trayOdazO'dhyAyaH

sAdhu pRSTaM mahAbhAga tvayA bhAgavatOttama|
yannUtanayasIzasya zRNvannapi kathAM muhuH||1||

satAmayaM sArabhRtAM nisargO yadarthavANIzruticEtasAmapi|
pratikSaNaM navyavadacyutasya yatstriyA viTAnAmiva sAdhu vArtA||2||

zRNuSvAvahitO rAjannapi guhyaM vadAmi tE|
brUyuH snigdhasya ziSyasya guravO guhyamapyuta||3||

tathAghavadanAnmRtyO rakSitvA vatsapAlakAn|
saritpulinamAnIya bhagavAnidamabravIt||4||

ahO'tiramyaM pulinaM vayasyAH svakElisampanmRdulAcchabAlukam|
sphuTatsarOgandhahRtAlipatrika dhvanipratidhvAnalasaddrumAkulam||5||

atra bhOktavyamasmAbhirdivArUDhaM kSudhArditAH|
vatsAH samIpE'paH pItvA carantu zanakaistRNam||6||

tathEti pAyayitvArbhA vatsAnArudhya zAdvalE|
muktvA zikyAni bubhujuH samaM bhagavatA mudA||7||

kRSNasya viSvakpururAjimaNDalair
abhyAnanAH phulladRzO vrajArbhakAH|
sahOpaviSTA vipinE virEjuz
chadA yathAmbhOruhakarNikAyAH||8||

kEcitpuSpairdalaiH kEcitpallavairaGkuraiH phalaiH|
zigbhistvagbhirdRSadbhizca bubhujuH kRtabhAjanAH||9||

sarvE mithO darzayantaH svasvabhOjyaruciM pRthak|
hasantO hAsayantazcA bhyavajahruH sahEzvarAH||10||

bibhradvENuM jaTharapaTayOH zRGgavEtrE ca kakSE
vAmE pANau masRNakavalaM tatphalAnyaGgulISu|
tiSThanmadhyE svaparisuhRdO hAsayannarmabhiH svaiH
svargE lOkE miSati bubhujE yajJabhugbAlakEliH||11||

bhArataivaM vatsapESu bhuJjAnESvacyutAtmasu|
vatsAstvantarvanE dUraM vivizustRNalObhitAH||12||

tAndRSTvA bhayasantrastAnUcE kRSNO'sya bhIbhayam|
mitrANyAzAnmA viramatE hAnESyE vatsakAnaham||13||

ityuktvAdridarIkuJja gahvarESvAtmavatsakAn|
vicinvanbhagavAnkRSNaH sapANikavalO yayau||14||

ambhOjanmajanistadantaragatO mAyArbhakasyEzitur
draSTuM maJju mahitvamanyadapi tadvatsAnitO vatsapAn|
nItvAnyatra kurUdvahAntaradadhAtkhE'vasthitO yaH purA
dRSTvAghAsuramOkSaNaM prabhavataH prAptaH paraM vismayam||15||

tatO vatsAnadRSTvaitya pulinE'pi ca vatsapAn|
ubhAvapi vanE kRSNO vicikAya samantataH||16||

kvApyadRSTvAntarvipinE vatsAnpAlAMzca vizvavit|
sarvaM vidhikRtaM kRSNaH sahasAvajagAma ha||17||

tataH kRSNO mudaM kartuM tanmAtRRNAM ca kasya ca|
ubhayAyitamAtmAnaM cakrE vizvakRdIzvaraH||18||

yAvadvatsapavatsakAlpakavapuryAvatkarAGghryAdikaM
yAvadyaSTiviSANavENudalazigyAvadvibhUSAmbaram|
yAvacchIlaguNAbhidhAkRtivayO yAvadvihArAdikaM
sarvaM viSNumayaM girO'GgavadajaH sarvasvarUpO babhau||19||

svayamAtmAtmagOvatsAnprativAryAtmavatsapaiH|
krIDannAtmavihAraizca sarvAtmA prAvizadvrajam||20||

tattadvatsAnpRthaGnItvA tattadgOSThE nivEzya saH|
tattadAtmAbhavadrAjaMstattatsadma praviSTavAn||21||

tanmAtarO vENuravatvarOtthitA utthApya dOrbhiH parirabhya nirbharam|
snEhasnutastanyapayaHsudhAsavaM matvA paraM brahma sutAnapAyayan||22||

tatO nRpOnmardanamajjalEpanA laGkArarakSAtilakAzanAdibhiH|
saMlAlitaH svAcaritaiH praharSayansAyaM gatO yAmayamEna mAdhavaH||23||

gAvastatO gOSThamupEtya satvaraM huGkAraghOSaiH parihUtasaGgatAn|
svakAnsvakAnvatsatarAnapAyayanmuhurlihantyaH sravadaudhasaM payaH||24||

gOgOpInAM mAtRtAsminnAsItsnEhardhikAM vinA|
purOvadAsvapi harEstOkatA mAyayA vinA||25||

vrajaukasAM svatOkESu snEhavallyAbdamanvaham|
zanairniHsIma vavRdhE yathA kRSNE tvapUrvavat||26||

itthamAtmAtmanAtmAnaM vatsapAlamiSENa saH|
pAlayanvatsapO varSaM cikrIDE vanagOSThayOH||27||

EkadA cArayanvatsAnsarAmO vanamAvizat|
paJcaSAsu triyAmAsu hAyanApUraNISvajaH||28||

tatO vidUrAccaratO gAvO vatsAnupavrajam|
gOvardhanAdrizirasi carantyO dadRzustRNam||29||

dRSTvAtha tatsnEhavazO'smRtAtmA sa gOvrajO'tyAtmapadurgamArgaH|
dvipAtkakudgrIva udAsyapucchO'gAddhuGkRtairAsrupayA javEna||30||

samEtya gAvO'dhO vatsAnvatsavatyO'pyapAyayan|
gilantya iva cAGgAni lihantyaH svaudhasaM payaH||31||

gOpAstadrOdhanAyAsa maughyalajjOrumanyunA|
durgAdhvakRcchratO'bhyEtya gOvatsairdadRzuH sutAn||32||

tadIkSaNOtprEmarasAplutAzayA jAtAnurAgA gatamanyavO'rbhakAn|
uduhya dOrbhiH parirabhya mUrdhani ghrANairavApuH paramAM mudaM tE||33||

tataH pravayasO gOpAstOkAzlESasunirvRtAH|
kRcchrAcchanairapagatAstadanusmRtyudazravaH||34||

vrajasya rAmaH prEmardhErvIkSyautkaNThyamanukSaNam|
muktastanESvapatyESvapyahEtuvidacintayat||35||

kimEtadadbhutamiva vAsudEvE'khilAtmani|
vrajasya sAtmanastOkESvapUrvaM prEma vardhatE||36||

kEyaM vA kuta AyAtA daivI vA nAryutAsurI|
prAyO mAyAstu mE bharturnAnyA mE'pi vimOhinI||37||

iti saJcintya dAzArhO vatsAnsavayasAnapi|
sarvAnAcaSTa vaikuNThaM cakSuSA vayunEna saH||38||

naitE surEzA RSayO na caitE tvamEva bhAsIza bhidAzrayE'pi|
sarvaM pRthaktvaM nigamAtkathaM vadEtyuktEna vRttaM prabhuNA balO'vait||39||

tAvadEtyAtmabhUrAtma mAnEna truTyanEhasA|
purOvadAbdaM krIDantaM dadRzE sakalaM harim||40||

yAvantO gOkulE bAlAH savatsAH sarva Eva hi|
mAyAzayE zayAnA mE nAdyApi punarutthitAH||41||

ita EtE'tra kutratyA manmAyAmOhitEtarE|
tAvanta Eva tatrAbdaM krIDantO viSNunA samam||42||

EvamEtESu bhEdESu ciraM dhyAtvA sa AtmabhUH|
satyAH kE katarE nEti jJAtuM nESTE kathaJcana||43||

EvaM sammOhayanviSNuM vimOhaM vizvamOhanam|
svayaiva mAyayAjO'pi svayamEva vimOhitaH||44||

tamyAM tamOvannaihAraM khadyOtArcirivAhani|
mahatItaramAyaizyaM nihantyAtmani yuJjataH||45||

tAvatsarvE vatsapAlAH pazyatO'jasya tatkSaNAt|
vyadRzyanta ghanazyAmAH pItakauzEyavAsasaH||46||

caturbhujAH zaGkhacakra gadArAjIvapANayaH|
kirITinaH kuNDalinO hAriNO vanamAlinaH||47||

zrIvatsAGgadadOratna kambukaGkaNapANayaH|
nUpuraiH kaTakairbhAtAH kaTisUtrAGgulIyakaiH||48||

AGghrimastakamApUrNAstulasInavadAmabhiH|
kOmalaiH sarvagAtrESu bhUripuNyavadarpitaiH||49||

candrikAvizadasmEraiH sAruNApAGgavIkSitaiH|
svakArthAnAmiva rajaH sattvAbhyAM sraSTRpAlakAH||50||

AtmAdistambaparyantairmUrtimadbhizcarAcaraiH|
nRtyagItAdyanEkArhaiH pRthakpRthagupAsitAH||51||

aNimAdyairmahimabhirajAdyAbhirvibhUtibhiH|
caturviMzatibhistattvaiH parItA mahadAdibhiH||52||

kAlasvabhAvasaMskAra kAmakarmaguNAdibhiH|
svamahidhvastamahibhirmUrtimadbhirupAsitAH||53||

satyajJAnAnantAnanda mAtraikarasamUrtayaH|
aspRSTabhUrimAhAtmyA api hyupaniSaddRzAm||54||

EvaM sakRddadarzAjaH parabrahmAtmanO'khilAn|
yasya bhAsA sarvamidaM vibhAti sacarAcaram||55||

tatO'tikutukOdvRtya stimitaikAdazEndriyaH|
taddhAmnAbhUdajastUSNIM pUrdEvyantIva putrikA||56||

itIrEzE'tarkyE nijamahimani svapramitikE
paratrAjAtO'tannirasanamukhabrahmakamitau|
anIzE'pi draSTuM kimidamiti vA muhyati sati
cacchAdAjO jJAtvA sapadi paramO'jAjavanikAm||57||

tatO'rvAkpratilabdhAkSaH kaH parEtavadutthitaH|
kRcchrAdunmIlya vai dRSTIrAcaSTEdaM sahAtmanA||58||

sapadyEvAbhitaH pazyandizO'pazyatpuraHsthitam|
vRndAvanaM janAjIvya drumAkIrNaM samApriyam||59||

yatra naisargadurvairAH sahAsannRmRgAdayaH|
mitrANIvAjitAvAsa drutaruTtarSakAdikam||60||

tatrOdvahatpazupavaMzazizutvanATyaM
brahmAdvayaM paramanantamagAdhabOdham|
vatsAnsakhIniva purA paritO vicinvad
EkaM sapANikavalaM paramESThyacaSTa||61||

dRSTvA tvarENa nijadhOraNatO'vatIrya
pRthvyAM vapuH kanakadaNDamivAbhipAtya|
spRSTvA caturmukuTakOTibhiraGghriyugmaM
natvA mudazrusujalairakRtAbhiSEkam||62||

utthAyOtthAya kRSNasya cirasya pAdayOH patan|
AstE mahitvaM prAgdRSTaM smRtvA smRtvA punaH punaH||63||

zanairathOtthAya vimRjya lOcanE mukundamudvIkSya vinamrakandharaH
kRtAJjaliH prazrayavAnsamAhitaH savEpathurgadgadayailatElayA||64||