From StotraSamhita
< Bhagavatam | Skandha 08
zrIzuka uvAca
tE'nyOnyatO'surAH pAtraM harantastyaktasauhRdAH| kSipantO dasyudharmANa AyAntIM dadRzuH striyam||1|| |
ahO rUpamahO dhAma ahO asyA navaM vayaH| iti tE tAmabhidrutya papracchurjAtahRcchayAH||2|| |
kA tvaM kaJjapalAzAkSi kutO vA kiM cikIrSasi| kasyAsi vada vAmOru mathnatIva manAMsi naH||3|| |
na vayaM tvAmarairdaityaiH siddhagandharvacAraNaiH| nAspRSTapUrvAM jAnImO lOkEzaizca kutO nRbhiH||4|| |
nUnaM tvaM vidhinA subhrUH prESitAsi zarIriNAm| sarvEndriyamanaHprItiM vidhAtuM saghRNEna kim||5|| |
sA tvaM naH spardhamAnAnAmEkavastuni mAnini| jJAtInAM baddhavairANAM zaM vidhatsva sumadhyamE||6|| |
vayaM kazyapadAyAdA bhrAtaraH kRtapauruSAH| vibhajasva yathAnyAyaM naiva bhEdO yathA bhavEt||7|| |
ityupAmantritO daityairmAyAyOSidvapurhariH| prahasya rucirApAGgairnirIkSannidamabravIt||8|| |
zrIbhagavAnuvAca
kathaM kazyapadAyAdAH puMzcalyAM mayi saGgatAH| vizvAsaM paNDitO jAtu kAminISu na yAti hi||9|| |
sAlAvRkANAM strINAM ca svairiNInAM suradviSaH| sakhyAnyAhuranityAni nUtnaM nUtnaM vicinvatAm||10|| |
zrIzuka uvAca
iti tE kSvElitaistasyA AzvastamanasO'surAH| jahasurbhAvagambhIraM daduzcAmRtabhAjanam||11|| |
tatO gRhItvAmRtabhAjanaM harirbabhASa ISatsmitazObhayA girA| yadyabhyupEtaM kva ca sAdhvasAdhu vA kRtaM mayA vO vibhajE sudhAmimAm||12|| |
ityabhivyAhRtaM tasyA AkarNyAsurapuGgavAH| apramANavidastasyAstattathEtyanvamaMsata||13|| |
athOpOSya kRtasnAnA hutvA ca haviSAnalam| dattvA gOviprabhUtEbhyaH kRtasvastyayanA dvijaiH||14|| |
yathOpajOSaM vAsAMsi paridhAyAhatAni tE| kuzESu prAvizansarvE prAgagrESvabhibhUSitAH||15|| |
prAGmukhESUpaviSTESu surESu ditijESu ca| dhUpAmOditazAlAyAM juSTAyAM mAlyadIpakaiH||16|| |
tasyAM narEndra karabhOruruzaddukUla zrONItaTAlasagatirmadavihvalAkSI| sA kUjatI kanakanUpuraziJjitEna kumbhastanI kalasapANirathAvivEza||17|| |
tAM zrIsakhIM kanakakuNDalacArukarNa nAsAkapOlavadanAM paradEvatAkhyAm| saMvIkSya sammumuhurutsmitavIkSaNEna dEvAsurA vigalitastanapaTTikAntAm||18|| |
asurANAM sudhAdAnaM sarpANAmiva durnayam| matvA jAtinRzaMsAnAM na tAM vyabhajadacyutaH||19|| |
kalpayitvA pRthakpaGktIrubhayESAM jagatpatiH| tAMzcOpavEzayAmAsa svESu svESu ca paGktiSu||20|| |
daityAngRhItakalasO vaJcayannupasaJcaraiH| dUrasthAnpAyayAmAsajarAmRtyuharAM sudhAm||21|| |
tE pAlayantaH samayamasurAH svakRtaM nRpa| tUSNImAsankRtasnEhAH strIvivAdajugupsayA||22|| |
tasyAM kRtAtipraNayAH praNayApAyakAtarAH| bahumAnEna cAbaddhA nOcuH kiJcana vipriyam||23|| |
dEvaliGgapraticchannaH svarbhAnurdEvasaMsadi| praviSTaH sOmamapibaccandrArkAbhyAM ca sUcitaH||24|| |
cakrENa kSuradhArENa jahAra pibataH ziraH| haristasya kabandhastu sudhayAplAvitO'patat||25|| |
zirastvamaratAM nItamajO grahamacIklRpat| yastu parvaNi candrArkAvabhidhAvati vairadhIH||26|| |
pItaprAyE'mRtE dEvairbhagavAnlOkabhAvanaH| pazyatAmasurEndrANAM svaM rUpaM jagRhE hariH||27|| |
EvaM surAsuragaNAH samadEzakAla hEtvarthakarmamatayO'pi phalE vikalpAH| tatrAmRtaM suragaNAH phalamaJjasApur yatpAdapaGkajarajaHzrayaNAnna daityAH||28|| |
yadyujyatE'suvasukarmamanOvacObhir dEhAtmajAdiSu nRbhistadasatpRthaktvAt tairEva sadbhavati yatkriyatE'pRthaktvAt sarvasya tadbhavati mUlaniSEcanaM yat||29|| |
||iti zrImadbhAgavatE mahApurANE pAramahaMsyAM saMhitAyAM aSTamaskandhE navamO'dhyAyaH||
