Eva ca| kasmAdguhAM gataH ziSyE kiM tEjO yavanArdanaH||13|| |
zrIzuka uvAca
sa ikSvAkukulE jAtO mAndhAtRtanayO mahAn| mucukunda iti khyAtO brahmaNyaH satyasaGgaraH||14|| |
sa yAcitaH suragaNairindrAdyairAtmarakSaNE| asurEbhyaH paritrastaistadrakSAM sO'karOcciram||15|| |
labdhvA guhaM tE svaHpAlaM mucukundamathAbruvan| rAjanviramatAM kRcchrAdbhavAnnaH paripAlanAt||16|| |
naralOkaM parityajya rAjyaM nihatakaNTakam| asmAnpAlayatO vIra kAmAstE sarva ujjhitAH||17|| |
sutA mahiSyO bhavatO jJAtayO'mAtyamantrinaH| prajAzca tulyakAlInA nAdhunA santi kAlitAH||18|| |
kAlO balIyAnbalinAM bhagavAnIzvarO'vyayaH| prajAH kAlayatE krIDanpazupAlO yathA pazUn||19|| |
varaM vRNISva bhadraM tE RtE kaivalyamadya naH| Eka EvEzvarastasya bhagavAnviSNuravyayaH||20|| |
EvamuktaH sa vai dEvAnabhivandya mahAyazAH| azayiSTa guhAviSTO nidrayA dEvadattayA||21|| |
yavanE bhasmasAnnItE bhagavAnsAtvatarSabhaH| AtmAnaM darzayAmAsa mucukundAya dhImatE||22|| |
tamAlOkya ghanazyAmaM pItakauzEyavAsasam| zrIvatsavakSasaM bhrAjatkaustubhEna virAjitam||23|| |
caturbhujaM rOcamAnaM vaijayantyA ca mAlayA| cAruprasannavadanaM sphuranmakarakuNDalam||24|| |
prEkSaNIyaM nRlOkasya sAnurAgasmitEkSaNam| apIvyavayasaM matta mRgEndrOdAravikramam||25|| |
paryapRcchanmahAbuddhistEjasA tasya dharSitaH| zaGkitaH zanakai rAjA durdharSamiva tEjasA||26|| |
zrImucukunda uvAca
kO bhavAniha samprAptO vipinE girigahvarE| padbhyAM padmapalAzAbhyAM vicarasyurukaNTakE||27|| |
kiM svittEjasvinAM tEjO bhagavAnvA vibhAvasuH| sUryaH sOmO mahEndrO vA lOkapAlO parO'pi vA||28|| |
manyE tvAM dEvadEvAnAM trayANAM puruSarSabham| yadbAdhasE guhAdhvAntaM pradIpaH prabhayA yathA||29|| |
zuzrUSatAmavyalIkamasmAkaM narapuGgava| svajanma karma gOtraM vA kathyatAM yadi rOcatE||30|| |
vayaM tu puruSavyAghra aikSvAkAH kSatrabandhavaH| mucukunda iti prOktO yauvanAzvAtmajaH prabhO||31|| |
ciraprajAgarazrAntO nidrayApahatEndriyaH| zayE'sminvijanE kAmaM kEnApyutthApitO'dhunA||32|| |
sO'pi bhasmIkRtO nUnamAtmIyEnaiva pApmanA| anantaraM bhavAnzrImAMllakSitO'mitrazAsanaH||33|| |
tEjasA tE'viSahyENa bhUri draSTuM na zaknumaH| hataujasA mahAbhAga mAnanIyO'si dEhinAm||34|| |
EvaM sambhASitO rAjJA bhagavAnbhUtabhAvanaH| pratyAha prahasanvANyA mEghanAdagabhIrayA||35|| |
zrIbhagavAnuvAca
janmakarmAbhidhAnAni santi mE'Gga sahasrazaH| na zakyantE'nusaGkhyAtumanantatvAnmayApi hi||36|| |
kvacidrajAMsi vimamE pArthivAnyurujanmabhiH| guNakarmAbhidhAnAni na mE janmAni karhicit||37|| |
kAlatrayOpapannAni janmakarmANi mE nRpa| anukramantO naivAntaM gacchanti paramarSayaH||38|| |
tathApyadyatanAnyaGga zRnuSva gadatO mama| vijJApitO viriJcEna purAhaM dharmaguptayE||39|| |
bhUmErbhArAyamANAnAmasurANAM kSayAya ca avatIrNO yadukulE gRha AnakadundubhEH vadanti vAsudEvEti vasudEvasutaM hi mAm||40|| |
kAlanEmirhataH kaMsaH pralambAdyAzca saddviSaH| ayaM ca yavanO dagdhO rAjaMstE tigmacakSuSA||41|| |
sO'haM tavAnugrahArthaM guhAmEtAmupAgataH| prArthitaH pracuraM pUrvaM tvayAhaM bhaktavatsalaH||42|| |
varAnvRNISva rAjarSE sarvAnkAmAndadAmi tE| mAM prasannO janaH kazcinna bhUyO'rhati zOcitum||43|| |
zrIzuka uvAca
ityuktastaM praNamyAha mucukundO mudAnvitaH| jJAtvA nArAyaNaM dEvaM gargavAkyamanusmaran||44|| |
zrImucukunda uvAca
vimOhitO'yaM jana Iza mAyayA tvadIyayA tvAM na bhajatyanarthadRk| sukhAya duHkhaprabhavESu sajjatE gRhESu yOSitpuruSazca vaJcitaH||45|| |
labdhvA janO durlabhamatra mAnuSaM kathaJcidavyaGgamayatnatO'nagha| pAdAravindaM na bhajatyasanmatir gRhAndhakUpE patitO yathA pazuH||46|| |
mamaiSa kAlO'jita niSphalO gatO rAjyazriyOnnaddhamadasya bhUpatEH| martyAtmabuddhEH sutadArakOzabhUSvAsajjamAnasya durantacintayA||47|| |
kalEvarE'sminghaTakuDyasannibhE nirUDhamAnO naradEva ityaham| vRtO rathEbhAzvapadAtyanIkapair gAM paryaTaMstvAgaNayansudurmadaH||48|| |
pramattamuccairitikRtyacintayA pravRddhalObhaM viSayESu lAlasam| tvamapramattaH sahasAbhipadyasE kSullElihAnO'hirivAkhumantakaH||49|| |
purA rathairhEmapariSkRtaizcaran mataM gajairvA naradEvasaMjJitaH| sa Eva kAlEna duratyayEna tE kalEvarO viTkRmibhasmasaMjJitaH||50|| |
nirjitya dikcakramabhUtavigrahO varAsanasthaH samarAjavanditaH| gRhESu maithunyasukhESu yOSitAM krIDAmRgaH pUruSa Iza nIyatE||51|| |
karOti karmANi tapaHsuniSThitO nivRttabhOgastadapEkSayAdadat| punazca bhUyAsamahaM svarADiti pravRddhatarSO na sukhAya kalpatE||52|| |
bhavApavargO bhramatO yadA bhavEjjanasya tarhyacyuta satsamAgamaH| satsaGgamO yarhi tadaiva sadgatau parAvarEzE tvayi jAyatE matiH||53|| |
manyE mamAnugraha Iza tE kRtO rAjyAnubandhApagamO yadRcchayA| yaH prArthyatE sAdhubhirEkacaryayA vanaM vivikSadbhirakhaNDabhUmipaiH||54|| |
na kAmayE'nyaM tava pAdasEvanAdakiJcanaprArthyatamAdvaraM vibhO| ArAdhya kastvAM hyapavargadaM harE vRNIta AryO varamAtmabandhanam||55|| |
tasmAdvisRjyAziSa Iza sarvatO rajastamaHsattvaguNAnubandhanAH| niraJjanaM nirguNamadvayaM paraM tvAM jJAptimAtraM puruSaM vrajAmyaham||56|| |
ciramiha vRjinArtastapyamAnO'nutApair avitRSaSaDamitrO'labdhazAntiH kathaJcit| zaraNada samupEtastvatpadAbjaM parAtman abhayamRtamazOkaM pAhi mApannamIza||57|| |
zrIbhagavAnuvAca
sArvabhauma mahArAja matistE vimalOrjitA| varaiH pralObhitasyApi na kAmairvihatA yataH||58|| |
pralObhitO varairyattvamapramAdAya viddhi tat| na dhIrEkAntabhaktAnAmAzIrbhirbhidyatE kvacit||59|| |
yuJjAnAnAmabhaktAnAM prANAyAmAdibhirmanaH| akSINavAsanaM rAjandRzyatE punarutthitam||60|| |
vicarasva mahIM kAmaM mayyAvEzitamAnasaH| astvEvaM nityadA tubhyaM bhaktirmayyanapAyinI||61|| |
kSAtradharmasthitO jantUnnyavadhIrmRgayAdibhiH| samAhitastattapasA jahyaghaM madupAzritaH||62|| |
janmanyanantarE rAjansarvabhUtasuhRttamaH bhUtvA dvijavarastvaM vai mAmupaiSyasi kEvalam||63|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE EkapaJcAzattamO'dhyAyaH||
