From StotraSamhita
< Bhagavatam | Skandha 05
SaSThO'dhyAyaH
rAjOvAca
na nUnaM bhagava AtmArAmANAM yOgasamIritajJAnAvabharjitakarmabIjAnAmaizvaryANi punaH klEzadAni bhavitumarhanti yadRcchayOpagatAni||1|| |
RSiruvAca
satyamuktaM kintviha vA EkE na manasO'ddhA vizrambhamanavasthAnasya zaThakirAta iva saGgacchantE||2|| |
tathA cOktam
na kuryAtkarhicitsakhyaM manasi hyanavasthitE| yadvizrambhAccirAccIrNaM caskanda tapa aizvaram||3|| |
nityaM dadAti kAmasya cchidraM tamanu yE'rayaH| yOginaH kRtamaitrasya patyurjAyEva puMzcalI||4|| |
kAmO manyurmadO lObhaH zOkamOhabhayAdayaH| karmabandhazca yanmUlaH svIkuryAtkO nu tadbudhaH||5|| |
athaivamakhilalOkapAlalalAmO'pi vilakSaNairjaDavadavadhUtavESabhASAcaritairavilakSita bhagavatprabhAvO yOginAM sAmparAyavidhimanuzikSayansvakalEvaraM jihAsurAtmanyAtmAnamasaMvyavahitamanarthAntarabhAvEnAnvIkSamANa uparatAnuvRttirupararAma||6|| |
tasya ha vA EvaM muktaliGgasya bhagavata RSabhasya yOgamAyAvAsanayA dEha imAM jagatImabhimAnAbhAsEna saGkramamANaH kOGkavEGkakuTakAndakSiNa karNATakAndEzAnyadRcchayOpagataH kuTakAcalOpavana Asya kRtAzmakavala unmAda iva muktamUrdhajO 'saMvIta Eva vicacAra||7|| |
atha samIravEgavidhUtavENuvikarSaNajAtOgradAvAnalastadvanamAlElihAnaH saha tEna dadAha||8|| |
yasya kilAnucaritamupAkarNya kOGkavEGkakuTakAnAM rAjArhannAmOpazikSya kalAvadharma utkRSyamANE bhavitavyEna vimOhitaH svadharmapathamakutObhayamapahAya kupatha pAkhaNDamasamaJjasaM nijamanISayA mandaH sampravartayiSyatE||9|| |
yEna ha vAva kalau manujApasadA dEvamAyAmOhitAH svavidhiniyOgazaucacAritravihInA dEva hElanAnyapavratAni nijanijEcchayA gRhNAnA asnAnAnAcamanAzaucakEzOlluJcanAdIni kalinAdharma bahulEnOpahatadhiyO brahmabrAhmaNayajJapuruSalOkavidUSakAH prAyENa bhaviSyanti||10|| |
tE ca hyarvAktanayA nijalOkayAtrayAndhaparamparayAzvastAstamasyandhE svayamEva prapatiSyanti||11|| |
ayamavatArO rajasOpaplutakaivalyOpazikSaNArthaH||12|| |
tasyAnuguNAnzlOkAngAyanti
ahO bhuvaH saptasamudravatyA dvIpESu varSESvadhipuNyamEtat| gAyanti yatratyajanA murArEH karmANi bhadrANyavatAravanti||13|| |
ahO nu vaMzO yazasAvadAtaH praiyavratO yatra pumAnpurANaH| kRtAvatAraH puruSaH sa AdyazcacAra dharmaM yadakarmahEtum||14|| |
kO nvasya kASThAmaparO'nugacchEnmanOrathEnApyabhavasya yOgI| yO yOgamAyAH spRhayatyudastA hyasattayA yEna kRtaprayatnAH||15|| |
iti ha sma sakalavEdalOkadEvabrAhmaNagavAM paramagurOrbhagavata RSabhAkhyasya vizuddhAcaritamIritaM puMsAM samastaduzcaritAbhiharaNaM paramamahA maGgalAyanamidamanuzraddhayOpacitayAnuzRNOtyAzrAvayati vAvahitO bhagavati tasminvAsudEva EkAntatO bhaktiranayOrapi samanuvartatE||16|| |
yasyAmEva kavaya AtmAnamavirataM vividhavRjinasaMsAraparitApOpatapyamAnamanusavanaM snApayantastayaiva parayA nirvRtyA hyapavargamAtyantikaM paramapuruSArthamapi svayamAsAditaM nO EvAdriyantE bhagavadIyatvEnaiva parisamAptasarvArthAH||17|| |
rAjanpatirgururalaM bhavatAM yadUnAM daivaM priyaH kulapatiH kva ca kiGkarO vaH| astvEvamaGga bhagavAnbhajatAM mukundO muktiM dadAti karhicitsma na bhaktiyOgam||18|| |
nityAnubhUtanijalAbhanivRttatRSNaH zrEyasyatadracanayA cirasuptabuddhEH lOkasya yaH karuNayAbhayamAtmalOkam AkhyAnnamO bhagavatE RSabhAya tasmai||19|| |
||iti zrImadbhAgavatE mahApurANE pAramahaMsyAM saMhitAyAM paJcamaskandhE SaSThO'dhyAyaH||
