From StotraSamhita
< Bhagavatam | Skandha 10
paJcadazO'dhyAyaH
zrIzuka uvAca
tatazca paugaNDavayaHzrItau vrajE babhUvatustau pazupAlasammatau| gAzcArayantau sakhibhiH samaM padair vRndAvanaM puNyamatIva cakratuH||1|| |
tanmAdhavO vENumudIrayanvRtO gOpairgRNadbhiH svayazO balAnvitaH| pazUnpuraskRtya pazavyamAvizadvihartukAmaH kusumAkaraM vanam||2|| |
tanmaJjughOSAlimRgadvijAkulaM mahanmanaHprakhyapayaHsarasvatA| vAtEna juSTaM zatapatragandhinA nirIkSya rantuM bhagavAnmanO dadhE||3|| |
sa tatra tatrAruNapallavazriyA phalaprasUnOrubharENa pAdayOH| spRzacchikhAnvIkSya vanaspatInmudA smayannivAhAgrajamAdipUruSaH||4|| |
zrIbhagavAnuvAca
ahO amI dEvavarAmarArcitaM pAdAmbujaM tE sumanaHphalArhaNam| namantyupAdAya zikhAbhirAtmanastamO'pahatyai tarujanma yatkRtam||5|| |
EtE'linastava yazO'khilalOkatIrthaM gAyanta AdipuruSAnupathaM bhajantE| prAyO amI munigaNA bhavadIyamukhyA gUDhaM vanE'pi na jahatyanaghAtmadaivam||6|| |
nRtyantyamI zikhina IDya mudA hariNyaH kurvanti gOpya iva tE priyamIkSaNEna| sUktaizca kOkilagaNA gRhamAgatAya dhanyA vanaukasa iyAnhi satAM nisargaH||7|| |
dhanyEyamadya dharaNI tRNavIrudhastvat pAdaspRzO drumalatAH karajAbhimRSTAH| nadyO'drayaH khagamRgAH sadayAvalOkair gOpyO'ntarENa bhujayOrapi yatspRhA zrIH||8|| |
zrIzuka uvAca
EvaM vRndAvanaM zrImatkRSNaH prItamanAH pazUn| rEmE saJcArayannadrEH saridrOdhaHsu sAnugaH||9|| |
kvacidgAyati gAyatsu madAndhAliSvanuvrataiH| upagIyamAnacaritaH pathi saGkarSaNAnvitaH||10|| |
anujalpati jalpantaM kalavAkyaiH zukaM kvacit kvacitsavalgu kUjantamanukUjati kOkilam| kvacicca kAlahaMsAnAmanukUjati kUjitam abhinRtyati nRtyantaM barhiNaM hAsayankvacit||11|| |
mEghagambhIrayA vAcA nAmabhirdUragAnpazUn| kvacidAhvayati prItyA gOgOpAlamanOjJayA||12|| |
cakOrakrauJcacakrAhva bhAradvAjAMzca barhiNaH| anurauti sma sattvAnAM bhItavadvyAghrasiMhayOH||13|| |
kvacitkrIDAparizrAntaM gOpOtsaGgOpabarhaNam| svayaM vizramayatyAryaM pAdasaMvAhanAdibhiH||14|| |
nRtyatO gAyataH kvApi valgatO yudhyatO mithaH| gRhItahastau gOpAlAnhasantau prazazaMsatuH||15|| |
kvacitpallavatalpESu niyuddhazramakarzitaH| vRkSamUlAzrayaH zEtE gOpOtsaGgOpabarhaNaH||16|| |
pAdasaMvAhanaM cakruH kEcittasya mahAtmanaH| aparE hatapApmAnO vyajanaiH samavIjayan||17|| |
anyE tadanurUpANi manOjJAni mahAtmanaH| gAyanti sma mahArAja snEhaklinnadhiyaH zanaiH||18|| |
EvaM nigUDhAtmagatiH svamAyayA gOpAtmajatvaM caritairviDambayan| rEmE ramAlAlitapAdapallavO grAmyaiH samaM grAmyavadIzacESTitaH||19|| |
zrIdAmA nAma gOpAlO rAmakEzavayOH sakhA| subalastOkakRSNAdyA gOpAH prEmNEdamabruvan||20|| |
rAma rAma mahAbAhO kRSNa duSTanibarhaNa| itO'vidUrE sumahadvanaM tAlAlisaGkulam||21|| |
phalAni tatra bhUrINi patanti patitAni ca| santi kintvavaruddhAni dhEnukEna durAtmanA||22|| |
sO'tivIryO'surO rAma hE kRSNa khararUpadhRk| AtmatulyabalairanyairjJAtibhirbahubhirvRtaH||23|| |
tasmAtkRtanarAhArAdbhItairnRbhiramitrahan| na sEvyatE pazugaNaiH pakSisaGghairvivarjitam||24|| |
vidyantE'bhuktapUrvANi phalAni surabhINi ca| ESa vai surabhirgandhO viSUcInO'vagRhyatE||25|| |
prayaccha tAni naH kRSNa gandhalObhitacEtasAm| vAJchAsti mahatI rAma gamyatAM yadi rOcatE||26|| |
EvaM suhRdvacaH zrutvA suhRtpriyacikIrSayA| prahasya jagmaturgOpairvRtau tAlavanaM prabhU||27|| |
balaH pravizya bAhubhyAM tAlAnsamparikampayan| phalAni pAtayAmAsa mataGgaja ivaujasA||28|| |
phalAnAM patatAM zabdaM nizamyAsurarAsabhaH| abhyadhAvatkSititalaM sanagaM parikampayan||29|| |
samEtya tarasA pratyagdvAbhyAM padbhyAM balaM balI| nihatyOrasi kAzabdaM muJcanparyasaratkhalaH||30|| |
punarAsAdya saMrabdha upakrOSTA parAksthitaH| caraNAvaparau rAjanbalAya prAkSipadruSA||31|| |
sa taM gRhItvA prapadOrbhrAmayitvaikapANinA| cikSEpa tRNarAjAgrE bhrAmaNatyaktajIvitam||32|| |
tEnAhatO mahAtAlO vEpamAnO bRhacchirAH| pArzvasthaM kampayanbhagnaH sa cAnyaM sO'pi cAparam||33|| |
balasya lIlayOtsRSTa kharadEhahatAhatAH| tAlAzcakampirE sarvE mahAvAtEritA iva||34|| |
naitaccitraM bhagavati hyanantE jagadIzvarE| OtaprOtamidaM yasmiMstantuSvaGga yathA paTaH||35|| |
tataH kRSNaM ca rAmaM ca jJAtayO dhEnukasya yE| krOSTArO'bhyadravansarvE saMrabdhA hatabAndhavAH||36|| |
tAMstAnApatataH kRSNO rAmazca nRpa lIlayA| gRhItapazcAccaraNAnprAhiNOttRNarAjasu||37|| |
phalaprakarasaGkIrNaM daityadEhairgatAsubhiH| rarAja bhUH satAlAgrairghanairiva nabhastalam||38|| |
tayOstatsumahatkarma nizamya vibudhAdayaH| mumucuH puSpavarSANi cakrurvAdyAni tuSTuvuH||39|| |
atha tAlaphalAnyAdanmanuSyA gatasAdhvasAH| tRNaM ca pazavazcErurhatadhEnukakAnanE||40|| |
kRSNaH kamalapatrAkSaH puNyazravaNakIrtanaH| stUyamAnO'nugairgOpaiH sAgrajO vrajamAvrajat||41|| |
taM gOrajazchuritakuntalabaddhabarha vanyaprasUnarucirEkSaNacAruhAsam| vENumkvaNantamanugairupagItakIrtiM gOpyO didRkSitadRzO'bhyagamansamEtAH||42|| |
pItvA mukundamukhasAraghamakSibhRGgais tApaM jahurvirahajaM vrajayOSitO'hni| tatsatkRtiM samadhigamya vivEza gOSThaM savrIDahAsavinayaM yadapAGgamOkSam||43|| |
tayOryazOdArOhiNyau putrayOH putravatsalE| yathAkAmaM yathAkAlaM vyadhattAM paramAziSaH||44|| |
gatAdhvAnazramau tatra majjanOnmardanAdibhiH| nIvIM vasitvA rucirAM divyasraggandhamaNDitau||45|| |
jananyupahRtaM prAzya svAdyannamupalAlitau| saMvizya varazayyAyAM sukhaM suSupaturvrajE||46|| |
EvaM sa bhagavAnkRSNO vRndAvanacaraH kvacit| yayau rAmamRtE rAjankAlindIM sakhibhirvRtaH||47|| |
atha gAvazca gOpAzca nidAghAtapapIDitAH| duSTaM jalaM papustasyAstRSNArtA viSadUSitam||48|| |
viSAmbhastadupaspRzya daivOpahatacEtasaH| nipEturvyasavaH sarvE salilAntE kurUdvaha||49|| |
vIkSya tAnvai tathAbhUtAnkRSNO yOgEzvarEzvaraH| IkSayAmRtavarSiNyA svanAthAnsamajIvayat||50|| |
tE sampratItasmRtayaH samutthAya jalAntikAt| AsansuvismitAH sarvE vIkSamANAH parasparam||51|| |
anvamaMsata tadrAjangOvindAnugrahEkSitam pItvA viSaM parEtasya punarutthAnamAtmanaH||52|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE paJcadazO'dhyAyaH||
