From StotraSamhita

caturthO'dhyAyaH

uddhava uvAca

atha tE tadanujJAtA bhuktvA pItvA ca vAruNIm| tayA vibhraMzitajJAnA duruktairmarma paspRzuH||1||

tESAM mairEyadOSENa viSamIkRtacEtasAm| nimlOcati ravAvAsIdvENUnAmiva mardanam||2||

bhagavAnsvAtmamAyAyA gatiM tAmavalOkya saH| sarasvatImupaspRzya vRkSamUlamupAvizat||3||

ahaM cOktO bhagavatA prapannArtiharENa ha| badarIM tvaM prayAhIti svakulaM saJjihIrSuNA||4||

tathApi tadabhiprEtaM jAnannahamarindama| pRSThatO'nvagamaM bhartuH pAdavizlESaNAkSamaH||5||

adrAkSamEkamAsInaM vicinvandayitaM patim| zrInikEtaM sarasvatyAM kRtakEtamakEtanam||6||

zyAmAvadAtaM virajaM prazAntAruNalOcanam| dOrbhizcaturbhirviditaM pItakauzAmbarENa ca||7||

vAma UrAvadhizritya dakSiNAGghrisarOruham| apAzritArbhakAzvatthamakRzaM tyaktapippalam||8||

tasminmahAbhAgavatO dvaipAyanasuhRtsakhA| lOkAnanucaransiddha AsasAda yadRcchayA||9||

tasyAnuraktasya munErmukundaH pramOdabhAvAnatakandharasya| AzRNvatO mAmanurAgahAsa samIkSayA vizramayannuvAca||10||

zrIbhagavAnuvAca

vEdAhamantarmanasIpsitaM tE dadAmi yattadduravApamanyaiH| satrE purA vizvasRjAM vasUnAM matsiddhikAmEna vasO tvayESTaH||11||

sa ESa sAdhO caramO bhavAnAmAsAditastE madanugrahO yat| yanmAM nRlOkAnraha utsRjantaM diSTyA dadRzvAnvizadAnuvRttyA||12||

purA mayA prOktamajAya nAbhyE padmE niSaNNAya mamAdisargE| jJAnaM paraM manmahimAvabhAsaM yatsUrayO bhAgavataM vadanti||13||

ityAdRtOktaH paramasya puMsaH pratikSaNAnugrahabhAjanO'ham| snEhOttharOmA skhalitAkSarastaM muJcaJchucaH prAJjalirAbabhASE||14||

kO nvIza tE pAdasarOjabhAjAM sudurlabhO'rthESu caturSvapIha| tathApi nAhaM pravRNOmi bhUmanbhavatpadAmbhOjaniSEvaNOtsukaH||15||

karmANyanIhasya bhavO'bhavasya tE durgAzrayO'thAribhayAtpalAyanam| kAlAtmanO yatpramadAyutAzramaH svAtmanratEH khidyati dhIrvidAmiha||16||

mantrESu mAM vA upahUya yattvamakuNThitAkhaNDasadAtmabOdhaH| pRcchEH prabhO mugdha ivApramattastannO manO mOhayatIva dEva||17||

jJAnaM paraM svAtmarahaHprakAzaM prOvAca kasmai bhagavAnsamagram| api kSamaM nO grahaNAya bhartarvadAJjasA yadvRjinaM tarEma||18||

ityAvEditahArdAya mahyaM sa bhagavAnparaH| AdidEzAravindAkSa AtmanaH paramAM sthitim||19||

sa EvamArAdhitapAdatIrthAdadhItatattvAtmavibOdhamArgaH| praNamya pAdau parivRtya dEvamihAgatO'haM virahAturAtmA||20||

sO'haM taddarzanAhlAda viyOgArtiyutaH prabhO| gamiSyE dayitaM tasya badaryAzramamaNDalam||21||

yatra nArAyaNO dEvO narazca bhagavAnRSiH| mRdu tIvraM tapO dIrghaM tEpAtE lOkabhAvanau||22||

zrIzuka uvAca

ityuddhavAdupAkarNya suhRdAM duHsahaM vadham| jJAnEnAzamayatkSattA zOkamutpatitaM budhaH||23||

sa taM mahAbhAgavataM vrajantaM kauravarSabhaH| vizrambhAdabhyadhattEdaM mukhyaM kRSNaparigrahE||24||

vidura uvAca

jJAnaM paraM svAtmarahaHprakAzaM yadAha yOgEzvara IzvarastE| vaktuM bhavAnnO'rhati yaddhi viSNOrbhRtyAH svabhRtyArthakRtazcaranti||25||

uddhava uvAca

nanu tE tattvasaMrAdhya RSiH kauSAravO'ntikE| sAkSAdbhagavatAdiSTO martyalOkaM jihAsatA||26||

zrIzuka uvAca

iti saha vidurENa vizvamUrtErguNakathayA sudhayA plAvitOrutApaH| kSaNamiva pulinE yamasvasustAM samuSita aupagavirnizAM tatO'gAt||27||

rAjOvAca

nidhanamupagatESu vRSNibhOjESvadhirathayUthapayUthapESu mukhyaH| sa tu kathamavaziSTa uddhavO yaddharirapi tatyaja AkRtiM tryadhIzaH||28||

zrIzuka uvAca

brahmazApApadEzEna kAlEnAmOghavAJchitaH| saMhRtya svakulaM sphItaM tyakSyandEhamacintayat||29||

asmAllOkAduparatE mayi jJAnaM madAzrayam| arhatyuddhava EvAddhA sampratyAtmavatAM varaH||30||

nOddhavO'Nvapi mannyUnO yadguNairnArditaH prabhuH| atO madvayunaM lOkaM grAhayanniha tiSThatu||31||

EvaM trilOkaguruNA sandiSTaH zabdayOninA| badaryAzramamAsAdya harimIjE samAdhinA||32||

vidurO'pyuddhavAcchrutvA kRSNasya paramAtmanaH| krIDayOpAttadEhasya karmANi zlAghitAni ca||33||

dEhanyAsaM ca tasyaivaM dhIrANAM dhairyavardhanam| anyESAM duSkarataraM pazUnAM viklavAtmanAm||34||

AtmAnaM ca kuruzrESTha kRSNEna manasEkSitam| dhyAyangatE bhAgavatE rurOda prEmavihvalaH||35||

kAlindyAH katibhiH siddha ahObhirbharatarSabha prApadyata svaHsaritaM yatra mitrAsutO muniH||36||

||iti zrImadbhAgavatE mahApurANE pAramahaMsyAM saMhitAyAM tRtIyaskandhE caturthO'dhyAyaH||

See Also

• http://vedabase.net/sb/3/4/en