From StotraSamhita

prathamO'dhyAyaH

zrIzuka uvAca

EvamEtatpurA pRSTO maitrEyO bhagavAnkila| kSattrA vanaM praviSTEna tyaktvA svagRhamRddhimat||1||

yadvA ayaM mantrakRdvO bhagavAnakhilEzvaraH| pauravEndragRhaM hitvA pravivEzAtmasAtkRtam||2||

rAjOvAca

kutra kSatturbhagavatA maitrEyENAsa saGgamaH| kadA vA sahasaMvAda EtadvarNaya naH prabhO||3||

na hyalpArthOdayastasya vidurasyAmalAtmanaH| tasminvarIyasi praznaH sAdhuvAdOpabRMhitaH||4||

sUta uvAca

sa EvamRSivaryO'yaM pRSTO rAjJA parIkSitA| pratyAha taM subahuvitprItAtmA zrUyatAmiti||5||

zrIzuka uvAca

yadA tu rAjA svasutAnasAdhUnpuSNanna dharmENa vinaSTadRSTiH| bhrAturyaviSThasya sutAnvibandhUnpravEzya lAkSAbhavanE dadAha||6||

yadA sabhAyAM kurudEvadEvyAH kEzAbhimarzaM sutakarma garhyam| na vArayAmAsa nRpaH snuSAyAH svAsrairharantyAH kucakuGkumAni||7||

dyUtE tvadharmENa jitasya sAdhOH satyAvalambasya vanaM gatasya| na yAcatO'dAtsamayEna dAyaM tamOjuSANO yadajAtazatrOH||8||

yadA ca pArthaprahitaH sabhAyAM jagadgururyAni jagAda kRSNaH| na tAni puMsAmamRtAyanAni rAjOru mEnE kSatapuNyalEzaH||9||

yadOpahUtO bhavanaM praviSTO mantrAya pRSTaH kila pUrvajEna| athAha tanmantradRzAM varIyAnyanmantriNO vaidurikaM vadanti||10||

ajAtazatrOH pratiyaccha dAyaM titikSatO durviSahaM tavAgaH| sahAnujO yatra vRkOdarAhiH zvasanruSA yattvamalaM bibhESi||11||

pArthAMstu dEvO bhagavAnmukundO gRhItavAnsakSitidEvadEvaH| AstE svapuryAM yadudEvadEvO vinirjitAzESanRdEvadEvaH||12||

sa ESa dOSaH puruSadviDAstE gRhAnpraviSTO yamapatyamatyA| puSNAsi kRSNAdvimukhO gatazrIstyajAzvazaivaM kulakauzalAya||13||

ityUcivAMstatra suyOdhanEna pravRddhakOpasphuritAdharENa| asatkRtaH satspRhaNIyazIlaH kSattA sakarNAnujasaubalEna||14||

ka EnamatrOpajuhAva jihmaM dAsyAH sutaM yadbalinaiva puSTaH| tasminpratIpaH parakRtya AstE nirvAsyatAmAzu purAcchvasAnaH||15||

svayaM dhanurdvAri nidhAya mAyAM bhrAtuH purO marmasu tADitO'pi| sa itthamatyulbaNakarNabANairgatavyathO'yAduru mAnayAnaH||16||

sa nirgataH kauravapuNyalabdhO gajAhvayAttIrthapadaH padAni| anvAkramatpuNyacikIrSayOrvyAmadhiSThitO yAni sahasramUrtiH||17||

purESu puNyOpavanAdrikuJjESvapaGkatOyESu saritsaraHsu| anantaliGgaiH samalaGkRtESu cacAra tIrthAyatanESvananyaH||18||

gAM paryaTanmEdhyaviviktavRttiH sadAplutO'dhaH zayanO'vadhUtaH| alakSitaH svairavadhUtavESO vratAni cErE haritOSaNAni||19||

itthaM vrajanbhAratamEva varSaM kAlEna yAvadgatavAnprabhAsam| tAvacchazAsa kSitimEka cakrAmlEkAtapatrAmajitEna pArthaH||20||

tatrAtha zuzrAva suhRdvinaSTiM vanaM yathA vENujavahnisaMzrayam| saMspardhayA dagdhamathAnuzOcansarasvatIM pratyagiyAya tUSNIm||21||

tasyAM tritasyOzanasO manOzca pRthOrathAgnErasitasya vAyOH| tIrthaM sudAsasya gavAM guhasya yacchrAddhadEvasya sa AsiSEvE||22||

anyAni cEha dvijadEvadEvaiH kRtAni nAnAyatanAni viSNOH| pratyaGgamukhyAGkitamandirANi yaddarzanAtkRSNamanusmaranti||23||

tatastvativrajya surASTramRddhaM sauvIramatsyAnkurujAGgalAMzca| kAlEna tAvadyamunAmupEtya tatrOddhavaM bhAgavataM dadarza||24||

sa vAsudEvAnucaraM prazAntaM bRhaspatEH prAktanayaM pratItam| AliGgya gADhaM praNayEna bhadraM svAnAmapRcchadbhagavatprajAnAm||25||

kaccitpurANau puruSau svanAbhya pAdmAnuvRttyEha kilAvatIrNau| AsAta urvyAH kuzalaM vidhAya kRtakSaNau kuzalaM zUragEhE||26||

kaccitkurUNAM paramaH suhRnnO bhAmaH sa AstE sukhamaGga zauriH| yO vai svasNAM pitRvaddadAti varAnvadAnyO varatarpaNEna||27||

kaccidvarUthAdhipatiryadUnAM pradyumna AstE sukhamaGga vIraH| yaM rukmiNI bhagavatO'bhilEbhE ArAdhya viprAnsmaramAdisargE||28||

kaccitsukhaM sAtvatavRSNibhOja dAzArhakANAmadhipaH sa AstE| yamabhyaSiJcacchatapatranEtrO nRpAsanAzAM parihRtya dUrAt||29||

kacciddharEH saumya sutaH sadRkSa AstE'graNI rathinAM sAdhu sAmbaH| asUta yaM jAmbavatI vratADhyA dEvaM guhaM yO'mbikayA dhRtO'grE||30||

kSEmaM sa kaccidyuyudhAna AstE yaH phAlgunAllabdhadhanUrahasyaH| lEbhE'JjasAdhOkSajasEvayaiva gatiM tadIyAM yatibhirdurApAm||31||

kaccidbudhaH svastyanamIva AstE zvaphalkaputrO bhagavatprapannaH| yaH kRSNapAdAGkitamArgapAMsuSvacESTata prEmavibhinnadhairyaH||32||

kaccicchivaM dEvakabhOjaputryA viSNuprajAyA iva dEvamAtuH| yA vai svagarbhENa dadhAra dEvaM trayI yathA yajJavitAnamartham||33||

apisvidAstE bhagavAnsukhaM vO yaH sAtvatAM kAmadughO'niruddhaH| yamAmananti sma hi zabdayOniM manOmayaM sattvaturIyatattvam||34||

apisvidanyE ca nijAtmadaivamananyavRttyA samanuvratA yE| hRdIkasatyAtmajacArudESNa gadAdayaH svasti caranti saumya||35||

api svadOrbhyAM vijayAcyutAbhyAM dharmENa dharmaH paripAti sEtum| duryOdhanO'tapyata yatsabhAyAM sAmrAjyalakSmyA vijayAnuvRttyA||36||

kiM vA kRtAghESvaghamatyamarSI bhImO'hivaddIrghatamaM vyamuJcat| yasyAGghripAtaM raNabhUrna sEhE mArgaM gadAyAzcaratO vicitram||37||

kaccidyazOdhA rathayUthapAnAM gANDIvadhanvOparatArirAstE| alakSitO yaccharakUTagUDhO mAyAkirAtO girizastutOSa||38||

yamAvutasvittanayau pRthAyAH pArthairvRtau pakSmabhirakSiNIva| rEmAta uddAya mRdhE svarikthaM parAtsuparNAviva vajrivaktrAt||39||

ahO pRthApi dhriyatE'rbhakArthE rAjarSivaryENa vinApi tEna| yastvEkavIrO'dhirathO vijigyE dhanurdvitIyaH kakubhazcatasraH||40||

saumyAnuzOcE tamadhaHpatantaM bhrAtrE parEtAya vidudruhE yaH| niryApitO yEna suhRtsvapuryA ahaM svaputrAnsamanuvratEna||41||

sO'haM harErmartyaviDambanEna dRzO nRNAM cAlayatO vidhAtuH| nAnyOpalakSyaH padavIM prasAdAccarAmi pazyangatavismayO'tra||42||

nUnaM nRpANAM trimadOtpathAnAM mahIM muhuzcAlayatAM camUbhiH| vadhAtprapannArtijihIrSayEzO'pyupaikSatAghaM bhagavAnkurUNAm||43||

ajasya janmOtpathanAzanAya karmANyakarturgrahaNAya puMsAm| nanvanyathA kO'rhati dEhayOgaM parO guNAnAmuta karmatantram||44||

tasya prapannAkhilalOkapAnAmavasthitAnAmanuzAsanE svE arthAya jAtasya yaduSvajasya vArtAM sakhE kIrtaya tIrthakIrtEH||45||

||iti zrImadbhAgavatE mahApurANE pAramahaMsyAM saMhitAyAM tRtIyaskandhE prathamO'dhyAyaH||

See Also

• http://vedabase.net/sb/3/1/en