aSTamO'dhyAyaH

EkadA tu mahAnadyAM kRtAbhiSEkanaiyamikAvazyakO brahmAkSaramabhigRNAnO muhUrta
trayamudakAnta upavivEza||1||

tatra tadA rAjanhariNI pipAsayA jalAzayAbhyAzamEkaivOpajagAma||2||

tayA pEpIyamAna udakE tAvadEvAvidUrENa nadatO mRgapatErunnAdO lOkabhayaGkara udapatat||3||

tamupazrutya sA mRgavadhUH prakRtiviklavA cakitanirIkSaNA sutarAmapi haribhayAbhinivEza
vyagrahRdayA pAriplavadRSTiragatatRSA bhayAtsahasaivOccakrAma||4||

tasyA utpatantyA antarvatnyA urubhayAvagalitO yOninirgatO garbhaH srOtasi nipapAta||5||

tatprasavOtsarpaNabhayakhEdAturA svagaNEna viyujyamAnA kasyAJciddaryAM kRSNasArasatI
nipapAtAtha ca mamAra||6||

taM tvENakuNakaM kRpaNaM srOtasAnUhyamAnamabhivIkSyApaviddhaM bandhurivAnukampayA
rAjarSirbharata AdAya mRtamAtaramityAzramapadamanayat||7||

tasya ha vA ENakuNaka uccairEtasminkRtanijAbhimAnasyAharahastatpOSaNapAlanalAlana
prINanAnudhyAnEnAtmaniyamAH sahayamAH puruSaparicaryAdaya EkaikazaH katipayEnAhargaNEna
viyujyamAnAH kila sarva EvOdavasan||8||

ahO batAyaM hariNakuNakaH kRpaNa IzvararathacaraNaparibhramaNarayENa svagaNasuhRd
bandhubhyaH parivarjitaH zaraNaM ca mOpasAditO mAmEva mAtApitarau bhrAtRjJAtInyauthikAMzcaivOpEyAya
nAnyaM kaJcana vEda mayyativisrabdhazcAta Eva mayA matparAyaNasya pOSaNapAlanaprINana
lAlanamanasUyunAnuSThEyaM zaraNyOpEkSAdOSaviduSA||9||

nUnaM hyAryAH sAdhava upazamazIlAH kRpaNasuhRda EvaMvidhArthE svArthAnapi
gurutarAnupEkSantE||10||

iti kRtAnuSaGga AsanazayanATanasnAnAzanAdiSu saha mRgajahunA snEhAnubaddhahRdaya AsIt||11||

kuzakusumasamitpalAzaphalamUlOdakAnyAhariSyamANO vRkasAlAvRkAdibhyO
bhayamAzaMsamAnO yadA saha hariNakuNakEna vanaM samAvizati||12||

pathiSu ca mugdhabhAvEna tatra tatra viSaktamatipraNayabharahRdayaH
kArpaNyAtskandhEnOdvahati EvamutsaGga urasi cAdhAyOpalAlayanmudaM paramAmavApa||13||

kriyAyAM nirvartyamAnAyAmantarAlE'pyutthAyOtthAya yadainamabhicakSIta tarhi vAva sa varSa
patiH prakRtisthEna manasA tasmA AziSa AzAstE svasti stAdvatsa tE sarvata iti||14||

anyadA bhRzamudvignamanA naSTadraviNa iva kRpaNaH sakaruNamatitarSENa hariNakuNakaviraha
vihvalahRdayasantApastamEvAnuzOcankila kazmalaM mahadabhirambhita iti hOvAca||15||

api bata sa vai kRpaNa ENabAlakO mRtahariNIsutO'hO mamAnAryasya zaThakirAtamatErakRta
sukRtasya kRtavisrambha AtmapratyayEna tadavigaNayansujana ivAgamiSyati||16||

api kSEmENAsminnAzramOpavanE zaSpANi carantaM dEvaguptaM drakSyAmi||17||

api ca na vRkaH sAlAvRkO'nyatamO vA naikacara EkacarO vA bhakSayati||18||

nimlOcati ha bhagavAnsakalajagatkSEmOdayastrayyAtmAdyApi mama na mRgavadhUnyAsa
Agacchati||19||

api svidakRtasukRtamAgatya mAM sukhayiSyati hariNarAjakumArO vividharuciradarzanIyanija
mRgadArakavinOdairasantOSaM svAnAmapanudan||20||

kSvElikAyAM mAM mRSAsamAdhinAmIlitadRzaM prEmasaMrambhENa cakitacakita Agatya pRSad
aparuSaviSANAgrENa luThati||21||

AsAditahaviSi barhiSi dUSitE mayOpAlabdhO bhItabhItaH sapadyuparatarAsa RSikumAravadavahita
karaNakalApa AstE||22||

kiM vA arE AcaritaM tapastapasvinyAnayA yadiyamavaniH savinayakRSNasAratanayatanutara
subhagazivatamAkharakhurapadapaGktibhirdraviNavidhurAturasya kRpaNasya mama draviNapadavIM
sUcayantyAtmAnaM ca sarvataH kRtakautukaM dvijAnAM svargApavargakAmAnAM dEvayajanaM karOti||23||

api svidasau bhagavAnuDupatirEnaM mRgapatibhayAnmRtamAtaraM mRgabAlakaM svAzrama
paribhraSTamanukampayA kRpaNajanavatsalaH paripAti||24||

kiM vAtmajavizlESajvaradavadahanazikhAbhirupatapyamAnahRdayasthalanalinIkaM
mAmupasRtamRgItanayaM zizirazAntAnurAgaguNitanijavadanasalilAmRtamayagabhastibhiH svadhayatIti ca||25||

EvamaghaTamAnamanOrathAkulahRdayO mRgadArakAbhAsEna svArabdhakarmaNA yOgArambhaNatO
vibhraMzitaH sa yOgatApasO bhagavadArAdhanalakSaNAcca kathamitarathA jAtyantara ENakuNaka AsaGgaH
sAkSAnniHzrEyasapratipakSatayA prAkparityaktadustyajahRdayAbhijAtasya tasyaivamantarAyavihata
yOgArambhaNasya rAjarSErbharatasya tAvanmRgArbhakapOSaNapAlanaprINanalAlanAnuSaGgENAvigaNayata
AtmAnamahirivAkhubilaM duratikramaH kAlaH karAlarabhasa Apadyata||26||

tadAnImapi pArzvavartinamAtmajamivAnuzOcantamabhivIkSamANO mRga EvAbhinivEzitamanA
visRjya lOkamimaM saha mRgENa kalEvaraM mRtamanu na mRtajanmAnusmRtiritaravanmRgazarIramavApa||27||

tatrApi ha vA AtmanO mRgatvakAraNaM bhagavadArAdhanasamIhAnubhAvEnAnusmRtya
bhRzamanutapyamAna Aha||28||

ahO kaSTaM bhraSTO'hamAtmavatAmanupathAdyadvimuktasamastasaGgasya viviktapuNyAraNya
zaraNasyAtmavata Atmani sarvESAmAtmanAM bhagavati vAsudEvE tadanuzravaNamanana
saGkIrtanArAdhanAnusmaraNAbhiyOgEnAzUnyasakalayAmEna kAlEna samAvEzitaM samAhitaM kArtsnyEna
manastattu punarmamAbudhasyArAnmRgasutamanu parisusrAva||29||

ityEvaM nigUDhanirvEdO visRjya mRgIM mAtaraM punarbhagavatkSEtramupazamazIlamunigaNa
dayitaM zAlagrAmaM pulastyapulahAzramaM kAlaJjarAtpratyAjagAma||30||

tasminnapi kAlaM pratIkSamANaH saGgAcca bhRzamudvigna AtmasahacaraH zuSkaparNatRNa
vIrudhA vartamAnO mRgatvanimittAvasAnamEva gaNayanmRgazarIraM tIrthOdakaklinnamutsasarja||31||