From StotraSamhita

paJcamO'dhyAyaH

zrIzuka uvAca

EvaM bhagavatAdiSTO durvAsAzcakratApitaH| ambarISamupAvRtya tatpAdau duHkhitO'grahIt||1||

tasya sOdyamamAvIkSya pAdasparzavilajjitaH| astAvIttaddharErastraM kRpayA pIDitO bhRzam||2||

ambarISa uvAca

tvamagnirbhagavAnsUryastvaM sOmO jyOtiSAM patiH| tvamApastvaM kSitirvyOma vAyurmAtrEndriyANi ca||3||

sudarzana namastubhyaM sahasrArAcyutapriya| sarvAstraghAtinviprAya svasti bhUyA iDaspatE||4||

tvaM dharmastvamRtaM satyaM tvaM yajJO'khilayajJabhuk| tvaM lOkapAlaH sarvAtmA tvaM tEjaH pauruSaM param||5||

namaH sunAbhAkhiladharmasEtavE hyadharmazIlAsuradhUmakEtavE| trailOkyagOpAya vizuddhavarcasE manOjavAyAdbhutakarmaNE gRNE||6||

tvattEjasA dharmamayEna saMhRtaM tamaH prakAzazca dRzO mahAtmanAm| duratyayastE mahimA girAM patE tvadrUpamEtatsadasatparAvaram||7||

yadA visRSTastvamanaJjanEna vai balaM praviSTO'jita daityadAnavam| bAhUdarOrvaGghrizirOdharANi vRzcannajasraM pradhanE virAjasE||8||

sa tvaM jagattrANa khalaprahANayE nirUpitaH sarvasahO gadAbhRtA| viprasya cAsmatkuladaivahEtavE vidhEhi bhadraM tadanugrahO hi naH||9||

yadyasti dattamiSTaM vA svadharmO vA svanuSThitaH| kulaM nO vipradaivaM cEddvijO bhavatu vijvaraH||10||

yadi nO bhagavAnprIta EkaH sarvaguNAzrayaH| sarvabhUtAtmabhAvEna dvijO bhavatu vijvaraH||11||

zrIzuka uvAca

iti saMstuvatO rAjJO viSNucakraM sudarzanam| azAmyatsarvatO vipraM pradahadrAjayAcJayA||12||

sa muktO'strAgnitApEna durvAsAH svastimAMstataH| prazazaMsa tamurvIzaM yuJjAnaH paramAziSaH||13||

durvAsA uvAca

ahO anantadAsAnAM mahattvaM dRSTamadya mE| kRtAgasO'pi yadrAjanmaGgalAni samIhasE||14||

duSkaraH kO nu sAdhUnAM dustyajO vA mahAtmanAm| yaiH saGgRhItO bhagavAnsAtvatAmRSabhO hariH||15||

yannAmazrutimAtrENa pumAnbhavati nirmalaH| tasya tIrthapadaH kiM vA dAsAnAmavaziSyatE||16||

rAjannanugRhItO'haM tvayAtikaruNAtmanA| madaghaM pRSThataH kRtvA prANA yanmE'bhirakSitAH||17||

rAjA tamakRtAhAraH pratyAgamanakAGkSayA| caraNAvupasaGgRhya prasAdya samabhOjayat||18||

sO'zitvAdRtamAnItamAtithyaM sArvakAmikam| tRptAtmA nRpatiM prAha bhujyatAmiti sAdaram||19||

prItO'smyanugRhItO'smi tava bhAgavatasya vai| darzanasparzanAlApairAtithyEnAtmamEdhasA||20||

karmAvadAtamEtattE gAyanti svaHstriyO muhuH| kIrtiM paramapuNyAM ca kIrtayiSyati bhUriyam||21||

zrIzuka uvAca

EvaM saGkIrtya rAjAnaM durvAsAH paritOSitaH| yayau vihAyasAmantrya brahmalOkamahaitukam||22||

saMvatsarO'tyagAttAvadyAvatA nAgatO gataH| munistaddarzanAkAGkSO rAjAbbhakSO babhUva ha||23||

gatE'tha durvAsasi sO'mbarISO dvijOpayOgAtipavitramAharat| RSErvimOkSaM vyasanaM ca vIkSya mEnE svavIryaM ca parAnubhAvam||24||

EvaM vidhAnEkaguNaH sa rAjA parAtmani brahmaNi vAsudEvE| kriyAkalApaiH samuvAha bhaktiM yayAviriJcyAnnirayAMzcakAra||25||

zrIzuka uvAca

athAmbarISastanayESu rAjyaM samAnazIlESu visRjya dhIraH| vanaM vivEzAtmani vAsudEvE manO dadhaddhvastaguNapravAhaH||26||

ityEtatpuNyamAkhyAnamambarISasya bhUpatE| saGkIrtayannanudhyAyanbhaktO bhagavatO bhavEt||27||

ambarISasya caritaM yE zRNvanti mahAtmanaH muktiM prayAnti tE sarvE bhaktyA viSNOH prasAdataH||28||

||iti zrImadbhAgavatE mahApurANE pAramahaMsyAM saMhitAyAM navamaskandhE paJcamO'dhyAyaH||

See Also

• http://vedabase.net/sb/9/5/en