From StotraSamhita
< Bhagavatam | Skandha 07
dwAdazO'dhyAyaH
zrInArada uvAca
brahmacArI gurukulE vasandAntO gurOrhitam| AcarandAsavannIcO gurau sudRDhasauhRdaH||1|| |
sAyaM prAtarupAsIta gurvagnyarkasurOttamAn| sandhyE ubhE ca yatavAgjapanbrahma samAhitaH||2|| |
chandAMsyadhIyIta gurOrAhUtazcEtsuyantritaH| upakramE'vasAnE ca caraNau zirasA namEt||3|| |
mEkhalAjinavAsAMsi jaTAdaNDakamaNDalUn| bibhRyAdupavItaM ca darbhapANiryathOditam||4|| |
sAyaM prAtazcarEdbhaikSyaM guravE tannivEdayEt| bhuJjIta yadyanujJAtO nO cEdupavasEtkvacit||5|| |
suzIlO mitabhugdakSaH zraddadhAnO jitEndriyaH| yAvadarthaM vyavaharEtstrISu strInirjitESu ca||6|| |
varjayEtpramadAgAthAmagRhasthO bRhadvrataH| indriyANi pramAthIni harantyapi yatErmanaH||7|| |
kEzaprasAdhanOnmarda snapanAbhyaJjanAdikam| gurustrIbhiryuvatibhiH kArayEnnAtmanO yuvA||8|| |
nanvagniH pramadA nAma ghRtakumbhasamaH pumAn| sutAmapi rahO jahyAdanyadA yAvadarthakRt||9|| |
kalpayitvAtmanA yAvadAbhAsamidamIzvaraH| dvaitaM tAvanna viramEttatO hyasya viparyayaH||10|| |
EtatsarvaM gRhasthasya samAmnAtaM yatErapi| guruvRttirvikalpEna gRhasthasyartugAminaH||11|| |
aJjanAbhyaJjanOnmarda stryavalEkhAmiSaM madhu| sraggandhalEpAlaGkArAMstyajEyuryE bRhadvratAH||12|| |
uSitvaivaM gurukulE dvijO'dhItyAvabudhya ca| trayIM sAGgOpaniSadaM yAvadarthaM yathAbalam||13|| |
dattvA varamanujJAtO gurOH kAmaM yadIzvaraH| gRhaM vanaM vA pravizEtpravrajEttatra vA vasEt||14|| |
agnau gurAvAtmani ca sarvabhUtESvadhOkSajam| bhUtaiH svadhAmabhiH pazyEdapraviSTaM praviSTavat||15|| |
EvaM vidhO brahmacArI vAnaprasthO yatirgRhI| caranviditavijJAnaH paraM brahmAdhigacchati||16|| |
vAnaprasthasya vakSyAmi niyamAnmunisammatAn| yAnAsthAya munirgacchEdRSilOkamuhAJjasA||17|| |
na kRSTapacyamaznIyAdakRSTaM cApyakAlataH| agnipakvamathAmaM vA arkapakvamutAharEt||18|| |
vanyaizcarupurODAzAnnirvapEtkAlacOditAn| labdhE navE navE'nnAdyE purANaM ca parityajEt||19|| |
agnyarthamEva zaraNamuTajaM vAdrikandaram| zrayEta himavAyvagni varSArkAtapaSATsvayam||20|| |
kEzarOmanakhazmazru malAni jaTilO dadhat| kamaNDalvajinE daNDa valkalAgniparicchadAn||21|| |
carEdvanE dvAdazAbdAnaSTau vA caturO muniH| dvAvEkaM vA yathA buddhirna vipadyEta kRcchrataH||22|| |
yadAkalpaH svakriyAyAM vyAdhibhirjarayAthavA| AnvIkSikyAM vA vidyAyAM kuryAdanazanAdikam||23|| |
AtmanyagnInsamArOpya sannyasyAhaM mamAtmatAm| kAraNESu nyasEtsamyaksaGghAtaM tu yathArhataH||24|| |
khE khAni vAyau nizvAsAMstEjaHsUSmANamAtmavAn| apsvasRkSlESmapUyAni kSitau zESaM yathOdbhavam||25|| |
vAcamagnau savaktavyAmindrE zilpaM karAvapi| padAni gatyA vayasi ratyOpasthaM prajApatau||26|| |
mRtyau pAyuM visargaM ca yathAsthAnaM vinirdizEt| dikSu zrOtraM sanAdEna sparzEnAdhyAtmani tvacam||27|| |
rUpANi cakSuSA rAjanjyOtiSyabhinivEzayEt| apsu pracEtasA jihvAM ghrEyairghrANaM kSitau nyasEt||28|| |
manO manOrathaizcandrE buddhiM bOdhyaiH kavau parE karmANyadhyAtmanA rudrE yadahaM mamatAkriyA sattvEna cittaM kSEtrajJE guNairvaikArikaM parE||29|| |
apsu kSitimapO jyOtiSyadO vAyau nabhasyamum| kUTasthE tacca mahati tadavyaktE'kSarE ca tat||30|| |
ityakSaratayAtmAnaM cinmAtramavazESitam jJAtvAdvayO'tha viramEddagdhayOnirivAnalaH||31|| |
||iti zrImadbhAgavatE mahApurANE pAramahaMsyAM saMhitAyAM saptamaskandhE dwAdazO'dhyAyaH||
