From StotraSamhita

dwitIyO'dhyAyaH

vidura uvAca

bhavE zIlavatAM zrESThE dakSO duhitRvatsalaH| vidvESamakarOtkasmAdanAdRtyAtmajAM satIm||1||

kastaM carAcaraguruM nirvairaM zAntavigraham| AtmArAmaM kathaM dvESTi jagatO daivataM mahat||2||

EtadAkhyAhi mE brahmanjAmAtuH zvazurasya ca| vidvESastu yataH prANAMstatyajE dustyajAnsatI||3||

maitrEya uvAca

purA vizvasRjAM satrE samEtAH paramarSayaH| tathAmaragaNAH sarvE sAnugA munayO'gnayaH||4||

tatra praviSTamRSayO dRSTvArkamiva rOciSA| bhrAjamAnaM vitimiraM kurvantaM tanmahatsadaH||5||

udatiSThansadasyAstE svadhiSNyEbhyaH sahAgnayaH| RtE viriJcAM zarvaM ca tadbhAsAkSiptacEtasaH||6||

sadasaspatibhirdakSO bhagavAnsAdhu satkRtaH| ajaM lOkaguruM natvA niSasAda tadAjJayA||7||

prAGniSaNNaM mRDaM dRSTvA nAmRSyattadanAdRtaH| uvAca vAmaM cakSurbhyAmabhivIkSya dahanniva||8||

zrUyatAM brahmarSayO mE sahadEvAH sahAgnayaH| sAdhUnAM bruvatO vRttaM nAjJAnAnna ca matsarAt||9||

ayaM tu lOkapAlAnAM yazOghnO nirapatrapaH| sadbhirAcaritaH panthA yEna stabdhEna dUSitaH||10||

ESa mE ziSyatAM prAptO yanmE duhituragrahIt| pANiM viprAgnimukhataH sAvitryA iva sAdhuvat||11||

gRhItvA mRgazAvAkSyAH pANiM markaTalOcanaH| pratyutthAnAbhivAdArhE vAcApyakRta nOcitam||12||

luptakriyAyAzucayE mAninE bhinnasEtavE| anicchannapyadAM bAlAM zUdrAyEvOzatIM giram||13||

prEtAvAsESu ghOrESu prEtairbhUtagaNairvRtaH| aTatyunmattavannagnO vyuptakEzO hasanrudan||14||

citAbhasmakRtasnAnaH prEtasraGnrasthibhUSaNaH zivApadEzO hyazivO mattO mattajanapriyaH patiH pramathanAthAnAM tamOmAtrAtmakAtmanAm||15||

tasmA unmAdanAthAya naSTazaucAya durhRdE| dattA bata mayA sAdhvI cOditE paramESThinA||16||

maitrEya uvAca

vinindyaivaM sa girizamapratIpamavasthitam| dakSO'thApa upaspRzya kruddhaH zaptuM pracakramE||17||

ayaM tu dEvayajana indrOpEndrAdibhirbhavaH| saha bhAgaM na labhatAM dEvairdEvagaNAdhamaH||18||

niSidhyamAnaH sa sadasyamukhyairdakSO giritrAya visRjya zApam| tasmAdviniSkramya vivRddhamanyurjagAma kauravya nijaM nikEtanam||19||

vijJAya zApaM girizAnugAgraNIrnandIzvarO rOSakaSAyadUSitaH| dakSAya zApaM visasarja dAruNaM yE cAnvamOdaMstadavAcyatAM dvijAH||20||

ya Etanmartyamuddizya bhagavatyapratidruhi| druhyatyajJaH pRthagdRSTistattvatO vimukhO bhavEt||21||

gRhESu kUTadharmESu saktO grAmyasukhEcchayA| karmatantraM vitanutE vEdavAdavipannadhIH||22||

buddhyA parAbhidhyAyinyA vismRtAtmagatiH pazuH| strIkAmaH sO'stvatitarAM dakSO bastamukhO'cirAt||23||

vidyAbuddhiravidyAyAM karmamayyAmasau jaDaH| saMsarantviha yE cAmumanu zarvAvamAninam||24||

giraH zrutAyAH puSpiNyA madhugandhEna bhUriNA| mathnA cOnmathitAtmAnaH sammuhyantu haradviSaH||25||

sarvabhakSA dvijA vRttyai dhRtavidyAtapOvratAH| vittadEhEndriyArAmA yAcakA vicarantviha||26||

tasyaivaM vadataH zApaM zrutvA dvijakulAya vai| bhRguH pratyasRjacchApaM brahmadaNDaM duratyayam||27||

bhavavratadharA yE ca yE ca tAnsamanuvratAH| pASaNDinastE bhavantu sacchAstraparipanthinaH||28||

naSTazaucA mUDhadhiyO jaTAbhasmAsthidhAriNaH| vizantu zivadIkSAyAM yatra daivaM surAsavam||29||

brahma ca brAhmaNAMzcaiva yadyUyaM parinindatha| sEtuM vidhAraNaM puMsAmataH pASaNDamAzritAH||30||

ESa Eva hi lOkAnAM zivaH panthAH sanAtanaH| yaM pUrvE cAnusantasthuryatpramANaM janArdanaH||31||

tadbrahma paramaM zuddhaM satAM vartma sanAtanam| vigarhya yAta pASaNDaM daivaM vO yatra bhUtarAT||32||

maitrEya uvAca

tasyaivaM vadataH zApaM bhRgOH sa bhagavAnbhavaH| nizcakrAma tataH kiJcidvimanA iva sAnugaH||33||

tE'pi vizvasRjaH satraM sahasraparivatsarAn| saMvidhAya mahESvAsa yatrEjya RSabhO hariH||34||

AplutyAvabhRthaM yatra gaGgA yamunayAnvitA virajEnAtmanA sarvE svaM svaM dhAma yayustataH||35||

||iti zrImadbhAgavatE mahApurANE pAramahaMsyAM saMhitAyAM caturthaskandhE dwitIyO'dhyAyaH||

See Also

• http://vedabase.net/sb/4/2/en