From StotraSamhita

saptapaJcAzattamO'dhyAyaH

zrIbAdarAyaNiruvAca

vijJAtArthO'pi gOvindO dagdhAnAkarNya pANDavAn| kuntIM ca kulyakaraNE saharAmO yayau kurUn||1||

bhISmaM kRpaM sa viduraM gAndhArIM drONamEva ca| tulyaduHkhau ca saGgamya hA kaSTamiti hOcatuH||2||

labdhvaitadantaraM rAjanzatadhanvAnamUcatuH| akrUrakRtavarmANau maniH kasmAnna gRhyatE||3||

yO'smabhyaM sampratizrutya kanyAratnaM vigarhya naH| kRSNAyAdAnna satrAjitkasmAdbhrAtaramanviyAt||4||

EvaM bhinnamatistAbhyAM satrAjitamasattamaH| zayAnamavadhIllObhAtsa pApaH kSINa jIvitaH||5||

strINAM vikrOzamAnAnAM krandantInAmanAthavat| hatvA pazUnsaunikavanmaNimAdAya jagmivAn||6||

satyabhAmA ca pitaraM hataM vIkSya zucArpitA| vyalapattAta tAtEti hA hatAsmIti muhyatI||7||

tailadrONyAM mRtaM prAsya jagAma gajasAhvayam| kRSNAya viditArthAya taptAcakhyau piturvadham||8||

tadAkarNyEzvarau rAjannanusRtya nRlOkatAm| ahO naH paramaM kaSTamityasrAkSau vilEpatuH||9||

Agatya bhagavAMstasmAtsabhAryaH sAgrajaH puram| zatadhanvAnamArEbhE hantuM hartuM maNiM tataH||10||

sO'pi kRtOdyamaM jJAtvA bhItaH prANaparIpsayA| sAhAyyE kRtavarmANamayAcata sa cAbravIt||11||

nAhamIsvarayOH kuryAM hElanaM rAmakRSNayOH| kO nu kSEmAya kalpEta tayOrvRjinamAcaran||12||

kaMsaH sahAnugO'pItO yaddvESAttyAjitaH zriyA| jarAsandhaH saptadaza saMyugAdvirathO gataH||13||

pratyAkhyAtaH sa cAkrUraM pArSNigrAhamayAcata| sO'pyAha kO virudhyEta vidvAnIzvarayOrbalam||14||

ya idaM lIlayA vizvaM sRjatyavati hanti ca| cESTAM vizvasRjO yasya na vidurmOhitAjayA||15||

yaH saptahAyanaH zailamutpATyaikEna pANinA| dadhAra lIlayA bAla ucchilIndhramivArbhakaH||16||

namastasmai bhagavatE kRSNAyAdbhutakarmaNE| anantAyAdibhUtAya kUTasthAyAtmanE namaH||17||

pratyAkhyAtaH sa tEnApi zatadhanvA mahAmaNim| tasminnyasyAzvamAruhya zatayOjanagaM yayau||18||

garuDadhvajamAruhya rathaM rAmajanArdanau| anvayAtAM mahAvEgairazvai rAjangurudruham||19||

mithilAyAmupavanE visRjya patitaM hayam| padbhyAmadhAvatsantrastaH kRSNO'pyanvadravadruSA||20||

padAtErbhagavAMstasya padAtistigmanEminA| cakrENa zira utkRtya vAsasOrvyacinOnmaNim||21||

alabdhamaNirAgatya kRSNa AhAgrajAntikam| vRthA hataH zatadhanurmaNistatra na vidyatE||22||

tata Aha balO nUnaM sa maNiH zatadhanvanA| kasmiMzcitpuruSE nyastastamanvESa puraM vraja||23||

ahaM vaidEhamicchAmi draSTuM priyatamaM mama| ityuktvA mithilAM rAjanvivEza yadanandanaH||24||

taM dRSTvA sahasOtthAya maithilaH prItamAnasaH| arhayAM Asa vidhivadarhaNIyaM samarhaNaiH||25||

uvAsa tasyAM katicinmithilAyAM samA vibhuH mAnitaH prItiyuktEna janakEna mahAtmanA tatO'zikSadgadAM kAlE dhArtarASTraH suyOdhanaH||26||

kEzavO dvArakAmEtya nidhanaM zatadhanvanaH| aprAptiM ca maNEH prAha priyAyAH priyakRdvibhuH||27||

tataH sa kArayAmAsa kriyA bandhOrhatasya vai| sAkaM suhRdbhirbhagavAnyA yAH syuH sAmparAyikIH||28||

akrUraH kRtavarmA ca zrutvA zatadhanOrvadham| vyUSaturbhayavitrastau dvArakAyAH prayOjakau||29||

akrUrE prOSitE'riSTAnyAsanvai dvArakaukasAm| zArIrA mAnasAstApA muhurdaivikabhautikAH||30||

ityaGgOpadizantyEkE vismRtya prAgudAhRtam| munivAsanivAsE kiM ghaTEtAriSTadarzanam||31||

dEvE'varSati kAzIzaH zvaphalkAyAgatAya vai| svasutAM gANdinIM prAdAttatO'varSatsma kAziSu||32||

tatsutastatprabhAvO'sAvakrUrO yatra yatra ha| dEvO'bhivarSatE tatra nOpatApA na mArIkAH||33||

iti vRddhavacaH zrutvA naitAvadiha kAraNam| iti matvA samAnAyya prAhAkrUraM janArdanaH||34||

pUjayitvAbhibhASyainaM kathayitvA priyAH kathAH| vijJatAkhilacitta jJaH smayamAna uvAca ha||35||

nanu dAnapatE nyastastvayyAstE zatadhanvanA| syamantakO maniH zrImAnviditaH pUrvamEva naH||36||

satrAjitO'napatyatvAdgRhNIyurduhituH sutAH| dAyaM ninIyApaH piNDAnvimucyarNaM ca zESitam||37||

tathApi durdharastvanyaistvayyAstAM suvratE maNiH| kintu mAmagrajaH samyaGna pratyEti maNiM prati||38||

darzayasva mahAbhAga bandhUnAM zAntimAvaha| avyucchinnA makhAstE'dya vartantE rukmavEdayaH||39||

EvaM sAmabhirAlabdhaH zvaphalkatanayO maNim| AdAya vAsasAcchannaH dadau sUryasamaprabham||40||

syamantakaM darzayitvA jJAtibhyO raja AtmanaH| vimRjya maNinA bhUyastasmai pratyarpayatprabhuH||41||

yastvEtadbhagavata Izvarasya viSNOr vIryADhyaM vRjinaharaM sumaGgalaM ca AkhyAnaM paThati zRNOtyanusmarEdvA duSkIrtiM duritamapOhya yAti zAntim||42||

||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE saptapaJcAzattamO'dhyAyaH||

See Also

• http://vedabase.net/sb/10/57/en