Jump to: navigation, search

paJcadazO'dhyAyaH

maitrEya uvAca

atha tasya punarviprairaputrasya mahIpatEH|
bAhubhyAM mathyamAnAbhyAM mithunaM samapadyata||1||

taddRSTvA mithunaM jAtamRSayO brahmavAdinaH|
UcuH paramasantuSTA viditvA bhagavatkalAm||2||

RSaya UcuH

ESa viSNOrbhagavataH kalA bhuvanapAlinI|
iyaM ca lakSmyAH sambhUtiH puruSasyAnapAyinI||3||

ayaM tu prathamO rAjJAM pumAnprathayitA yazaH|
pRthurnAma mahArAjO bhaviSyati pRthuzravAH||4||

iyaM ca sudatI dEvI guNabhUSaNabhUSaNA|
arcirnAma varArOhA pRthumEvAvarundhatI||5||

ESa sAkSAddharEraMzOjAtO lOkarirakSayA|
iyaM ca tatparA hi zrIranujajJE'napAyinI||6||

maitrEya uvAca

prazaMsanti sma taM viprA gandharvapravarA jaguH|
mumucuH sumanOdhArAH siddhA nRtyanti svaHstriyaH||7||

zaGkhatUryamRdaGgAdyA nEdurdundubhayO divi|
tatra sarva upAjagmurdEvarSipitRRNAM gaNAH||8||

brahmA jagadgururdEvaiH sahAsRtya surEzvaraiH|
vainyasya dakSiNE hastE dRSTvA cihnaM gadAbhRtaH||9||

pAdayOraravindaM ca taM vai mEnE harEH kalAm|
yasyApratihataM cakramaMzaH sa paramESThinaH||10||

tasyAbhiSEka ArabdhO brAhmaNairbrahmavAdibhiH|
AbhiSEcanikAnyasmai AjahruH sarvatO janAH||11||

saritsamudrA girayO nAgA gAvaH khagA mRgAH|
dyauH kSitiH sarvabhUtAni samAjahrurupAyanam||12||

sO'bhiSiktO mahArAjaH suvAsAH sAdhvalaGkRtaH|
patnyArciSAlaGkRtayA virEjE'gnirivAparaH||13||

tasmai jahAra dhanadO haimaM vIra varAsanam|
varuNaH salilasrAvamAtapatraM zaziprabham||14||

vAyuzca vAlavyajanE dharmaH kIrtimayIM srajam|
indraH kirITamutkRSTaM daNDaM saMyamanaM yamaH||15||

brahmA brahmamayaM varma bhAratI hAramuttamam|
hariH sudarzanaM cakraM tatpatnyavyAhatAM zriyam||16||

dazacandramasiM rudraH zatacandraM tathAmbikA|
sOmO'mRtamayAnazvAMstvaSTA rUpAzrayaM ratham||17||

agnirAjagavaM cApaM sUryO razmimayAniSUn|
bhUH pAdukE yOgamayyau dyauH puSpAvalimanvaham||18||

nATyaM sugItaM vAditramantardhAnaM ca khEcarAH|
RSayazcAziSaH satyAH samudraH zaGkhamAtmajam||19||

sindhavaH parvatA nadyO rathavIthIrmahAtmanaH|
sUtO'tha mAgadhO vandI taM stOtumupatasthirE||20||

stAvakAMstAnabhiprEtya pRthurvainyaH pratApavAn|
mEghanirhrAdayA vAcA prahasannidamabravIt||21||

pRthuruvAca

bhOH sUta hE mAgadha saumya vandinlOkE'dhunAspaSTaguNasya mE syAt|
kimAzrayO mE stava ESa yOjyatAM mA mayyabhUvanvitathA girO vaH||22||

tasmAtparOkSE'smadupazrutAnyalaM kariSyatha stOtramapIcyavAcaH|
satyuttamazlOkaguNAnuvAdE jugupsitaM na stavayanti sabhyAH||23||

mahadguNAnAtmani kartumIzaH kaH stAvakaiH stAvayatE'satO'pi|
tE'syAbhaviSyanniti vipralabdhO janAvahAsaM kumatirna vEda||24||

prabhavO hyAtmanaH stOtraM jugupsantyapi vizrutAH|
hrImantaH paramOdArAH pauruSaM vA vigarhitam||25||

vayaM tvaviditA lOkE sUtAdyApi varImabhiH
karmabhiH kathamAtmAnaM gApayiSyAma bAlavat||26||

||iti zrImadbhAgavatE mahApurANE pAramahaMsyAM saMhitAyAM caturthaskandhE paJcadazO'dhyAyaH||

See Also