From StotraSamhita

dwitIyO'dhyAyaH

zrIbAdarAyaNiruvAca

EvaM tE bhagavaddUtA yamadUtAbhibhASitam| upadhAryAtha tAnrAjanpratyAhurnayakOvidAH||1||

zrIviSNudUtA UcuH

ahO kaSTaM dharmadRzAmadharmaH spRzatE sabhAm| yatrAdaNDyESvapApESu daNDO yairdhriyatE vRthA||2||

prajAnAM pitarO yE ca zAstAraH sAdhavaH samAH| yadi syAttESu vaiSamyaM kaM yAnti zaraNaM prajAH||3||

yadyadAcarati zrEyAnitarastattadIhatE| sa yatpramANaM kurutE lOkastadanuvartatE||4||

yasyAGkE zira AdhAya lOkaH svapiti nirvRtaH| svayaM dharmamadharmaM vA na hi vEda yathA pazuH||5||

sa kathaM nyarpitAtmAnaM kRtamaitramacEtanam| visrambhaNIyO bhUtAnAM saghRNO dOgdhumarhati||6||

ayaM hi kRtanirvEzO janmakOTyaMhasAmapi| yadvyAjahAra vivazO nAma svastyayanaM harEH||7||

EtEnaiva hyaghOnO'sya kRtaM syAdaghaniSkRtam| yadA nArAyaNAyEti jagAda caturakSaram||8||

stEnaH surApO mitradhrugbrahmahA gurutalpagaH| strIrAjapitRgOhantA yE ca pAtakinO'parE||9||

sarvESAmapyaghavatAmidamEva suniSkRtam| nAmavyAharaNaM viSNOryatastadviSayA matiH||10||

na niSkRtairuditairbrahmavAdibhistathA vizuddhyatyaghavAnvratAdibhiH| yathA harErnAmapadairudAhRtaistaduttamazlOkaguNOpalambhakam||11||

naikAntikaM taddhi kRtE'pi niSkRtE manaH punardhAvati cEdasatpathE| tatkarmanirhAramabhIpsatAM harErguNAnuvAdaH khalu sattvabhAvanaH||12||

athainaM mApanayata kRtAzESAghaniSkRtam| yadasau bhagavannAma mriyamANaH samagrahIt||13||

sAGkEtyaM pArihAsyaM vA stObhaM hElanamEva vA| vaikuNThanAmagrahaNamazESAghaharaM viduH||14||

patitaH skhalitO bhagnaH sandaSTastapta AhataH| harirityavazEnAha pumAnnArhati yAtanAH||15||

gurUNAM ca laghUnAM ca gurUNi ca laghUni ca| prAyazcittAni pApAnAM jJAtvOktAni maharSibhiH||16||

taistAnyaghAni pUyantE tapOdAnavratAdibhiH| nAdharmajaM taddhRdayaM tadapIzAGghrisEvayA||17||

ajJAnAdathavA jJAnAduttamazlOkanAma yat| saGkIrtitamaghaM puMsO dahEdEdhO yathAnalaH||18||

yathAgadaM vIryatamamupayuktaM yadRcchayA| ajAnatO'pyAtmaguNaM kuryAnmantrO'pyudAhRtaH||19||

zrIzuka uvAca

ta EvaM suvinirNIya dharmaM bhAgavataM nRpa| taM yAmyapAzAnnirmucya vipraM mRtyOramUmucan||20||

iti pratyuditA yAmyA dUtA yAtvA yamAntikam| yamarAjJE yathA sarvamAcacakSurarindama||21||

dvijaH pAzAdvinirmuktO gatabhIH prakRtiM gataH| vavandE zirasA viSNOH kiGkarAndarzanOtsavaH||22||

taM vivakSumabhiprEtya mahApuruSakiGkarAH| sahasA pazyatastasya tatrAntardadhirE'nagha||23||

ajAmilO'pyathAkarNya dUtAnAM yamakRSNayOH| dharmaM bhAgavataM zuddhaM traivEdyaM ca guNAzrayam||24||

bhaktimAnbhagavatyAzu mAhAtmyazravaNAddharEH| anutApO mahAnAsItsmaratO'zubhamAtmanaH||25||

ahO mE paramaM kaSTamabhUdavijitAtmanaH| yEna viplAvitaM brahma vRSalyAM jAyatAtmanA||26||

dhiGmAM vigarhitaM sadbhirduSkRtaM kulakajjalam| hitvA bAlAM satIM yO'haM surApImasatImagAm||27||

vRddhAvanAthau pitarau nAnyabandhU tapasvinau| ahO mayAdhunA tyaktAvakRtajJEna nIcavat||28||

sO'haM vyaktaM patiSyAmi narakE bhRzadAruNE| dharmaghnAH kAminO yatra vindanti yamayAtanAH||29||

kimidaM svapna AhO svitsAkSAddRSTamihAdbhutam| kva yAtA adya tE yE mAM vyakarSanpAzapANayaH||30||

atha tE kva gatAH siddhAzcatvArazcArudarzanAH| vyAmOcayannIyamAnaM baddhvA pAzairadhO bhuvaH||31||

athApi mE durbhagasya vibudhOttamadarzanE| bhavitavyaM maGgalEna yEnAtmA mE prasIdati||32||

anyathA mriyamANasya nAzucErvRSalIpatEH| vaikuNThanAmagrahaNaM jihvA vaktumihArhati||33||

kva cAhaM kitavaH pApO brahmaghnO nirapatrapaH| kva ca nArAyaNEtyEtadbhagavannAma maGgalam||34||

sO'haM tathA yatiSyAmi yatacittEndriyAnilaH| yathA na bhUya AtmAnamandhE tamasi majjayE||35||

vimucya tamimaM bandhamavidyAkAmakarmajam| sarvabhUtasuhRcchAntO maitraH karuNa AtmavAn||36||

mOcayE grastamAtmAnaM yOSinmayyAtmamAyayA| vikrIDitO yayaivAhaM krIDAmRga ivAdhamaH||37||

mamAhamiti dEhAdau hitvAmithyArthadhIrmatim| dhAsyE manO bhagavati zuddhaM tatkIrtanAdibhiH||38||

zrIzuka uvAca

iti jAtasunirvEdaH kSaNasaGgEna sAdhuSu| gaGgAdvAramupEyAya muktasarvAnubandhanaH||39||

sa tasmindEvasadana AsInO yOgamAsthitaH| pratyAhRtEndriyagrAmO yuyOja mana Atmani||40||

tatO guNEbhya AtmAnaM viyujyAtmasamAdhinA| yuyujE bhagavaddhAmni brahmaNyanubhavAtmani||41||

yarhyupAratadhIstasminnadrAkSItpuruSAnpuraH| upalabhyOpalabdhAnprAgvavandE zirasA dvijaH||42||

hitvA kalEvaraM tIrthE gaGgAyAM darzanAdanu| sadyaH svarUpaM jagRhE bhagavatpArzvavartinAm||43||

sAkaM vihAyasA viprO mahApuruSakiGkaraiH| haimaM vimAnamAruhya yayau yatra zriyaH patiH||44||

EvaM sa viplAvitasarvadharmA dAsyAH patiH patitO garhyakarmaNA| nipAtyamAnO nirayE hatavrataH sadyO vimuktO bhagavannAma gRhNan||45||

nAtaH paraM karmanibandhakRntanaM mumukSatAM tIrthapadAnukIrtanAt| na yatpunaH karmasu sajjatE manO rajastamObhyAM kalilaM tatO'nyathA||46||

ya EtaM paramaM guhyamitihAsamaghApaham| zRNuyAcchraddhayA yuktO yazca bhaktyAnukIrtayEt||47||

na vai sa narakaM yAti nEkSitO yamakiGkaraiH| yadyapyamaGgalO martyO viSNulOkE mahIyatE||48||

mriyamANO harErnAma gRNanputrOpacAritam ajAmilO'pyagAddhAma kimuta zraddhayA gRNan||49||

||iti zrImadbhAgavatE mahApurANE pAramahaMsyAM saMhitAyAM SaSThaskandhE dwitIyO'dhyAyaH||

See Also

• http://vedabase.net/sb/6/2/en