navamO'dhyAyaH

EkadA gRhadAsISu yazOdA nandagEhinI|
karmAntaraniyuktAsu nirmamantha svayaM dadhi||1||

yAni yAnIha gItAni tadbAlacaritAni ca|
dadhinirmanthanE kAlE smarantI tAnyagAyata||2||

kSaumaM vAsaH pRthukaTitaTE bibhratI sUtranaddhaM
putrasnEhasnutakucayugaM jAtakampaM ca subhrUH|
rajjvAkarSazramabhujacalatkaGkaNau kuNDalE ca
svinnaM vaktraM kabaravigalanmAlatI nirmamantha||3||

tAM stanyakAma AsAdya mathnantIM jananIM hariH|
gRhItvA dadhimanthAnaM nyaSEdhatprItimAvahan||4||

tamaGkamArUDhamapAyayatstanaM snEhasnutaM sasmitamIkSatI mukham|
atRptamutsRjya javEna sA yayAvutsicyamAnE payasi tvadhizritE||5||

saJjAtakOpaH sphuritAruNAdharaM sandazya dadbhirdadhimanthabhAjanam|
bhittvA mRSAzrurdRSadazmanA rahO jaghAsa haiyaGgavamantaraM gataH||6||

uttArya gOpI suzRtaM payaH punaH pravizya sandRzya ca dadhyamatrakam|
bhagnaM vilOkya svasutasya karma tajjahAsa taM cApi na tatra pazyatI||7||

ulUkhalAGghrErupari vyavasthitaM markAya kAmaM dadataM zici sthitam|
haiyaGgavaM cauryavizaGkitEkSaNaM nirIkSya pazcAtsutamAgamacchanaiH||8||

tAmAttayaSTiM prasamIkSya satvaras
tatO'varuhyApasasAra bhItavat|
gOpyanvadhAvanna yamApa yOginAM
kSamaM pravESTuM tapasEritaM manaH||9||

anvaJcamAnA jananI bRhaccalac chrONIbharAkrAntagatiH sumadhyamA|
javEna visraMsitakEzabandhana cyutaprasUnAnugatiH parAmRzat||10||

kRtAgasaM taM prarudantamakSiNI kaSantamaJjanmaSiNI svapANinA|
udvIkSamANaM bhayavihvalEkSaNaM hastE gRhItvA bhiSayantyavAgurat||11||

tyaktvA yaSTiM sutaM bhItaM vijJAyArbhakavatsalA|
iyESa kila taM baddhuM dAmnAtadvIryakOvidA||12||

na cAntarna bahiryasya na pUrvaM nApi cAparam|
pUrvAparaM bahizcAntarjagatO yO jagacca yaH||13||

taM matvAtmajamavyaktaM martyaliGgamadhOkSajam|
gOpikOlUkhalE dAmnA babandha prAkRtaM yathA||14||

taddAma badhyamAnasya svArbhakasya kRtAgasaH|
dvyaGgulOnamabhUttEna sandadhE'nyacca gOpikA||15||

yadAsIttadapi nyUnaM tEnAnyadapi sandadhE|
tadapi dvyaGgulaM nyUnaM yadyadAdatta bandhanam||16||

EvaM svagEhadAmAni yazOdA sandadhatyapi|
gOpInAM susmayantInAM smayantI vismitAbhavat||17||

svamAtuH svinnagAtrAyA visrastakabarasrajaH|
dRSTvA parizramaM kRSNaH kRpayAsItsvabandhanE||18||

EvaM sandarzitA hyaGga hariNA bhRtyavazyatA|
svavazEnApi kRSNEna yasyEdaM sEzvaraM vazE||19||

nEmaM viriJcO na bhavO na zrIrapyaGgasaMzrayA|
prasAdaM lEbhirE gOpI yattatprApa vimuktidAt||20||

nAyaM sukhApO bhagavAndEhinAM gOpikAsutaH|
jJAninAM cAtmabhUtAnAM yathA bhaktimatAmiha||21||

kRSNastu gRhakRtyESu vyagrAyAM mAtari prabhuH|
adrAkSIdarjunau pUrvaM guhyakau dhanadAtmajau||22||

purA nAradazApEna vRkSatAM prApitau madAt
nalakUvaramaNigrIvAviti khyAtau zriyAnvitau||23||