From StotraSamhita

paJcamO'dhyAyaH

zrIzuka uvAca

rAjannuditamEtattE harEH karmAghanAzanam| gajEndramOkSaNaM puNyaM raivataM tvantaraM zRNu||1||

paJcamO raivatO nAma manustAmasasOdaraH| balivindhyAdayastasya sutA hArjunapUrvakAH||2||

vibhurindraH suragaNA rAjanbhUtarayAdayaH| hiraNyarOmA vEdazirA UrdhvabAhvAdayO dvijAH||3||

patnI vikuNThA zubhrasya vaikuNThaiH surasattamaiH| tayOH svakalayA jajJE vaikuNThO bhagavAnsvayam||4||

vaikuNThaH kalpitO yEna lOkO lOkanamaskRtaH| ramayA prArthyamAnEna dEvyA tatpriyakAmyayA||5||

tasyAnubhAvaH kathitO guNAzca paramOdayAH| bhaumAnrENUnsa vimamE yO viSNOrvarNayEdguNAn||6||

SaSThazca cakSuSaH putrazcAkSuSO nAma vai manuH| pUrupUruSasudyumna pramukhAzcAkSuSAtmajAH||7||

indrO mantradrumastatra dEvA ApyAdayO gaNAH| munayastatra vai rAjanhaviSmadvIrakAdayaH||8||

tatrApi dEvasambhUtyAM vairAjasyAbhavatsutaH| ajitO nAma bhagavAnaMzEna jagataH patiH||9||

payOdhiM yEna nirmathya surANAM sAdhitA sudhA| bhramamANO'mbhasi dhRtaH kUrmarUpENa mandaraH||10||

zrIrAjOvAca

yathA bhagavatA brahmanmathitaH kSIrasAgaraH| yadarthaM vA yatazcAdriM dadhArAmbucarAtmanA||11||

yathAmRtaM suraiH prAptaM kiM cAnyadabhavattataH| EtadbhagavataH karma vadasva paramAdbhutam||12||

tvayA saGkathyamAnEna mahimnA sAtvatAM patEH| nAtitRpyati mE cittaM suciraM tApatApitam||13||

zrIsUta uvAca

sampRSTO bhagavAnEvaM dvaipAyanasutO dvijAH| abhinandya harErvIryamabhyAcaSTuM pracakramE||14||

zrIzuka uvAca

yadA yuddhE'surairdEvA badhyamAnAH zitAyudhaiH| gatAsavO nipatitA nOttiSThEransma bhUrizaH||15||

yadA durvAsaH zApEna sEndrA lOkAstrayO nRpa| niHzrIkAzcAbhavaMstatra nEzurijyAdayaH kriyAH||16||

nizAmyaitatsuragaNA mahEndravaruNAdayaH| nAdhyagacchansvayaM mantrairmantrayantO vinizcitam||17||

tatO brahmasabhAM jagmurmErOrmUrdhani sarvazaH| sarvaM vijJApayAM cakruH praNatAH paramESThinE||18||

sa vilOkyEndravAyvAdInniHsattvAnvigataprabhAn| lOkAnamaGgalaprAyAnasurAnayathA vibhuH||19||

samAhitEna manasA saMsmaranpuruSaM param| uvAcOtphullavadanO dEvAnsa bhagavAnparaH||20||

ahaM bhavO yUyamathO'surAdayO manuSyatiryagdrumagharmajAtayaH| yasyAvatArAMzakalAvisarjitA vrajAma sarvE zaraNaM tamavyayam||21||

na yasya vadhyO na ca rakSaNIyO nOpEkSaNIyAdaraNIyapakSaH| tathApi sargasthitisaMyamArthaM dhattE rajaHsattvatamAMsi kAlE||22||

ayaM ca tasya sthitipAlanakSaNaH sattvaM juSANasya bhavAya dEhinAm| tasmAdvrajAmaH zaraNaM jagadguruM svAnAM sa nO dhAsyati zaM surapriyaH||23||

zrIzuka uvAca

ityAbhASya surAnvEdhAH saha dEvairarindama| ajitasya padaM sAkSAjjagAma tamasaH param||24||

tatrAdRSTasvarUpAya zrutapUrvAya vai prabhuH| stutimabrUta daivIbhirgIrbhistvavahitEndriyaH||25||

zrIbrahmOvAca

avikriyaM satyamanantamAdyaM guhAzayaM niSkalamapratarkyam| manO'grayAnaM vacasAniruktaM namAmahE dEvavaraM varENyam||26||

vipazcitaM prANamanOdhiyAtmanAmarthEndriyAbhAsamanidramavraNam| chAyAtapau yatra na gRdhrapakSau tamakSaraM khaM triyugaM vrajAmahE||27||

ajasya cakraM tvajayEryamANaM manOmayaM paJcadazAramAzu| trinAbhi vidyuccalamaSTanEmi yadakSamAhustamRtaM prapadyE||28||

ya EkavarNaM tamasaH paraM tadalOkamavyaktamanantapAram| AsAM cakArOpasuparNamEnamupAsatE yOgarathEna dhIrAH||29||

na yasya kazcAtititarti mAyAM yayA janO muhyati vEda nArtham| taM nirjitAtmAtmaguNaM parEzaM namAma bhUtESu samaM carantam||30||

imE vayaM yatpriyayaiva tanvA sattvEna sRSTA bahirantarAviH| gatiM na sUkSmAmRSayazca vidmahE kutO'surAdyA itarapradhAnAH||31||

pAdau mahIyaM svakRtaiva yasya caturvidhO yatra hi bhUtasargaH| sa vai mahApUruSa AtmatantraH prasIdatAM brahma mahAvibhUtiH||32||

ambhastu yadrEta udAravIryaM sidhyanti jIvantyuta vardhamAnAH| lOkA yatO'thAkhilalOkapAlAH prasIdatAM naH sa mahAvibhUtiH||33||

sOmaM manO yasya samAmananti divaukasAM yO balamandha AyuH| IzO nagAnAM prajanaH prajAnAM prasIdatAM naH sa mahAvibhUtiH||34||

agnirmukhaM yasya tu jAtavEdA jAtaH kriyAkANDanimittajanmA| antaHsamudrE'nupacansvadhAtUnprasIdatAM naH sa mahAvibhUtiH||35||

yaccakSurAsIttaraNirdEvayAnaM trayImayO brahmaNa ESa dhiSNyam| dvAraM ca muktEramRtaM ca mRtyuH prasIdatAM naH sa mahAvibhUtiH||36||

prANAdabhUdyasya carAcarANAM prANaH sahO balamOjazca vAyuH| anvAsma samrAjamivAnugA vayaM prasIdatAM naH sa mahAvibhUtiH||37||

zrOtrAddizO yasya hRdazca khAni prajajJirE khaM puruSasya nAbhyAH| prANEndriyAtmAsuzarIrakEtaH prasIdatAM naH sa mahAvibhUtiH||38||

balAnmahEndrastridazAH prasAdAnmanyOrgirIzO dhiSaNAdviriJcaH| khEbhyastu chandAMsyRSayO mEDhrataH kaH prasIdatAM naH sa mahAvibhUtiH||39||

zrIrvakSasaH pitarazchAyayAsandharmaH stanAditaraH pRSThatO'bhUt| dyauryasya zIrSNO'psarasO vihArAtprasIdatAM naH sa mahAvibhUtiH||40||

viprO mukhAdbrahma ca yasya guhyaM rAjanya AsIdbhujayOrbalaM ca| UrvOrviDOjO'GghriravEdazUdrau prasIdatAM naH sa mahAvibhUtiH||41||

lObhO'dharAtprItiruparyabhUddyutirnastaH pazavyaH sparzEna kAmaH| bhruvOryamaH pakSmabhavastu kAlaH prasIdatAM naH sa mahAvibhUtiH||42||

dravyaM vayaH karma guNAnvizESaM yadyOgamAyAvihitAnvadanti| yaddurvibhAvyaM prabudhApabAdhaM prasIdatAM naH sa mahAvibhUtiH||43||

namO'stu tasmA upazAntazaktayE svArAjyalAbhapratipUritAtmanE| guNESu mAyAracitESu vRttibhirna sajjamAnAya nabhasvadUtayE||44||

sa tvaM nO darzayAtmAnamasmatkaraNagOcaram| prapannAnAM didRkSUNAM sasmitaM tE mukhAmbujam||45||

taistaiH svEcchAbhUtai rUpaiH kAlE kAlE svayaM vibhO| karma durviSahaM yannO bhagavAMstatkarOti hi||46||

klEzabhUryalpasArANi karmANi viphalAni vA| dEhinAM viSayArtAnAM na tathaivArpitaM tvayi||47||

nAvamaH karmakalpO'pi viphalAyEzvarArpitaH| kalpatE puruSasyaiva sa hyAtmA dayitO hitaH||48||

yathA hi skandhazAkhAnAM tarOrmUlAvasEcanam| EvamArAdhanaM viSNOH sarvESAmAtmanazca hi||49||

namastubhyamanantAya durvitarkyAtmakarmaNE nirguNAya guNEzAya sattvasthAya ca sAmpratam||50||

||iti zrImadbhAgavatE mahApurANE pAramahaMsyAM saMhitAyAM aSTamaskandhE paJcamO'dhyAyaH||

See Also

• http://vedabase.net/sb/8/5/en