From StotraSamhita
< Bhagavatam | Skandha 10
EkaSaSTitamO'dhyAyaH
zrIzuka uvAca
EkaikazastAH kRSNasya putrAndazadazAbaAH| ajIjanannanavamAnpituH sarvAtmasampadA||1|| |
gRhAdanapagaM vIkSya rAjaputryO'cyutaM sthitam| prESThaM nyamaMsata svaM svaM na tattattvavidaH striyaH||2|| |
cArvabjakOzavadanAyatabAhunEtra saprEmahAsarasavIkSitavalgujalpaiH| sammOhitA bhagavatO na manO vijEtuM svairvibhramaiH samazakanvanitA vibhUmnaH||3|| |
smAyAvalOkalavadarzitabhAvahAri bhrUmaNDalaprahitasauratamantrazauNDaiH| patnyastu zODazasahasramanaGgabANair yasyEndriyaM vimathitumkaraNairna zEkuH||4|| |
itthaM ramApatimavApya patiM striyastA brahmAdayO'pi na viduH padavIM yadIyAm| bhEjurmudAviratamEdhitayAnurAga hAsAvalOkanavasaGgamalAlasAdyam||5|| |
pratyudgamAsanavarArhaNapAdazauca tAmbUlavizramaNavIjanagandhamAlyaiH| kEzaprasArazayanasnapanOpahAryaiH dAsIzatA api vibhOrvidadhuH sma dAsyam||6|| |
tAsAM yA dazaputrANAM kRSNastrINAM purOditAH| aSTau mahiSyastatputrAnpradyumnAdIngRNAmi tE||7|| |
cArudESNaH sudESNazca cArudEhazca vIryavAn| sucAruzcAruguptazca bhadracArustathAparaH||8|| |
cArucandrO vicAruzca cAruzca dazamO harEH| pradyumnapramukhA jAtA rukmiNyAM nAvamAH pituH||9|| |
bhAnuH subhAnuH svarbhAnuH prabhAnurbhAnumAMstathA| candrabhAnurbRhadbhAnuratibhAnustathASTamaH||10|| |
zrIbhAnuH pratibhAnuzca satyabhAmAtmajA daza| sAmbaH sumitraH purujicchatajicca sahasrajit||11|| |
viyayazcitrakEtuzca vasumAndraviDaH kratuH| jAmbavatyAH sutA hyEtE sAmbAdyAH pitRsammatAH||12|| |
vIrazcandrO'zvasEnazca citragurvEgavAnvRSaH| AmaH zaGkurvasuH zrImAnkuntirnAgnajitEH sutAH||13|| |
zrutaH kavirvRSO vIraH subAhurbhadra EkalaH| zAntirdarzaH pUrNamAsaH kAlindyAH sOmakO'varaH||14|| |
praghOSO gAtravAnsiMhO balaH prabala UrdhagaH| mAdryAH putrA mahAzaktiH saha OjO'parAjitaH||15|| |
vRkO harSO'nilO gRdhrO vardhanOnnAda Eva ca| mahAMsaH pAvanO vahnirmitravindAtmajAH kSudhiH||16|| |
saGgrAmajidbRhatsEnaH zUraH praharaNO'rijit| jayaH subhadrO bhadrAyA vAma Ayuzca satyakaH||17|| |
dIptimAMstAmrataptAdyA rOhiNyAstanayA harEH pradyamnAccAniruddhO'bhUdrukmavatyAM mahAbalaH putryAM tu rukmiNO rAjannAmnA bhOjakaTE purE||18|| |
EtESAM putrapautrAzca babhUvuH kOTizO nRpa| mAtaraH kRSNajAtInAM sahasrANi ca SODaza||19|| |
zrIrAjOvAca
kathaM rukmyarIputrAya prAdAdduhitaraM yudhi kRSNEna paribhUtastaM hantuM randhraM pratIkSatE EtadAkhyAhi mE vidvandviSOrvaivAhikaM mithaH||20|| |
anAgatamatItaM ca vartamAnamatIndriyam| viprakRSTaM vyavahitaM samyakpazyanti yOginaH||21|| |
zrIzuka uvAca
vRtaH svayaMvarE sAkSAdanaNgO'NgayutastayA| rAjJaH samEtAnnirjitya jahAraikarathO yudhi||22|| |
yadyapyanusmaranvairaM rukmI kRSNAvamAnitaH| vyataradbhAginEyAya sutAM kurvansvasuH priyam||23|| |
rukmiNyAstanayAM rAjankRtavarmasutO balI| upayEmE vizAlAkSIM kanyAM cArumatIM kila||24|| |
dauhitrAyAniruddhAya pautrIM rukmyAdadAddharEH rOcanAM baddhavairO'pi svasuH priyacikIrSayA jAnannadharmaM tadyaunaM snEhapAzAnubandhanaH||25|| |
tasminnabhyudayE rAjanrukmiNI rAmakEzavau| puraM bhOjakaTaM jagmuH sAmbapradyumnakAdayaH||26|| |
tasminnivRtta udvAhE kAliGgapramukhA nRpAH| dRptAstE rukmiNaM prOcurbalamakSairvinirjaya||27|| |
anakSajJO hyayaM rAjannapi tadvyasanaM mahat| ityuktO balamAhUya tEnAkSairrukmyadIvyata||28|| |
zataM sahasramayutaM rAmastatrAdadE paNam taM tu rukmyajayattatra kAliGgaH prAhasadbalam dantAnsandarzayannuccairnAmRSyattaddhalAyudhaH||29|| |
tatO lakSaM rukmyagRhNAdglahaM tatrAjayadbalaH| jitavAnahamityAha rukmI kaitavamAzritaH||30|| |
manyunA kSubhitaH zrImAnsamudra iva parvaNi| jAtyAruNAkSO'tiruSA nyarbudaM glahamAdadE||31|| |
taM cApi jitavAnrAmO dharmENa chalamAzritaH| rukmI jitaM mayAtrEmE vadantu prAznikA iti||32|| |
tadAbravInnabhOvANI balEnaiva jitO glahaH| dharmatO vacanEnaiva rukmI vadati vai mRSA||33|| |
tAmanAdRtya vaidarbhO duSTarAjanyacOditaH| saGkarSaNaM parihasanbabhASE kAlacOditaH||34|| |
naivAkSakOvidA yUyaM gOpAlA vanagOcarAH| akSairdIvyanti rAjAnO bANaizca na bhavAdRzAH||35|| |
rukmiNaivamadhikSiptO rAjabhizcOpahAsitaH| kruddhaH parighamudyamya jaghnE taM nRmNasaMsadi||36|| |
kaliGgarAjaM tarasA gRhItvA dazamE padE| dantAnapAtayatkruddhO yO'hasadvivRtairdvijaiH||37|| |
anyE nirbhinnabAhUru zirasO rudhirOkSitAH| rAjAnO dudravarbhItA balEna paGghArditAH||38|| |
nihatE rukmiNi zyAlE nAbravItsAdhvasAdhu vA| rakmiNIbalayO rAjansnEhabhaGgabhayAddhariH||39|| |
tatO'niruddhaM saha sUryayA varaM rathaM samArOpya yayuH kuzasthalIm rAmAdayO bhOjakaTAddazArhAH siddhAkhilArthA madhusUdanAzrayAH||40|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE EkaSaSTitamO'dhyAyaH||
