EkOnatriMzO'dhyAyaH

bhagavaMstE vacO'smAbhirna samyagavagamyatE|
kavayastadvijAnanti na vayaM karmamOhitAH||1||

puruSaM puraJjanaM vidyAdyadvyanaktyAtmanaH puram|
EkadvitricatuSpAdaM bahupAdamapAdakam||2||

yO'vijJAtAhRtastasya puruSasya sakhEzvaraH|
yanna vijJAyatE pumbhirnAmabhirvA kriyAguNaiH||3||

yadA jighRkSanpuruSaH kArtsnyEna prakRtErguNAn|
navadvAraM dvihastAGghri tatrAmanuta sAdhviti||4||

buddhiM tu pramadAM vidyAnmamAhamiti yatkRtam|
yAmadhiSThAya dEhE'sminpumAnbhuGktE'kSabhirguNAn||5||

sakhAya indriyagaNA jJAnaM karma ca yatkRtam|
sakhyastadvRttayaH prANaH paJcavRttiryathOragaH||6||

bRhadbalaM manO vidyAdubhayEndriyanAyakam|
paJcAlAH paJca viSayA yanmadhyE navakhaM puram||7||

akSiNI nAsikE karNau mukhaM ziznagudAviti|
dvE dvE dvArau bahiryAti yastadindriyasaMyutaH||8||

akSiNI nAsikE Asyamiti paJca puraH kRtAH|
dakSiNA dakSiNaH karNa uttarA cOttaraH smRtaH||9||

pazcimE ityadhO dvArau gudaM ziznamihOcyatE
khadyOtAvirmukhI cAtra nEtrE Ekatra nirmitE
rUpaM vibhrAjitaM tAbhyAM vicaSTE cakSuSEzvaraH||10||

nalinI nAlinI nAsE gandhaH saurabha ucyatE|
ghrANO'vadhUtO mukhyAsyaM vipaNO vAgrasavidrasaH||11||

ApaNO vyavahArO'tra citramandhO bahUdanam|
pitRhUrdakSiNaH karNa uttarO dEvahUH smRtaH||12||

pravRttaM ca nivRttaM ca zAstraM paJcAlasaMjJitam|
pitRyAnaM dEvayAnaM zrOtrAcchrutadharAdvrajEt||13||

AsurI mEDhramarvAgdvArvyavAyO grAmiNAM ratiH|
upasthO durmadaH prOktO nirRtirguda ucyatE||14||

vaizasaM narakaM pAyurlubdhakO'ndhau tu mE zRNu|
hastapAdau pumAMstAbhyAM yuktO yAti karOti ca||15||

antaHpuraM ca hRdayaM viSUcirmana ucyatE|
tatra mOhaM prasAdaM vA harSaM prApnOti tadguNaiH||16||

yathA yathA vikriyatE guNAktO vikarOti vA|
tathA tathOpadraSTAtmA tadvRttIranukAryatE||17||

dEhO rathastvindriyAzvaH saMvatsararayO'gatiH|
dvikarmacakrastriguNa dhvajaH paJcAsubandhuraH||18||

manOrazmirbuddhisUtO hRnnIDO dvandvakUbaraH|
paJcEndriyArthaprakSEpaH saptadhAtuvarUthakaH||19||

AkUtirvikramO bAhyO mRgatRSNAM pradhAvati|
EkAdazEndriyacamUH paJcasUnAvinOdakRt||20||

saMvatsarazcaNDavEgaH kAlO yEnOpalakSitaH
tasyAhAnIha gandharvA gandharvyO rAtrayaH smRtAH
harantyAyuH parikrAntyA SaSTyuttarazatatrayam||21||

kAlakanyA jarA sAkSAllOkastAM nAbhinandati|
svasAraM jagRhE mRtyuH kSayAya yavanEzvaraH||22||

AdhayO vyAdhayastasya sainikA yavanAzcarAH|
bhUtOpasargAzurayaH prajvArO dvividhO jvaraH||23||

EvaM bahuvidhairduHkhairdaivabhUtAtmasambhavaiH|
klizyamAnaH zataM varSaM dEhE dEhI tamOvRtaH||24||

prANEndriyamanOdharmAnAtmanyadhyasya nirguNaH|
zEtE kAmalavAndhyAyanmamAhamiti karmakRt||25||

yadAtmAnamavijJAya bhagavantaM paraM gurum|
puruSastu viSajjEta guNESu prakRtEH svadRk||26||

guNAbhimAnI sa tadA karmANi kurutE'vazaH|
zuklaM kRSNaM lOhitaM vA yathAkarmAbhijAyatE||27||

zuklAtprakAzabhUyiSThA lOkAnApnOti karhicit|
duHkhOdarkAnkriyAyAsAMstamaHzOkOtkaTAnkvacit||28||

kvacitpumAnkvacicca strI kvacinnObhayamandhadhIH|
dEvO manuSyastiryagvA yathAkarmaguNaM bhavaH||29||

kSutparItO yathA dInaH sAramEyO gRhaM gRham|
caranvindati yaddiSTaM daNDamOdanamEva vA||30||

tathA kAmAzayO jIva uccAvacapathA bhraman|
uparyadhO vA madhyE vA yAti diSTaM priyApriyam||31||

duHkhESvEkatarENApi daivabhUtAtmahEtuSu|
jIvasya na vyavacchEdaH syAccEttattatpratikriyA||32||

yathA hi puruSO bhAraM zirasA gurumudvahan|
taM skandhEna sa AdhattE tathA sarvAH pratikriyAH||33||

naikAntataH pratIkAraH karmaNAM karma kEvalam|
dvayaM hyavidyOpasRtaM svapnE svapna ivAnagha||34||

arthE hyavidyamAnE'pi saMsRtirna nivartatE|
manasA liGgarUpENa svapnE vicaratO yathA||35||

athAtmanO'rthabhUtasya yatO'narthaparamparA|
saMsRtistadvyavacchEdO bhaktyA paramayA gurau||36||

vAsudEvE bhagavati bhaktiyOgaH samAhitaH|
sadhrIcInEna vairAgyaM jJAnaM ca janayiSyati||37||

sO'cirAdEva rAjarSE syAdacyutakathAzrayaH|
zRNvataH zraddadhAnasya nityadA syAdadhIyataH||38||

yatra bhAgavatA rAjansAdhavO vizadAzayAH|
bhagavadguNAnukathana zravaNavyagracEtasaH||39||

tasminmahanmukharitA madhubhic caritrapIyUSazESasaritaH paritaH sravanti|
tA yE pibantyavitRSO nRpa gADhakarNaistAnna spRzantyazanatRDbhayazOkamOhAH||40||

EtairupadrutO nityaM jIvalOkaH svabhAvajaiH|
na karOti harErnUnaM kathAmRtanidhau ratim||41||

prajApatipatiH sAkSAdbhagavAngirizO manuH|
dakSAdayaH prajAdhyakSA naiSThikAH sanakAdayaH||42||

marIciratryaGgirasau pulastyaH pulahaH kratuH|
bhRgurvasiSTha ityEtE madantA brahmavAdinaH||43||

adyApi vAcaspatayastapOvidyAsamAdhibhiH|
pazyantO'pi na pazyanti pazyantaM paramEzvaram||44||

zabdabrahmaNi duSpArE caranta uruvistarE|
mantraliGgairvyavacchinnaM bhajantO na viduH param||45||

sarvESAmEva jantUnAM satataM dEhapOSaNE |
asti prajJA samAyattA kO vizESastadA nRNAm ||46||

labdhvEhAntE manuSyatvaM hitvA dEhAdyasadgraham |
AtmasRtyA vihAyEdaM jIvAtmA sa viziSyatE ||47||

yadA yasyAnugRhNAti bhagavAnAtmabhAvitaH|
sa jahAti matiM lOkE vEdE ca pariniSThitAm||46||

tasmAtkarmasu barhiSmannajJAnAdarthakAziSu|
mArthadRSTiM kRthAH zrOtra sparziSvaspRSTavastuSu||47||

svaM lOkaM na vidustE vai yatra dEvO janArdanaH|
AhurdhUmradhiyO vEdaM sakarmakamatadvidaH||48||

AstIrya darbhaiH prAgagraiH kArtsnyEna kSitimaNDalam
stabdhO bRhadvadhAnmAnI karma nAvaiSi yatparam
tatkarma haritOSaM yatsA vidyA tanmatiryayA||49||

harirdEhabhRtAmAtmA svayaM prakRtirIzvaraH|
tatpAdamUlaM zaraNaM yataH kSEmO nRNAmiha||50||

sa vai priyatamazcAtmA yatO na bhayamaNvapi|
iti vEda sa vai vidvAnyO vidvAnsa gururhariH||51||

prazna EvaM hi saJchinnO bhavataH puruSarSabha|
atra mE vadatO guhyaM nizAmaya sunizcitam||52||

kSudraM caraM sumanasAM zaraNE mithitvA
raktaM SaDaGghrigaNasAmasu lubdhakarNam|
agrE vRkAnasutRpO'vigaNayya yAntaM
pRSThE mRgaM mRgaya lubdhakabANabhinnam||53||

asyArthaH sumanaHsamadharmaNAM strINAM zaraNa AzramE puSpamadhugandhavatkSudratamaM
kAmyakarmavipAkajaM kAmasukhalavaM jaihvyaupasthyAdi vicinvantaM mithunIbhUya tadabhinivEzita
manasaM SaDaGghrigaNasAmagItavadatimanOharavanitAdijanAlApESvatitarAmatipralObhitakarNamagrE
vRkayUthavadAtmana AyurharatO'hOrAtrAntAnkAlalavavizESAnavigaNayya gRhESu viharantaM pRSThata Eva
parOkSamanupravRttO lubdhakaH kRtAntO'ntaH zarENa yamiha parAvidhyati tamimamAtmAnamahO
rAjanbhinnahRdayaM draSTumarhasIti||54||

sa tvaM vicakSya mRgacESTitamAtmanO'ntaz
cittaM niyaccha hRdi karNadhunIM ca cittE|
jahyaGganAzramamasattamayUthagAthaM
prINIhi haMsazaraNaM virama kramENa||55||

zrutamanvIkSitaM brahmanbhagavAnyadabhASata|
naitajjAnantyupAdhyAyAH kiM na brUyurviduryadi||56||

saMzayO'tra tu mE vipra saJchinnastatkRtO mahAn|
RSayO'pi hi muhyanti yatra nEndriyavRttayaH||57||

karmANyArabhatE yEna pumAniha vihAya tam|
amutrAnyEna dEhEna juSTAni sa yadaznutE||58||

iti vEdavidAM vAdaH zrUyatE tatra tatra ha|
karma yatkriyatE prOktaM parOkSaM na prakAzatE||59||

yEnaivArabhatE karma tEnaivAmutra tatpumAn|
bhuGktE hyavyavadhAnEna liGgEna manasA svayam||60||

zayAnamimamutsRjya zvasantaM puruSO yathA|
karmAtmanyAhitaM bhuGktE tAdRzEnEtarENa vA||61||

mamaitE manasA yadyadasAvahamiti bruvan|
gRhNIyAttatpumAnrAddhaM karma yEna punarbhavaH||62||

yathAnumIyatE cittamubhayairindriyEhitaiH|
EvaM prAgdEhajaM karma lakSyatE cittavRttibhiH||63||

nAnubhUtaM kva cAnEna dEhEnAdRSTamazrutam|
kadAcidupalabhyEta yadrUpaM yAdRgAtmani||64||

tEnAsya tAdRzaM rAja liGginO dEhasambhavam|
zraddhatsvAnanubhUtO'rthO na manaH spraSTumarhati||65||

mana Eva manuSyasya pUrvarUpANi zaMsati|
bhaviSyatazca bhadraM tE tathaiva na bhaviSyataH||66||

adRSTamazrutaM cAtra kvacinmanasi dRzyatE|
yathA tathAnumantavyaM dEzakAlakriyAzrayam||67||

sarvE kramAnurOdhEna manasIndriyagOcarAH|
AyAnti bahuzO yAnti sarvE samanasO janAH||68||

sattvaikaniSThE manasi bhagavatpArzvavartini|
tamazcandramasIvEdamuparajyAvabhAsatE||69||

nAhaM mamEti bhAvO'yaM puruSE vyavadhIyatE|
yAvadbuddhimanO'kSArtha guNavyUhO hyanAdimAn||70||

suptimUrcchOpatApESu prANAyanavighAtataH|
nEhatE'hamiti jJAnaM mRtyuprajvArayOrapi||71||

garbhE bAlyE'pyapauSkalyAdEkAdazavidhaM tadA|
liGgaM na dRzyatE yUnaH kuhvAM candramasO yathA||72||

arthE hyavidyamAnE'pi saMsRtirna nivartatE|
dhyAyatO viSayAnasya svapnE'narthAgamO yathA||73||

EvaM paJcavidhaM liGgaM trivRtSODaza vistRtam|
ESa cEtanayA yuktO jIva ityabhidhIyatE||74||

anEna puruSO dEhAnupAdattE vimuJcati|
harSaM zOkaM bhayaM duHkhaM sukhaM cAnEna vindati||75||

bhaktiH kRSNE dayA jIvESvakuNThajJAnamAtmani
yadi syAdAtmanO bhUyAdapavargastu saMsRtEH |
yathA tRNajalUkEyaM nApayAtyapayAti ca
na tyajEnmriyamANO'pi prAgdEhAbhimatiM janaH||76||

yathA tRNajalUkEyaM nApayAtyapayAti ca|
na tyajEnmriyamANO'pi prAgdEhAbhimatiM janaH||76||

adRSTaM dRSTavannaGkSEdbhUtaM svapnavadanyathA
bhUtaM bhavadbhaviSyacca suptaM sarvarahOrahaH |
yAvadanyaM na vindEta vyavadhAnEna karmaNAm
mana Eva manuSyEndra bhUtAnAM bhavabhAvanam||77||

yAvadanyaM na vindEta vyavadhAnEna karmaNAm|
mana Eva manuSyEndra bhUtAnAM bhavabhAvanam||77||

yadAkSaizcaritAndhyAyankarmANyAcinutE'sakRt|
sati karmaNyavidyAyAM bandhaH karmaNyanAtmanaH||78||

atastadapavAdArthaM bhaja sarvAtmanA harim|
pazyaMstadAtmakaM vizvaM sthityutpattyapyayA yataH||79||

bhAgavatamukhyO bhagavAnnAradO haMsayOrgatim|
pradarzya hyamumAmantrya siddhalOkaM tatO'gamat||80||

prAcInabarhI rAjarSiH prajAsargAbhirakSaNE|
Adizya putrAnagamattapasE kapilAzramam||81||

tatraikAgramanA dhIrO gOvindacaraNAmbujam|
vimuktasaGgO'nubhajanbhaktyA tatsAmyatAmagAt||82||

EtadadhyAtmapArOkSyaM gItaM dEvarSiNAnagha|
yaH zrAvayEdyaH zRNuyAtsa liGgEna vimucyatE||83||

EtanmukundayazasA bhuvanaM punAnaM
dEvarSivaryamukhaniHsRtamAtmazaucam|
yaH kIrtyamAnamadhigacchati pAramESThyaM
nAsminbhavE bhramati muktasamastabandhaH||84||

adhyAtmapArOkSyamidaM mayAdhigatamadbhutam
EvaM striyAzramaH puMsazchinnO'mutra ca saMzayaH||85||