From StotraSamhita
< Bhagavatam | Skandha 11
aSTamO'dhyAyaH
zrIbrAhmaNa uvAca
sukhamaindriyakaM rAjansvargE naraka Eva ca| dEhinAM yadyathA duHkhaM tasmAnnEcchEta tadbudhaH||1|| |
grAsaM sumRSTaM virasaM mahAntaM stOkamEva vA| yadRcchayaivApatitaM grasEdAjagarO'kriyaH||2|| |
zayItAhAni bhUrINi nirAhArO'nupakramaH| yadi nOpanayEdgrAsO mahAhiriva diSTabhuk||3|| |
OjaHsahObalayutaM bibhraddEhamakarmakam| zayAnO vItanidrazca nEhEtEndriyavAnapi||4|| |
muniH prasannagambhIrO durvigAhyO duratyayaH| anantapArO hyakSObhyaH stimitOda ivArNavaH||5|| |
samRddhakAmO hInO vA nArAyaNaparO muniH| nOtsarpEta na zuSyEta saridbhiriva sAgaraH||6|| |
dRSTvA striyaM dEvamAyAM tadbhAvairajitEndriyaH| pralObhitaH patatyandhE tamasyagnau pataGgavat||7|| |
yOSiddhiraNyAbharaNAmbarAdi dravyESu mAyAracitESu mUDhaH| pralObhitAtmA hyupabhOgabuddhyA pataGgavannazyati naSTadRSTiH||8|| |
stOkaM stOkaM grasEdgrAsaM dEhO vartEta yAvatA| gRhAnahiMsannAtiSThEdvRttiM mAdhukarIM muniH||9|| |
aNubhyazca mahadbhyazca zAstrEbhyaH kuzalO naraH| sarvataH sAramAdadyAtpuSpEbhya iva SaTpadaH||10|| |
sAyantanaM zvastanaM vA na saGgRhNIta bhikSitam| pANipAtrOdarAmatrO makSikEva na saGgrahI||11|| |
sAyantanaM zvastanaM vA na saGgRhNIta bhikSukaH| makSikA iva saGgRhNansaha tEna vinazyati||12|| |
padApi yuvatIM bhikSurna spRzEddAravImapi| spRzankarIva badhyEta kariNyA aGgasaGgataH||13|| |
nAdhigacchEtstriyaM prAjJaH karhicinmRtyumAtmanaH| balAdhikaiH sa hanyEta gajairanyairgajO yathA||14|| |
na dEyaM nOpabhOgyaM ca lubdhairyadduHkhasaJcitam| bhuGktE tadapi taccAnyO madhuhEvArthavinmadhu||15|| |
suduHkhOpArjitairvittairAzAsAnAM gRhAziSaH| madhuhEvAgratO bhuGktE yatirvai gRhamEdhinAm||16|| |
grAmyagItaM na zRNuyAdyatirvanacaraH kvacit| zikSEta hariNAdbaddhAnmRgayOrgItamOhitAt||17|| |
nRtyavAditragItAni juSangrAmyANi yOSitAm| AsAM krIDanakO vazya RSyazRGgO mRgIsutaH||18|| |
jihvayAtipramAthinyA janO rasavimOhitaH| mRtyumRcchatyasadbuddhirmInastu baDizairyathA||19|| |
indriyANi jayantyAzu nirAhArA manISiNaH| varjayitvA tu rasanaM tannirannasya vardhatE||20|| |
tAvajjitEndriyO na syAdvijitAnyEndriyaH pumAn| na jayEdrasanaM yAvajjitaM sarvaM jitE rasE||21|| |
piGgalA nAma vEzyAsIdvidEhanagarE purA| tasyA mE zikSitaM kiJcinnibOdha nRpanandana||22|| |
sA svairiNyEkadA kAntaM saGkEta upanESyatI| abhUtkAlE bahirdvArE bibhratI rUpamuttamam||23|| |
mArga AgacchatO vIkSya puruSAnpuruSarSabha| tAnzulkadAnvittavataH kAntAnmEnE'rthakAmukI||24|| |
AgatESvapayAtESu sA saGkEtOpajIvinI| apyanyO vittavAnkO'pi mAmupaiSyati bhUridaH||25|| |
EvaM durAzayA dhvasta nidrA dvAryavalambatI| nirgacchantI pravizatI nizIthaM samapadyata||26|| |
tasyA vittAzayA zuSyad vaktrAyA dInacEtasaH| nirvEdaH paramO jajJE cintAhEtuH sukhAvahaH||27|| |
tasyA nirviNNacittAyA gItaM zRNu yathA mama| nirvEda AzApAzAnAM puruSasya yathA hyasiH||28|| |
na hyaGgAjAtanirvEdO dEhabandhaM jihAsati| yathA vijJAnarahitO manujO mamatAM nRpa||29|| |
piGgalOvAca
ahO mE mOhavitatiM pazyatAvijitAtmanaH| yA kAntAdasataH kAmaM kAmayE yEna bAlizA||30|| |
santaM samIpE ramaNaM ratipradaM vittapradaM nityamimaM vihAya| akAmadaM duHkhabhayAdhizOka mOhapradaM tucchamahaM bhajE'jJA||31|| |
ahO mayAtmA paritApitO vRthA sAGkEtyavRttyAtivigarhyavArtayA| straiNAnnarAdyArthatRSO'nuzOcyAtkrItEna vittaM ratimAtmanEcchatI||32|| |
yadasthibhirnirmitavaMzavaMsya sthUNaM tvacA rOmanakhaiH pinaddham| kSarannavadvAramagAramEtad viNmUtrapUrNaM madupaiti kAnyA||33|| |
vidEhAnAM purE hyasminnahamEkaiva mUDhadhIH| yAnyamicchantyasatyasmAdAtmadAtkAmamacyutAt||34|| |
suhRtprESThatamO nAtha AtmA cAyaM zarIriNAm| taM vikrIyAtmanaivAhaM ramE'nEna yathA ramA||35|| |
kiyatpriyaM tE vyabhajankAmA yE kAmadA narAH| AdyantavantO bhAryAyA dEvA vA kAlavidrutAH||36|| |
nUnaM mE bhagavAnprItO viSNuH kEnApi karmaNA| nirvEdO'yaM durAzAyA yanmE jAtaH sukhAvahaH||37|| |
maivaM syurmandabhAgyAyAH klEzA nirvEdahEtavaH| yEnAnubandhaM nirhRtya puruSaH zamamRcchati||38|| |
tEnOpakRtamAdAya zirasA grAmyasaGgatAH| tyaktvA durAzAH zaraNaM vrajAmi tamadhIzvaram||39|| |
santuSTA zraddadhatyEtadyathAlAbhEna jIvatI| viharAmyamunaivAhamAtmanA ramaNEna vai||40|| |
saMsArakUpE patitaM viSayairmuSitEkSaNam| grastaM kAlAhinAtmAnaM kO'nyastrAtumadhIzvaraH||41|| |
Atmaiva hyAtmanO gOptA nirvidyEta yadAkhilAt| apramatta idaM pazyEdgrastaM kAlAhinA jagat||42|| |
zrIbrAhmaNa uvAca
EvaM vyavasitamatirdurAzAM kAntatarSajAm| chittvOpazamamAsthAya zayyAmupavivEza sA||43|| |
AzA hi paramaM duHkhaM nairAzyaM paramaM sukham yathA saJchidya kAntAzAM sukhaM suSvApa piGgalA||44|| |
||iti zrImadbhAgavatE mahApurANE pAramahaMsyAM saMhitAyAM EkAdazaskandhE aSTamO'dhyAyaH||
