From StotraSamhita
< Bhagavatam | Skandha 10
EkOnatriMzO'dhyAyaH
zrIbAdarAyaNiruvAca
bhagavAnapi tA rAtRIH zAradOtphullamallikAH| vIkSya rantuM manazcakrE yOgamAyAmupAzritaH||1|| |
tadODurAjaH kakubhaH karairmukhaM prAcyA vilimpannaruNEna zantamaiH| sa carSaNInAmudagAcchucO mRjanpriyaH priyAyA iva dIrghadarzanaH||2|| |
dRSTvA kumudvantamakhaNDamaNDalaM ramAnanAbhaM navakuGkumAruNam| vanaM ca tatkOmalagObhI raJjitaM jagau kalaM vAmadRzAM manOharam||3|| |
nizamya gItAM tadanaGgavardhanaM vrajastriyaH kRSNagRhItamAnasAH| AjagmuranyOnyamalakSitOdyamAH sa yatra kAntO javalOlakuNDalAH||4|| |
duhantyO'bhiyayuH kAzciddOhaM hitvA samutsukAH| payO'dhizritya saMyAvamanudvAsyAparA yayuH||5|| |
parivESayantyastaddhitvA pAyayantyaH zizUnpayaH| zuzrUSantyaH patInkAzcidaznantyO'pAsya bhOjanam||6|| |
limpantyaH pramRjantyO'nyA aJjantyaH kAzca lOcanE| vyatyastavastrAbharaNAH kAzcitkRSNAntikaM yayuH||7|| |
tA vAryamANAH patibhiH pitRbhirbhrAtRbandhubhiH| gOvindApahRtAtmAnO na nyavartanta mOhitAH||8|| |
antargRhagatAH kAzcidgOpyO'labdhavinirgamAH| kRSNaM tadbhAvanAyuktA dadhyurmIlitalOcanAH||9|| |
duHsahaprESThaviraha tIvratApadhutAzubhAH| dhyAnaprAptAcyutAzlESa nirvRtyA kSINamaGgalAH||10|| |
tamEva paramAtmAnaM jArabuddhyApi saGgatAH| jahurguNamayaM dEhaM sadyaH prakSINabandhanAH||11|| |
zrIparIkSiduvAca
kRSNaM viduH paraM kAntaM na tu brahmatayA munE| guNapravAhOparamastAsAM guNadhiyAM katham||12|| |
zrIzuka uvAca
uktaM purastAdEtattE caidyaH siddhiM yathA gataH| dviSannapi hRSIkEzaM kimutAdhOkSajapriyAH||13|| |
nRNAM niHzrEyasArthAya vyaktirbhagavatO nRpa| avyayasyApramEyasya nirguNasya guNAtmanaH||14|| |
kAmaM krOdhaM bhayaM snEhamaikyaM sauhRdamEva ca| nityaM harau vidadhatO yAnti tanmayatAM hi tE||15|| |
na caivaM vismayaH kAryO bhavatA bhagavatyajE| yOgEzvarEzvarE kRSNE yata EtadvimucyatE||16|| |
tA dRSTvAntikamAyAtA bhagavAnvrajayOSitaH| avadadvadatAM zrESThO vAcaH pEzairvimOhayan||17|| |
zrIbhagavAnuvAca
svAgataM vO mahAbhAgAH priyaM kiM karavANi vaH| vrajasyAnAmayaM kaccidbrUtAgamanakAraNam||18|| |
rajanyESA ghOrarUpA ghOrasattvaniSEvitA| pratiyAta vrajaM nEha sthEyaM strIbhiH sumadhyamAH||19|| |
mAtaraH pitaraH putrA bhrAtaraH patayazca vaH| vicinvanti hyapazyantO mA kRDhvaM bandhusAdhvasam||20|| |
dRSTaM vanaM kusumitaM rAkEzakararaJjitam| yamunAnilalIlaijattarupallavazObhitam||21|| |
tadyAta mA ciraM gOSThaM zuzrUSadhvaM patInsatIH| krandanti vatsA bAlAzca tAnpAyayata duhyata||22|| |
atha vA madabhisnEhAdbhavatyO yantritAzayAH| AgatA hyupapannaM vaH prIyantE mayi jantavaH||23|| |
bhartuH zuzrUSaNaM strINAM parO dharmO hyamAyayA| tadbandhUnAM ca kalyANaH prajAnAM cAnupOSaNam||24|| |
duHzIlO durbhagO vRddhO jaDO rOgyadhanO'pi vA| patiH strIbhirna hAtavyO lOkEpsubhirapAtakI||25|| |
asvargyamayazasyaM ca phalgu kRcchraM bhayAvaham| jugupsitaM ca sarvatra hyaupapatyaM kulastriyaH||26|| |
zravaNAddarzanAddhyAnAnmayi bhAvO'nukIrtanAt| na tathA sannikarSENa pratiyAta tatO gRhAn||27|| |
zrIzuka uvAca
iti vipriyamAkarNya gOpyO gOvindabhASitam| viSaNNA bhagnasaGkalpAzcintAmApurduratyayAm||28|| |
kRtvA mukhAnyava zucaH zvasanEna zuSyad bimbAdharANi caraNEna bhuvaH likhantyaH| asrairupAttamasibhiH kucakuGkumAni tasthurmRjantya uruduHkhabharAH sma tUSNIm||29|| |
prESThaM priyEtaramiva pratibhASamANaM kRSNaM tadarthavinivartitasarvakAmAH| nEtrE vimRjya ruditOpahatE sma kiJcit saMrambhagadgadagirO'bruvatAnuraktAH||30|| |
zrIgOpya UcuH
maivaM vibhO'rhati bhavAngadituM nRzaMsaM santyajya sarvaviSayAMstava pAdamUlam| bhaktA bhajasva duravagraha mA tyajAsmAn dEvO yathAdipuruSO bhajatE mumukSUn||31|| |
yatpatyapatyasuhRdAmanuvRttiraGga strINAM svadharma iti dharmavidA tvayOktam| astvEvamEtadupadEzapadE tvayIzE prESThO bhavAMstanubhRtAM kila bandhurAtmA||32|| |
kurvanti hi tvayi ratiM kuzalAH sva Atman nityapriyE patisutAdibhirArtidaiH kim| tannaH prasIda paramEzvara mA sma chindyA AzAM dhRtAM tvayi cirAdaravindanEtra||33|| |
cittaM sukhEna bhavatApahRtaM gRhESu yannirvizatyuta karAvapi gRhyakRtyE| pAdau padaM na calatastava pAdamUlAd yAmaH kathaM vrajamathO karavAma kiM vA||34|| |
siJcAGga nastvadadharAmRtapUrakENa hAsAvalOkakalagItajahRcchayAgnim| nO cEdvayaM virahajAgnyupayuktadEhA dhyAnEna yAma padayOH padavIM sakhE tE||35|| |
yarhyambujAkSa tava pAdatalaM ramAyA dattakSaNaM kvacidaraNyajanapriyasya| asprAkSma tatprabhRti nAnyasamakSamaJjaH sthAtuMstvayAbhiramitA bata pArayAmaH||36|| |
zrIryatpadAmbujarajazcakamE tulasyA labdhvApi vakSasi padaM kila bhRtyajuSTam| yasyAH svavIkSaNa utAnyasuraprayAsas tadvadvayaM ca tava pAdarajaH prapannAH||37|| |
tannaH prasIda vRjinArdana tE'nghrimUlaM prAptA visRjya vasatIstvadupAsanAzAH| tvatsundarasmitanirIkSaNatIvrakAma taptAtmanAM puruSabhUSaNa dEhi dAsyam||38|| |
vIkSyAlakAvRtamukhaM tava kuNdalazrI gaNDasthalAdharasudhaM hasitAvalOkam| dattAbhayaM ca bhujadaNDayugaM vilOkya vakSaH zriyaikaramaNaM ca bhavAma dAsyaH||39|| |
kA stryaGga tE kalapadAyatavENugIta sammOhitAryacaritAnna calEttrilOkyAm| trailOkyasaubhagamidaM ca nirIkSya rUpaM yadgOdvijadrumamRgAH pulakAnyabibhran||40|| |
vyaktaM bhavAnvrajabhayArtiharO'bhijAtO dEvO yathAdipuruSaH suralOkagOptA| tannO nidhEhi karapaGkajamArtabandhO taptastanESu ca ziraHsu ca kiGkarINAm||41|| |
zrIzuka uvAca
iti viklavitaM tAsAM zrutvA yOgEzvarEzvaraH| prahasya sadayaM gOpIrAtmArAmO'pyarIramat||42|| |
tAbhiH samEtAbhirudAracESTitaH priyEkSaNOtphullamukhIbhiracyutaH| udArahAsadvijakundadIdhatirvyarOcataiNAGka ivODubhirvRtaH||43|| |
upagIyamAna udgAyanvanitAzatayUthapaH| mAlAM bibhradvaijayantIM vyacaranmaNDayanvanam||44|| |
nadyAH pulinamAvizya gOpIbhirhimavAlukam| juSTaM tattaralAnandi kumudAmOdavAyunA||45|| |
bAhuprasAraparirambhakarAlakOru nIvIstanAlabhananarmanakhAgrapAtaiH| kSvElyAvalOkahasitairvrajasundarINAmuttambhayanratipatiM ramayAM cakAra||46|| |
EvaM bhagavataH kRSNAllabdhamAnA mahAtmanaH| AtmAnaM mEnirE strINAM mAninyO hyadhikaM bhuvi||47|| |
tAsAM tatsaubhagamadaM vIkSya mAnaM ca kEzavaH prazamAya prasAdAya tatraivAntaradhIyata||48|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE EkOnatriMzO'dhyAyaH||
