From StotraSamhita
< Bhagavatam | Skandha 11
saptaviMzO'dhyAyaH
zrIuddhava uvAca
kriyAyOgaM samAcakSva bhavadArAdhanaM prabhO| yasmAttvAM yE yathArcanti sAtvatAH sAtvatarSabha||1|| |
Etadvadanti munayO muhurniHzrEyasaM nRNAm| nAradO bhagavAnvyAsa AcAryO'GgirasaH sutaH||2|| |
niHsRtaM tE mukhAmbhOjAdyadAha bhagavAnajaH| putrEbhyO bhRgumukhyEbhyO dEvyai ca bhagavAnbhavaH||3|| |
Etadvai sarvavarNAnAmAzramANAM ca sammatam| zrEyasAmuttamaM manyE strIzUdrANAM ca mAnada||4|| |
EtatkamalapatrAkSa karmabandhavimOcanam| bhaktAya cAnuraktAya brUhi vizvEzvarEzvara||5|| |
zrIbhagavAnuvAca
na hyantO'nantapArasya karmakANDasya cOddhava| saGkSiptaM varNayiSyAmi yathAvadanupUrvazaH||6|| |
vaidikastAntrikO mizra iti mE trividhO makhaH| trayANAmIpsitEnaiva vidhinA mAM samarcarEt||7|| |
yadA svanigamEnOktaM dvijatvaM prApya pUruSaH| yathA yajEta mAM bhaktyA zraddhayA tannibOdha mE||8|| |
arcAyAM sthaNDilE'gnau vA sUryE vApsu hRdi dvijaH| dravyENa bhaktiyuktO'rcEtsvaguruM mAmamAyayA||9|| |
pUrvaM snAnaM prakurvIta dhautadantO'GgazuddhayE| ubhayairapi ca snAnaM mantrairmRdgrahaNAdinA||10|| |
sandhyOpAstyAdikarmANi vEdEnAcOditAni mE| pUjAM taiH kalpayEtsamyak saGkalpaH karmapAvanIm||11|| |
zailI dArumayI lauhI lEpyA lEkhyA ca saikatI| manOmayI maNimayI pratimASTavidhA smRtA||12|| |
calAcalEti dvividhA pratiSThA jIvamandiram| udvAsAvAhanE na staH sthirAyAmuddhavArcanE||13|| |
asthirAyAM vikalpaH syAtsthaNDilE tu bhavEddvayam| snapanaM tvavilEpyAyAmanyatra parimArjanam||14|| |
dravyaiH prasiddhairmadyAgaH pratimAdiSvamAyinaH| bhaktasya ca yathAlabdhairhRdi bhAvEna caiva hi||15|| |
snAnAlaGkaraNaM prESThamarcAyAmEva tUddhava| sthaNDilE tattvavinyAsO vahnAvAjyaplutaM haviH||16|| |
sUryE cAbhyarhaNaM prESThaM salilE salilAdibhiH| zraddhayOpAhRtaM prESThaM bhaktEna mama vAryapi||17|| |
bhUryapyabhaktOpAhRtaM na mE tOSAya kalpatE| gandhO dhUpaH sumanasO dIpO'nnAdyaM ca kiM punaH||18|| |
zuciH sambhRtasambhAraH prAgdarbhaiH kalpitAsanaH| AsInaH prAgudagvArcEdarcAyAM tvatha sammukhaH||19|| |
kRtanyAsaH kRtanyAsAM madarcAM pANinAmRjEt| kalazaM prOkSaNIyaM ca yathAvadupasAdhayEt||20|| |
tadadbhirdEvayajanaM dravyANyAtmAnamEva ca| prOkSya pAtrANi trINyadbhistaistairdravyaizca sAdhayEt||21|| |
pAdyArghyAcamanIyArthaM trINi pAtrANi dEzikaH| hRdA zIrSNAtha zikhayA gAyatryA cAbhimantrayEt||22|| |
piNDE vAyvagnisaMzuddhE hRtpadmasthAM parAM mama| aNvIM jIvakalAM dhyAyEnnAdAntE siddhabhAvitAm||23|| |
tayAtmabhUtayA piNDE vyAptE sampUjya tanmayaH| AvAhyArcAdiSu sthApya nyastAGgaM mAM prapUjayEt||24|| |
pAdyOpasparzArhaNAdInupacArAnprakalpayEt| dharmAdibhizca navabhiH kalpayitvAsanaM mama||25|| |
padmamaSTadalaM tatra karNikAkEsarOjjvalam| ubhAbhyAM vEdatantrAbhyAM mahyaM tUbhayasiddhayE||26|| |
sudarzanaM pAJcajanyaM gadAsISudhanurhalAn| muSalaM kaustubhaM mAlAM zrIvatsaM cAnupUjayEt||27|| |
nandaM sunandaM garuDaM pracaNDaM caNDaM Eva ca| mahAbalaM balaM caiva kumudaM kamudEkSaNam||28|| |
durgAM vinAyakaM vyAsaM viSvakSEnaM gurUnsurAn| svE svE sthAnE tvabhimukhAnpUjayEtprOkSaNAdibhiH||29|| |
candanOzIrakarpUra kuGkumAguruvAsitaiH| salilaiH snApayEnmantrairnityadA vibhavE sati||30|| |
svarNagharmAnuvAkEna mahApuruSavidyayA| pauruSENApi sUktEna sAmabhI rAjanAdibhiH||31|| |
vastrOpavItAbharaNa patrasraggandhalEpanaiH| alaGkurvIta saprEma madbhaktO mAM yathOcitam||32|| |
pAdyamAcamanIyaM ca gandhaM sumanasO'kSatAn| dhUpadIpOpahAryANi dadyAnmE zraddhayArcakaH||33|| |
guDapAyasasarpIMSi zaSkulyApUpamOdakAn| saMyAvadadhisUpAMzca naivEdyaM sati kalpayEt||34|| |
abhyaGgOnmardanAdarza dantadhAvAbhiSEcanam| annAdyagItanRtyAni parvaNi syurutAnvaham||35|| |
vidhinA vihitE kuNDE mEkhalAgartavEdibhiH| agnimAdhAya paritaH samUhEtpANinOditam||36|| |
paristIryAtha paryukSEdanvAdhAya yathAvidhi| prOkSaNyAsAdya dravyANi prOkSyAgnau bhAvayEta mAm||37|| |
taptajAmbUnadaprakhyaM zaGkhacakragadAmbujaiH| lasaccaturbhujaM zAntaM padmakiJjalkavAsasam||38|| |
sphuratkirITakaTaka kaTisUtravarAGgadam| zrIvatsavakSasaM bhrAjat kaustubhaM vanamAlinam||39|| |
dhyAyannabhyarcya dArUNi haviSAbhighRtAni ca| prAsyAjyabhAgAvAghArau dattvA cAjyaplutaM haviH||40|| |
juhuyAnmUlamantrENa SODazarcAvadAnataH| dharmAdibhyO yathAnyAyaM mantraiH sviSTikRtaM budhaH||41|| |
abhyarcyAtha namaskRtya pArSadEbhyO baliM harEt| mUlamantraM japEdbrahma smarannArAyaNAtmakam||42|| |
dattvAcamanamucchESaM viSvakSEnAya kalpayEt| mukhavAsaM surabhimattAmbUlAdyamathArhayEt||43|| |
upagAyangRNannRtyankarmANyabhinayanmama| matkathAH zrAvayanzRNvanmuhUrtaM kSaNikO bhavEt||44|| |
stavairuccAvacaiH stOtraiH paurANaiH prAkRtairapi| stutvA prasIda bhagavanniti vandEta daNDavat||45|| |
zirO matpAdayOH kRtvA bAhubhyAM ca parasparam| prapannaM pAhi mAmIza bhItaM mRtyugrahArNavAt||46|| |
iti zESAM mayA dattAM zirasyAdhAya sAdaram| udvAsayEccEdudvAsyaM jyOtirjyOtiSi tatpunaH||47|| |
arcAdiSu yadA yatra zraddhA mAM tatra cArcayEt| sarvabhUtESvAtmani ca sarvAtmAhamavasthitaH||48|| |
EvaM kriyAyOgapathaiH pumAnvaidikatAntrikaiH| arcannubhayataH siddhiM mattO vindatyabhIpsitAm||49|| |
madarcAM sampratiSThApya mandiraM kArayEddRDham| puSpOdyAnAni ramyANi pUjAyAtrOtsavAzritAn||50|| |
pUjAdInAM pravAhArthaM mahAparvasvathAnvaham| kSEtrApaNapuragrAmAndattvA matsArSTitAmiyAt||51|| |
pratiSThayA sArvabhaumaM sadmanA bhuvanatrayam| pUjAdinA brahmalOkaM tribhirmatsAmyatAmiyAt||52|| |
mAmEva nairapEkSyENa bhaktiyOgEna vindati| bhaktiyOgaM sa labhata EvaM yaH pUjayEta mAm||53|| |
yaH svadattAM parairdattAM harEta suraviprayOH| vRttiM sa jAyatE viDbhugvarSANAmayutAyutam||54|| |
kartuzca sArathErhEtOranumOditurEva ca karmaNAM bhAginaH prEtya bhUyO bhUyasi tatphalam||55|| |
||iti zrImadbhAgavatE mahApurANE pAramahaMsyAM saMhitAyAM EkAdazaskandhE saptaviMzO'dhyAyaH||
