From StotraSamhita
< Bhagavatam | Skandha 11
dwAdazO'dhyAyaH
zrIbhagavAnuvAca
na rOdhayati mAM yOgO na sAGkhyaM dharma Eva ca| na svAdhyAyastapastyAgO nESTApUrtaM na dakSiNA||1|| |
vratAni yajJazchandAMsi tIrthAni niyamA yamAH| yathAvarundhE satsaGgaH sarvasaGgApahO hi mAm||2|| |
satsaGgEna hi daitEyA yAtudhAnA mRgAH khagAH| gandharvApsarasO nAgAH siddhAzcAraNaguhyakAH||3|| |
vidyAdharA manuSyESu vaizyAH zUdrAH striyO'ntyajAH| rajastamaHprakRtayastasmiMstasminyugE yugE||4|| |
bahavO matpadaM prAptAstvASTrakAyAdhavAdayaH| vRSaparvA balirbANO mayazcAtha vibhISaNaH||5|| |
sugrIvO hanumAnRkSO gajO gRdhrO vaNikpathaH| vyAdhaH kubjA vrajE gOpyO yajJapatnyastathAparE||6|| |
tE nAdhItazrutigaNA nOpAsitamahattamAH| avratAtaptatapasaH matsaGgAnmAmupAgatAH||7|| |
kEvalEna hi bhAvEna gOpyO gAvO nagA mRgAH| yE'nyE mUDhadhiyO nAgAH siddhA mAmIyuraJjasA||8|| |
yaM na yOgEna sAGkhyEna dAnavratatapO'dhvaraiH| vyAkhyAsvAdhyAyasannyAsaiH prApnuyAdyatnavAnapi||9|| |
rAmENa sArdhaM mathurAM praNItE zvAphalkinA mayyanuraktacittAH| vigADhabhAvEna na mE viyOga tIvrAdhayO'nyaM dadRzuH sukhAya||10|| |
tAstAH kSapAH prESThatamEna nItA mayaiva vRndAvanagOcarENa| kSaNArdhavattAH punaraGga tAsAM hInA mayA kalpasamA babhUvuH||11|| |
tA nAvidanmayyanuSaGgabaddha dhiyaH svamAtmAnamadastathEdam| yathA samAdhau munayO'bdhitOyE nadyaH praviSTA iva nAmarUpE||12|| |
matkAmA ramaNaM jAramasvarUpavidO'balAH| brahma mAM paramaM prApuH saGgAcchatasahasrazaH||13|| |
tasmAttvamuddhavOtsRjya cOdanAM praticOdanAm| pravRttiM ca nivRttiM ca zrOtavyaM zrutamEva ca||14|| |
mAmEkamEva zaraNamAtmAnaM sarvadEhinAm| yAhi sarvAtmabhAvEna mayA syA hyakutObhayaH||15|| |
zrIuddhava uvAca
saMzayaH zRNvatO vAcaM tava yOgEzvarEzvara| na nivartata AtmasthO yEna bhrAmyati mE manaH||16|| |
zrIbhagavAnuvAca
sa ESa jIvO vivaraprasUtiH prANEna ghOSENa guhAM praviSTaH| manOmayaM sUkSmamupEtya rUpaM mAtrA svarO varNa iti sthaviSThaH||17|| |
yathAnalaH khE'nilabandhuruSmA balEna dAruNyadhimathyamAnaH| aNuH prajAtO haviSA samEdhatE tathaiva mE vyaktiriyaM hi vANI||18|| |
EvaM gadiH karma gatirvisargO ghrANO rasO dRksparzaH zrutizca| saGkalpavijJAnamathAbhimAnaH sUtraM rajaHsattvatamOvikAraH||19|| |
ayaM hi jIvastrivRdabjayOniravyakta EkO vayasA sa AdyaH| vizliSTazaktirbahudhEva bhAti bIjAni yOniM pratipadya yadvat||20|| |
yasminnidaM prOtamazESamOtaM paTO yathA tantuvitAnasaMsthaH| ya ESa saMsArataruH purANaH karmAtmakaH puSpaphalE prasUtE||21|| |
dvE asya bIjE zatamUlastrinAlaH paJcaskandhaH paJcarasaprasUtiH| dazaikazAkhO dvisuparNanIDastrivalkalO dviphalO'rkaM praviSTaH||22|| |
adanti caikaM phalamasya gRdhrA grAmEcarA EkamaraNyavAsAH| haMsA ya EkaM bahurUpamijyairmAyAmayaM vEda sa vEda vEdam||23|| |
EvaM gurUpAsanayaikabhaktyA vidyAkuThArENa zitEna dhIraH vivRzcya jIvAzayamapramattaH sampadya cAtmAnamatha tyajAstram||24|| |
||iti zrImadbhAgavatE mahApurANE pAramahaMsyAM saMhitAyAM EkAdazaskandhE dwAdazO'dhyAyaH||
