From StotraSamhita

EkAdazO'dhyAyaH

zrIzuka uvAca

zrutvEhitaM sAdhu sabhAsabhAjitaM mahattamAgraNya urukramAtmanaH| yudhiSThirO daityapatErmudAnvitaH papraccha bhUyastanayaM svayambhuvaH||1||

zrIyudhiSThira uvAca

bhagavanzrOtumicchAmi nRNAM dharmaM sanAtanam| varNAzramAcArayutaM yatpumAnvindatE param||2||

bhavAnprajApatEH sAkSAdAtmajaH paramESThinaH| sutAnAM sammatO brahmaMstapOyOgasamAdhibhiH||3||

nArAyaNaparA viprA dharmaM guhyaM paraM viduH| karuNAH sAdhavaH zAntAstvadvidhA na tathAparE||4||

zrInArada uvAca

natvA bhagavatE'jAya lOkAnAM dharmasEtavE| vakSyE sanAtanaM dharmaM nArAyaNamukhAcchrutam||5||

yO'vatIryAtmanO'MzEna dAkSAyaNyAM tu dharmataH| lOkAnAM svastayE'dhyAstE tapO badarikAzramE||6||

dharmamUlaM hi bhagavAnsarvavEdamayO hariH| smRtaM ca tadvidAM rAjanyEna cAtmA prasIdati||7||

satyaM dayA tapaH zaucaM titikSEkSA zamO damaH| ahiMsA brahmacaryaM ca tyAgaH svAdhyAya Arjavam||8||

santOSaH samadRksEvA grAmyEhOparamaH zanaiH| nRNAM viparyayEhEkSA maunamAtmavimarzanam||9||

annAdyAdEH saMvibhAgO bhUtEbhyazca yathArhataH| tESvAtmadEvatAbuddhiH sutarAM nRSu pANDava||10||

zravaNaM kIrtanaM cAsya smaraNaM mahatAM gatEH| sEvEjyAvanatirdAsyaM sakhyamAtmasamarpaNam||11||

nRNAmayaM parO dharmaH sarvESAM samudAhRtaH| triMzallakSaNavAnrAjansarvAtmA yEna tuSyati||12||

saMskArA yatrAvicchinnAH sa dvijO'jO jagAda yam ijyAdhyayanadAnAni vihitAni dvijanmanAm janmakarmAvadAtAnAM kriyAzcAzramacOditAH||13||

viprasyAdhyayanAdIni SaDanyasyApratigrahaH| rAjJO vRttiH prajAgOpturaviprAdvA karAdibhiH||14||

vaizyastu vArtAvRttiH syAnnityaM brahmakulAnugaH| zUdrasya dvijazuzrUSA vRttizca svAminO bhavEt||15||

vArtA vicitrA zAlIna yAyAvarazilOJchanam| vipravRttizcaturdhEyaM zrEyasI cOttarOttarA||16||

jaghanyO nOttamAM vRttimanApadi bhajEnnaraH| RtE rAjanyamApatsu sarvESAmapi sarvazaH||17||

RtAmRtAbhyAM jIvEta mRtEna pramRtEna vA| satyAnRtAbhyAmapi vA na zvavRttyA kadAcana||18||

RtamuJchazilaM prOktamamRtaM yadayAcitam| mRtaM tu nityayAcJA syAtpramRtaM karSaNaM smRtam||19||

satyAnRtaM ca vANijyaM zvavRttirnIcasEvanam varjayEttAM sadA viprO rAjanyazca jugupsitAm sarvavEdamayO vipraH sarvadEvamayO nRpaH||20||

zamO damastapaH zaucaM santOSaH kSAntirArjavam| jJAnaM dayAcyutAtmatvaM satyaM ca brahmalakSaNam||21||

zauryaM vIryaM dhRtistEjastyAgazcAtmajayaH kSamA| brahmaNyatA prasAdazca satyaM ca kSatralakSaNam||22||

dEvagurvacyutE bhaktistrivargaparipOSaNam| AstikyamudyamO nityaM naipuNyaM vaizyalakSaNam||23||

zUdrasya sannatiH zaucaM sEvA svAminyamAyayA| amantrayajJO hyastEyaM satyaM gOviprarakSaNam||24||

strINAM ca patidEvAnAM tacchuzrUSAnukUlatA| tadbandhuSvanuvRttizca nityaM tadvratadhAraNam||25||

sammArjanOpalEpAbhyAM gRhamaNDanavartanaiH| svayaM ca maNDitA nityaM parimRSTaparicchadA||26||

kAmairuccAvacaiH sAdhvI prazrayENa damEna ca| vAkyaiH satyaiH priyaiH prEmNA kAlE kAlE bhajEtpatim||27||

santuSTAlOlupA dakSA dharmajJA priyasatyavAk| apramattA zuciH snigdhA patiM tvapatitaM bhajEt||28||

yA patiM haribhAvEna bhajEtzrIriva tatparA| haryAtmanA harErlOkE patyA zrIriva mOdatE||29||

vRttiH saGkarajAtInAM tattatkulakRtA bhavEt| acaurANAmapApAnAmantyajAntEvasAyinAm||30||

prAyaH svabhAvavihitO nRNAM dharmO yugE yugE| vEdadRgbhiH smRtO rAjanprEtya cEha ca zarmakRt||31||

vRttyA svabhAvakRtayA vartamAnaH svakarmakRt| hitvA svabhAvajaM karma zanairnirguNatAmiyAt||32||

upyamAnaM muhuH kSEtraM svayaM nirvIryatAmiyAt| na kalpatE punaH sUtyai uptaM bIjaM ca nazyati||33||

EvaM kAmAzayaM cittaM kAmAnAmatisEvayA| virajyEta yathA rAjannagnivatkAmabindubhiH||34||

yasya yallakSaNaM prOktaM puMsO varNAbhivyaJjakam yadanyatrApi dRzyEta tattEnaiva vinirdizEt||35||

||iti zrImadbhAgavatE mahApurANE pAramahaMsyAM saMhitAyAM saptamaskandhE EkAdazO'dhyAyaH||

See Also

• http://vedabase.net/sb/7/11/en