From StotraSamhita
< Bhagavatam | Skandha 10
aSTacatvAriMzO'dhyAyaH
zrIzuka uvAca
atha vijJAya bhagavAnsarvAtmA sarvadarzanaH| sairandhryAH kAmataptAyAH priyamicchangRhaM yayau||1|| |
mahArhOpaskarairADhyaM kAmOpAyOpabRMhitam muktAdAmapatAkAbhirvitAnazayanAsanaiH dhUpaiH surabhibhirdIpaiH sraggandhairapi maNDitam||2|| |
gRhaM tamAyAntamavEkSya sAsanAtsadyaH samutthAya hi jAtasambhramA| yathOpasaGgamya sakhIbhiracyutaM sabhAjayAmAsa sadAsanAdibhiH||3|| |
tathOddhavaH sAdhutayAbhipUjitO nyaSIdadurvyAmabhimRzya cAsanam| kRSNO'pi tUrNaM zayanaM mahAdhanaM vivEza lOkAcaritAnyanuvrataH||4|| |
sA majjanAlEpadukUlabhUSaNa sraggandhatAmbUlasudhAsavAdibhiH| prasAdhitAtmOpasasAra mAdhavaM savrIDalIlOtsmitavibhramEkSitaiH||5|| |
AhUya kAntAM navasaGgamahriyA vizaGkitAM kaGkaNabhUSitE karE| pragRhya zayyAmadhivEzya rAmayA rEmE'nulEpArpaNapuNyalEzayA||6|| |
sAnaGgataptakucayOrurasastathAkSNOr jighrantyanantacaraNEna rujO mRjantI| dOrbhyAM stanAntaragataM parirabhya kAntam AnandamUrtimajahAdatidIrghatApam||7|| |
saivaM kaivalyanAthaM taM prApya duSprApyamIzvaram| aGgarAgArpaNEnAhO durbhagEdamayAcata||8|| |
sahOSyatAmiha prESTha dinAni katicinmayA| ramasva nOtsahE tyaktuM saGgaM tE'mburuhEkSaNa||9|| |
tasyai kAmavaraM dattvA mAnayitvA ca mAnadaH| sahOddhavEna sarvEzaH svadhAmAgamadRddhimat||10|| |
durArdhyaM samArAdhya viSNuM sarvEzvarEzvaram| yO vRNItE manOgrAhyamasattvAtkumanISyasau||11|| |
akrUrabhavanaM kRSNaH saharAmOddhavaH prabhuH| kiJciccikIrSayanprAgAdakrUraprIyakAmyayA||12|| |
sa tAnnaravarazrESThAnArAdvIkSya svabAndhavAn| pratyutthAya pramuditaH pariSvajyAbhinandya ca||13|| |
nanAma kRSNaM rAmaM ca sa tairapyabhivAditaH| pUjayAmAsa vidhivatkRtAsanaparigrahAn||14|| |
pAdAvanEjanIrApO dhArayanzirasA nRpa| arhaNEnAmbarairdivyairgandhasragbhUSaNOttamaiH||15|| |
arcitvA zirasAnamya pAdAvaGkagatau mRjan| prazrayAvanatO'krUraH kRSNarAmAvabhASata||16|| |
diSTyA pApO hataH kaMsaH sAnugO vAmidaM kulam| bhavadbhyAmuddhRtaM kRcchrAddurantAcca samEdhitam||17|| |
yuvAM pradhAnapuruSau jagaddhEtU jaganmayau| bhavadbhyAM na vinA kiJcitparamasti na cAparam||18|| |
AtmasRSTamidaM vizvamanvAvizya svazaktibhiH| IyatE bahudhA brahmanzru tapratyakSagOcaram||19|| |
yathA hi bhUtESu carAcarESu mahyAdayO yOniSu bhAnti nAnA| EvaM bhavAnkEvala AtmayOniSvAtmAtmatantrO bahudhA vibhAti||20|| |
sRjasyathO lumpasi pAsi vizvaM rajastamaHsattvaguNaiH svazaktibhiH| na badhyasE tadguNakarmabhirvA jJAnAtmanastE kva ca bandhahEtuH||21|| |
dEhAdyupAdhEranirUpitatvAdbhavO na sAkSAnna bhidAtmanaH syAt| atO na bandhastava naiva mOkSaH syAtAmnikAmastvayi nO'vivEkaH||22|| |
tvayOditO'yaM jagatO hitAya yadA yadA vEdapathaH purANaH| bAdhyEta pASaNDapathairasadbhistadA bhavAnsattvaguNaM bibharti||23|| |
sa tvamprabhO'dya vasudEvagRhE'vatIrNaH svAMzEna bhAramapanEtumihAsi bhUmEH| akSauhiNIzatavadhEna surEtarAMza rAjJAmamuSya ca kulasya yazO vitanvan||24|| |
adyEza nO vasatayaH khalu bhUribhAgA yaH sarvadEvapitRbhUtanRdEvamUrtiH| yatpAdazaucasalilaM trijagatpunAti sa tvaM jagadgururadhOkSaja yAH praviSTaH||25|| |
kaH paNDitastvadaparaM zaraNaM samIyAd bhaktapriyAdRtagiraH suhRdaH kRtajJAt| sarvAndadAti suhRdO bhajatO'bhikAmAn AtmAnamapyupacayApacayau na yasya||26|| |
diSTyA janArdana bhavAniha naH pratItO yOgEzvarairapi durApagatiH surEzaiH| chindhyAzu naH sutakalatradhanAptagEha dEhAdimOharazanAM bhavadIyamAyAm||27|| |
ityarcitaH saMstutazca bhaktEna bhagavAnhariH| akrUraM sasmitaM prAha gIrbhiH sammOhayanniva||28|| |
zrIbhagavAnuvAca
tvaM nO guruH pitRvyazca zlAghyO bandhuzca nityadA| vayaM tu rakSyAH pOSyAzca anukampyAH prajA hi vaH||29|| |
bhavadvidhA mahAbhAgA niSEvyA arhasattamAH| zrEyaskAmairnRbhirnityaM dEvAH svArthA na sAdhavaH||30|| |
na hyammayAni tIrthAni na dEvA mRcchilAmayAH| tE punantyurukAlEna darzanAdEva sAdhavaH||31|| |
sa bhavAnsuhRdAM vai naH zrEyAnzrEyazcikIrSayA| jijJAsArthaM pANDavAnAM gacchasva tvaM gajAhvayam||32|| |
pitaryuparatE bAlAH saha mAtrA suduHkhitAH| AnItAH svapuraM rAjJA vasanta iti zuzruma||33|| |
tESu rAjAmbikAputrO bhrAtRputrESu dInadhIH| samO na vartatE nUnaM duSputravazagO'ndhadRk||34|| |
gaccha jAnIhi tadvRttamadhunA sAdhvasAdhu vA| vijJAya tadvidhAsyAmO yathA zaM suhRdAM bhavEt||35|| |
ityakrUraM samAdizya bhagavAnharirIzvaraH saGkarSaNOddhavAbhyAM vai tataH svabhavanaM yayau||36|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE aSTacatvAriMzO'dhyAyaH||
