From StotraSamhita

viMzO'dhyAyaH

maitrEya uvAca

bhagavAnapi vaikuNThaH sAkaM maghavatA vibhuH| yajJairyajJapatistuSTO yajJabhuktamabhASata||1||

zrIbhagavAnuvAca

ESa tE'kArSIdbhaGgaM hayamEdhazatasya ha| kSamApayata AtmAnamamuSya kSantumarhasi||2||

sudhiyaH sAdhavO lOkE naradEva narOttamAH| nAbhidruhyanti bhUtEbhyO yarhi nAtmA kalEvaram||3||

puruSA yadi muhyanti tvAdRzA dEvamAyayA| zrama Eva paraM jAtO dIrghayA vRddhasEvayA||4||

ataH kAyamimaM vidvAnavidyAkAmakarmabhiH| Arabdha iti naivAsminpratibuddhO'nuSajjatE||5||

asaMsaktaH zarIrE'sminnamunOtpAditE gRhE| apatyE draviNE vApi kaH kuryAnmamatAM budhaH||6||

EkaH zuddhaH svayaM jyOtirnirguNO'sau guNAzrayaH| sarvagO'nAvRtaH sAkSI nirAtmAtmAtmanaH paraH||7||

ya EvaM santamAtmAnamAtmasthaM vEda pUruSaH| nAjyatE prakRtisthO'pi tadguNaiH sa mayi sthitaH||8||

yaH svadharmENa mAM nityaM nirAzIH zraddhayAnvitaH| bhajatE zanakaistasya manO rAjanprasIdati||9||

parityaktaguNaH samyagdarzanO vizadAzayaH| zAntiM mE samavasthAnaM brahma kaivalyamaznutE||10||

udAsInamivAdhyakSaM dravyajJAnakriyAtmanAm| kUTasthamimamAtmAnaM yO vEdApnOti zObhanam||11||

bhinnasya liGgasya guNapravAhO dravyakriyAkArakacEtanAtmanaH| dRSTAsu sampatsu vipatsu sUrayO na vikriyantE mayi baddhasauhRdAH||12||

samaH samAnOttamamadhyamAdhamaH sukhE ca duHkhE ca jitEndriyAzayaH| mayOpaklRptAkhilalOkasaMyutO vidhatsva vIrAkhilalOkarakSaNam||13||

zrEyaH prajApAlanamEva rAjJO yatsAmparAyE sukRtAtSaSThamaMzam| hartAnyathA hRtapuNyaH prajAnAmarakSitA karahArO'ghamatti||14||

EvaM dvijAgryAnumatAnuvRtta dharmapradhAnO'nyatamO'vitAsyAH| hrasvEna kAlEna gRhOpayAtAndraSTAsi siddhAnanuraktalOkaH||15||

varaM ca matkaJcana mAnavEndra vRNISva tE'haM guNazIlayantritaH| nAhaM makhairvai sulabhastapObhiryOgEna vA yatsamacittavartI||16||

maitrEya uvAca

sa itthaM lOkaguruNA viSvaksEnEna vizvajit| anuzAsita AdEzaM zirasA jagRhE harEH||17||

spRzantaM pAdayOH prEmNA vrIDitaM svEna karmaNA| zatakratuM pariSvajya vidvESaM visasarja ha||18||

bhagavAnatha vizvAtmA pRthunOpahRtArhaNaH| samujjihAnayA bhaktyA gRhItacaraNAmbujaH||19||

prasthAnAbhimukhO'pyEnamanugrahavilambitaH| pazyanpadmapalAzAkSO na pratasthE suhRtsatAm||20||

sa AdirAjO racitAJjalirhariM vilOkituM nAzakadazrulOcanaH| na kiJcanOvAca sa bASpaviklavO hRdOpaguhyAmumadhAdavasthitaH||21||

athAvamRjyAzrukalA vilOkayannatRptadRggOcaramAha pUruSam| padA spRzantaM kSitimaMsa unnatE vinyastahastAgramuraGgavidviSaH||22||

pRthuruvAca

varAnvibhO tvadvaradEzvarAdbudhaH kathaM vRNItE guNavikriyAtmanAm| yE nArakANAmapi santi dEhinAM tAnIza kaivalyapatE vRNE na ca||23||

na kAmayE nAtha tadapyahaM kvacinna yatra yuSmaccaraNAmbujAsavaH| mahattamAntarhRdayAnmukhacyutO vidhatsva karNAyutamESa mE varaH||24||

sa uttamazlOka mahanmukhacyutO bhavatpadAmbhOjasudhA kaNAnilaH| smRtiM punarvismRtatattvavartmanAM kuyOginAM nO vitaratyalaM varaiH||25||

yazaH zivaM suzrava AryasaGgamE yadRcchayA cOpazRNOti tE sakRt| kathaM guNajJO viramEdvinA pazuM zrIryatpravavrE guNasaGgrahEcchayA||26||

athAbhajE tvAkhilapUruSOttamaM guNAlayaM padmakarEva lAlasaH| apyAvayOrEkapatispRdhOH kalirna syAtkRtatvaccaraNaikatAnayOH||27||

jagajjananyAM jagadIza vaizasaM syAdEva yatkarmaNi naH samIhitam| karOSi phalgvapyuru dInavatsalaH sva Eva dhiSNyE'bhiratasya kiM tayA||28||

bhajantyatha tvAmata Eva sAdhavO vyudastamAyAguNavibhramOdayam| bhavatpadAnusmaraNAdRtE satAM nimittamanyadbhagavanna vidmahE||29||

manyE giraM tE jagatAM vimOhinIM varaM vRNISvEti bhajantamAttha yat| vAcA nu tantyA yadi tE janO'sitaH kathaM punaH karma karOti mOhitaH||30||

tvanmAyayAddhA jana Iza khaNDitO yadanyadAzAsta RtAtmanO'budhaH| yathA carEdbAlahitaM pitA svayaM tathA tvamEvArhasi naH samIhitum||31||

maitrEya uvAca

ityAdirAjEna nutaH sa vizvadRktamAha rAjanmayi bhaktirastu tE| diSTyEdRzI dhIrmayi tE kRtA yayA mAyAM madIyAM tarati sma dustyajAm||32||

tattvaM kuru mayAdiSTamapramattaH prajApatE| madAdEzakarO lOkaH sarvatrApnOti zObhanam||33||

maitrEya uvAca

iti vainyasya rAjarSEH pratinandyArthavadvacaH| pUjitO'nugRhItvainaM gantuM cakrE'cyutO matim||34||

dEvarSipitRgandharva siddhacAraNapannagAH| kinnarApsarasO martyAH khagA bhUtAnyanEkazaH||35||

yajJEzvaradhiyA rAjJA vAgvittAJjalibhaktitaH| sabhAjitA yayuH sarvE vaikuNThAnugatAstataH||36||

bhagavAnapi rAjarSEH sOpAdhyAyasya cAcyutaH| haranniva manO'muSya svadhAma pratyapadyata||37||

adRSTAya namaskRtya nRpaH sandarzitAtmanE avyaktAya ca dEvAnAM dEvAya svapuraM yayau||38||

||iti zrImadbhAgavatE mahApurANE pAramahaMsyAM saMhitAyAM caturthaskandhE viMzO'dhyAyaH||

See Also

• http://vedabase.net/sb/4/20/en