From StotraSamhita
< Bhagavatam | Skandha 10
SaTSaSTitamO'dhyAyaH
zrIzuka uvAca
nandavrajaM gatE rAmE karUSAdhipatirnRpa| vAsudEvO'hamityajJO dUtaM kRSNAya prAhiNOt||1|| |
tvaM vAsudEvO bhagavAnavatIRnO jagatpatiH| iti prastObhitO bAlairmEna AtmAnamacyutam||2|| |
dUtaM ca prAhiNOnmandaH kRSNAyAvyaktavartmanE| dvArakAyAM yathA bAlO nRpO bAlakRtO'budhaH||3|| |
dUtastu dvArakAmEtya sabhAyAmAsthitaM prabhum| kRSNaM kamalapatrAkSaM rAjasandEzamabravIt||4|| |
vAsudEvO'vatIrnO'hamEka Eva na cAparaH| bhUtAnAmanukampArthaM tvaM tu mithyAbhidhAM tyaja||5|| |
yAni tvamasmaccihnAni mauDhyAdbibharSi sAtvata| tyaktvaihi mAM tvaM zaraNaM nO cEddEhi mamAhavam||6|| |
zrIzuka uvAca
katthanaM tadupAkarNya pauNDrakasyAlpamEdhasaH| ugrasEnAdayaH sabhyA uccakairjahasustadA||7|| |
uvAca dUtaM bhagavAnparihAsakathAmanu| utsrakSyE mUDha cihnAni yaistvamEvaM vikatthasE||8|| |
mukhaM tadapidhAyAjJa kaGkagRdhravaTairvRtaH| zayiSyasE hatastatra bhavitA zaraNaM zunAm||9|| |
iti dUtastamAkSEpaM svAminE sarvamAharat| kRSNO'pi rathamAsthAya kAzImupajagAma ha||10|| |
pauNDrakO'pi tadudyOgamupalabhya mahArathaH| akSauhiNIbhyAM saMyuktO nizcakrAma purAddrutam||11|| |
tasya kAzIpatirmitraM pArSNigrAhO'nvayAnnRpa| akSauhiNIbhistisRbhirapazyatpauNDrakaM hariH||12|| |
zaGkhAryasigadAzArGga zrIvatsAdyupalakSitam| bibhrANaM kaustubhamaNiM vanamAlAvibhUSitam||13|| |
kauzEyavAsasI pItE vasAnaM garuDadhvajam| amUlyamaulyAbharaNaM sphuranmakarakuNDalam||14|| |
dRSTvA tamAtmanastulyaM vESaM kRtrimamAsthitam| yathA naTaM raGgagataM vijahAsa bhRzaM harIH||15|| |
zulairgadAbhiH parighaiH zaktyRSTiprAsatOmaraiH| asibhiH paTTizairbANaiH prAharannarayO harim||16|| |
kRSNastu tatpauNDrakakAzirAjayOr balaM gajasyandanavAjipattimat| gadAsicakrESubhirArdayadbhRzaM yathA yugAntE hutabhukpRthakprajAH||17|| |
AyOdhanaM tadrathavAjikuJjara dvipatkharOSTrairariNAvakhaNDitaiH| babhau citaM mOdavahaM manasvinAmAkrIDanaM bhUtapatErivOlbaNam||18|| |
athAha pauNDrakaM zaurirbhO bhO pauNDraka yadbhavAn| dUtavAkyEna mAmAha tAnyastraNyutsRjAmi tE||19|| |
tyAjayiSyE'bhidhAnaM mE yattvayAjJa mRSA dhRtam| vrajAmi zaranaM tE'dya yadi nEcchAmi saMyugam||20|| |
iti kSiptvA zitairbANairvirathIkRtya pauNDrakam| zirO'vRzcadrathAGgEna vajrENEndrO yathA girEH||21|| |
tathA kAzIpatEH kAyAcchira utkRtya patribhiH| nyapAtayatkAzIpuryAM padmakOzamivAnilaH||22|| |
EvaM matsariNamhatvA pauNDrakaM sasakhaM hariH| dvArakAmAvizatsiddhairgIyamAnakathAmRtaH||23|| |
sa nityaM bhagavaddhyAna pradhvastAkhilabandhanaH| bibhrANazca harE rAjansvarUpaM tanmayO'bhavat||24|| |
ziraH patitamAlOkya rAjadvArE sakuNDalam| kimidaM kasya vA vaktramiti saMzizirE janAH||25|| |
rAjJaH kAzIpatErjJAtvA mahiSyaH putrabAndhavAH| paurAzca hA hatA rAjannAtha nAthEti prArudan||26|| |
sudakSiNastasya sutaH kRtvA saMsthAvidhiM patEH| nihatya pitRhantAraM yAsyAmyapacitiM pituH||27|| |
ityAtmanAbhisandhAya sOpAdhyAyO mahEzvaram| sudakSiNO'rcayAmAsa paramENa samAdhinA||28|| |
prItO'vimuktE bhagavAMstasmai varamadAdvibhuH| pitRhantRvadhOpAyaM sa vavrE varamIpsitam||29|| |
dakSiNAgniM paricara brAhmaNaiH samamRtvijam| abhicAravidhAnEna sa cAgniH pramathairvRtaH||30|| |
sAdhayiSyati saGkalpamabrahmaNyE prayOjitaH| ityAdiSTastathA cakrE kRSNAyAbhicaranvratI||31|| |
tatO'gnirutthitaH kuNDAnmUrtimAnatibhISaNaH| taptatAmrazikhAzmazruraGgArOdgArilOcanaH||32|| |
daMSTrOgrabhrukuTIdaNDa kaThOrAsyaH svajihvayA| AlihansRkvaNI nagnO vidhunvaMstrizikhaM jvalat||33|| |
padbhyAM tAlapramANAbhyAM kampayannavanItalam| sO'bhyadhAvadvRtO bhUtairdvArakAM pradahandizaH||34|| |
tamAbhicAradahanamAyAntaM dvArakaukasaH| vilOkya tatrasuH sarvE vanadAhE mRgA yathA||35|| |
akSaiH sabhAyAM krIDantaM bhagavantaM bhayAturAH| trAhi trAhi trilOkEza vahnEH pradahataH puram||36|| |
zrutvA tajjanavaiklavyaM dRSTvA svAnAM ca sAdhvasam| zaraNyaH samprahasyAha mA bhaiSTEtyavitAsmyaham||37|| |
sarvasyAntarbahiHsAkSI kRtyAM mAhEzvarIM vibhuH| vijJAya tadvighAtArthaM pArzvasthaM cakramAdizat||38|| |
tatsUryakOTipratimaM sudarzanaM jAjvalyamAnaM pralayAnalaprabham| svatEjasA khaM kakubhO'tha rOdasI cakraM mukundAstram athAgnimArdayat||39|| |
kRtyAnalaH pratihataH sa rathAngapANEr astraujasA sa nRpa bhagnamukhO nivRttaH| vArANasIM parisamEtya sudakSiNaM taM sartvigjanaM samadahatsvakRtO'bhicAraH||40|| |
cakraM ca viSNOstadanupraviSTaM vArAnasIM sATTasabhAlayApaNAm| sagOpurATTAlakakOSThasaGkulAM sakOzahastyazvarathAnnazAlinIm||41|| |
dagdhvA vArANasIM sarvAM viSNOzcakraM sudarzanam| bhUyaH pArzvamupAtiSThatkRSNasyAkliSTakarmaNaH||42|| |
ya EnaM zrAvayEnmartya uttamaHzlOkavikramam samAhitO vA zRNuyAtsarvapApaiH pramucyatE||43|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE SaTSaSTitamO'dhyAyaH||
