From StotraSamhita
< Bhagavatam | Skandha 10
saptadazO'dhyAyaH
zrIrAjOvAca
nAgAlayaM ramaNakaM kathaM tatyAja kAliyaH| kRtaM kiM vA suparNasya tEnaikEnAsamaJjasam||1|| |
zrIzuka uvAca
upahAryaiH sarpajanairmAsi mAsIha yO baliH| vAnaspatyO mahAbAhO nAgAnAM prAGnirUpitaH||2|| |
svaM svaM bhAgaM prayacchanti nAgAH parvaNi parvaNi| gOpIthAyAtmanaH sarvE suparNAya mahAtmanE||3|| |
viSavIryamadAviSTaH kAdravEyastu kAliyaH| kadarthIkRtya garuDaM svayaM taM bubhujE balim||4|| |
tacchrutvA kupitO rAjanbhagavAnbhagavatpriyaH| vijighAMsurmahAvEgaH kAliyaM samapAdravat||5|| |
tamApatantaM tarasA viSAyudhaH pratyabhyayAdutthitanaikamastakaH| dadbhiH suparNaM vyadazaddadAyudhaH karAlajihrOcchvasitOgralOcanaH||6|| |
taM tArkSyaputraH sa nirasya manyumAn pracaNDavEgO madhusUdanAsanaH| pakSENa savyEna hiraNyarOciSA jaghAna kadrusutamugravikramaH||7|| |
suparNapakSAbhihataH kAliyO'tIva vihvalaH| hradaM vivEza kAlindyAstadagamyaM durAsadam||8|| |
tatraikadA jalacaraM garuDO bhakSyamIpsitam| nivAritaH saubhariNA prasahya kSudhitO'harat||9|| |
mInAnsuduHkhitAndRSTvA dInAnmInapatau hatE| kRpayA saubhariH prAha tatratyakSEmamAcaran||10|| |
atra pravizya garuDO yadi matsyAnsa khAdati| sadyaH prANairviyujyEta satyamEtadbravImyaham||11|| |
tatkAliyaH paraM vEda nAnyaH kazcana lElihaH| avAtsIdgaruDAdbhItaH kRSNEna ca vivAsitaH||12|| |
kRSNaM hradAdviniSkrAntaM divyasraggandhavAsasam| mahAmaNigaNAkIrNaM jAmbUnadapariSkRtam||13|| |
upalabhyOtthitAH sarvE labdhaprANA ivAsavaH| pramOdanibhRtAtmAnO gOpAH prItyAbhirEbhirE||14|| |
yazOdA rOhiNI nandO gOpyO gOpAzca kaurava| kRSNaM samEtya labdhEhA AsanzuSkA nagA api||15|| |
rAmazcAcyutamAliGgya jahAsAsyAnubhAvavit prEmNA tamaGkamArOpya punaH punarudaikSata gAvO vRSA vatsataryO lEbhirE paramAM mudam||16|| |
nandaM viprAH samAgatya guravaH sakalatrakAH| UcustE kAliyagrastO diSTyA muktastavAtmajaH||17|| |
dEhi dAnaM dvijAtInAM kRSNanirmuktihEtavE| nandaH prItamanA rAjangAH suvarNaM tadAdizat||18|| |
yazOdApi mahAbhAgA naSTalabdhaprajA satI| pariSvajyAGkamArOpya mumOcAzrukalAM muhuH||19|| |
tAM rAtriM tatra rAjEndra kSuttRDbhyAM zramakarSitAH| USurvrayaukasO gAvaH kAlindyA upakUlataH||20|| |
tadA zucivanOdbhUtO dAvAgniH sarvatO vrajam| suptaM nizItha AvRtya pradagdhumupacakramE||21|| |
tata utthAya sambhrAntA dahyamAnA vrajaukasaH| kRSNaM yayustE zaraNaM mAyAmanujamIzvaram||22|| |
kRSNa kRSNa mahAbhaga hE rAmAmitavikrama| ESa ghOratamO vahnistAvakAngrasatE hi naH||23|| |
sudustarAnnaH svAnpAhi kAlAgnEH suhRdaH prabhO| na zaknumastvaccaraNaM santyaktumakutObhayam||24|| |
itthaM svajanavaiklavyaM nirIkSya jagadIzvaraH tamagnimapibattIvramanantO'nantazaktidhRk||25|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE saptadazO'dhyAyaH||
