Jump to: navigation, search

paJcatriMzO'dhyAyaH

zrIzuka uvAca

gOpyaH kRSNE vanaM yAtE tamanudrutacEtasaH|
kRSNalIlAH pragAyantyO ninyurduHkhEna vAsarAn||1||

zrIgOpya UcuH

vAmabAhukRtavAmakapOlO valgitabhruradharArpitavENum|
kOmalAGgulibhirAzritamArgaM gOpya Irayati yatra mukundaH||2||

vyOmayAnavanitAH saha siddhairvismitAstadupadhArya salajjAH|
kAmamArgaNasamarpitacittAH kazmalaM yayurapasmRtanIvyaH||3||

hanta citramabalAH zRNutEdaM hArahAsa urasi sthiravidyut|
nandasUnurayamArtajanAnAM narmadO yarhi kUjitavENuH||4||

vRndazO vrajavRSA mRgagAvO vENuvAdyahRtacEtasa ArAt|
dantadaSTakavalA dhRtakarNA nidritA likhitacitramivAsan||5||

barhiNastabakadhAtupalAzairbaddhamallaparibarhaviDambaH|
karhicitsabala Ali sa gOpairgAH samAhvayati yatra mukundaH||6||

tarhi bhagnagatayaH saritO vai tatpadAmbujarajO'nilanItam|
spRhayatIrvayamivAbahupuNyAH prEmavEpitabhujAH stimitApaH||7||

anucaraiH samanuvarNitavIrya AdipUruSa ivAcalabhUtiH|
vanacarO giritaTESu carantIrvENunAhvayati gAH sa yadA hi||8||

vanalatAstarava Atmani viSNuM vyaJjayantya iva puSpaphalADhyAH|
praNatabhAraviTapA madhudhArAH prEmahRSTatanavO vavRSuH sma||9||

darzanIyatilakO vanamAlA divyagandhatulasImadhumattaiH|
alikulairalaghu gItAmabhISTamAdriyanyarhi sandhitavENuH||10||

sarasi sArasahaMsavihaGgAzcArugItAhRtacEtasa Etya|
harimupAsata tE yatacittA hanta mIlitadRzO dhRtamaunAH||11||

sahabalaH sragavataMsavilAsaH sAnuSu kSitibhRtO vrajadEvyaH|
harSayanyarhi vENuravENa jAtaharSa uparambhati vizvam||12||

mahadatikramaNazaGkitacEtA mandamandamanugarjati mEghaH|
suhRdamabhyavarSatsumanObhizchAyayA ca vidadhatpratapatram||13||

vividhagOpacaraNESu vidagdhO vENuvAdya urudhA nijazikSAH|
tava sutaH sati yadAdharabimbE dattavENuranayatsvarajAtIH||14||

savanazastadupadhArya surEzAH zakrazarvaparamESThipurOgAH|
kavaya AnatakandharacittAH kazmalaM yayuranizcitatattvAH||15||

nijapadAbjadalairdhvajavajra nIrajAGkuzavicitralalAmaiH|
vrajabhuvaH zamayankhuratOdaM varSmadhuryagatirIDitavENuH||16||

vrajati tEna vayaM savilAsa vIkSaNArpitamanObhavavEgAH|
kujagatiM gamitA na vidAmaH kazmalEna kavaraM vasanaM vA||17||

maNidharaH kvacidAgaNayangA mAlayA dayitagandhatulasyAH|
praNayinO'nucarasya kadAMsE prakSipanbhujamagAyata yatra||18||

kvaNitavENuravavaJcitacittAH kRSNamanvasata kRSNagRhiNyaH|
guNagaNArNamanugatya hariNyO gOpikA iva vimuktagRhAzAH||19||

kundadAmakRtakautukavESO gOpagOdhanavRtO yamunAyAm|
nandasUnuranaghE tava vatsO narmadaH praNayiNAM vijahAra||20||

mandavAyurupavAtyanakUlaM mAnayanmalayajasparzEna|
vandinastamupadEvagaNA yE vAdyagItabalibhiH parivavruH||21||

vatsalO vrajagavAM yadagadhrO vandyamAnacaraNaH pathi vRddhaiH|
kRtsnagOdhanamupOhya dinAntE gItavENuranugEDitakIrtiH||22||

utsavaM zramarucApi dRzInAmunnayankhurarajazchuritasrak|
ditsayaiti suhRdAsiSa ESa dEvakIjaTharabhUruDurAjaH||23||

madavighUrNitalOcana ISatmAnadaH svasuhRdAM vanamAlI|
badarapANDuvadanO mRdugaNDaM maNDayankanakakuNDalalakSmyA||24||

yadupatirdviradarAjavihArO yAminIpatirivaiSa dinAntE|
muditavaktra upayAti durantaM mOcayanvrajagavAM dinatApam||25||

zrIzuka uvAca

EvaM vrajastriyO rAjankRSNalIlAnugAyatIH
rEmirE'haHsu taccittAstanmanaskA mahOdayAH||26||

||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE paJcatriMzO'dhyAyaH||

See Also