From StotraSamhita
< Bhagavatam | Skandha 01
sUta uvAca
iti bhItaH prajAdrOhAtsarvadharmavivitsayA| tatO vinazanaM prAgAdyatra dEvavratO'patat||1|| |
tadA tE bhrAtaraH sarvE sadazvaiH svarNabhUSitaiH| anvagacchanrathairviprA vyAsadhaumyAdayastathA||2|| |
bhagavAnapi viprarSE rathEna sadhanaJjayaH| sa tairvyarOcata nRpaH kuvEra iva guhyakaiH||3|| |
dRSTvA nipatitaM bhUmau divazcyutamivAmaram| praNEmuH pANDavA bhISmaM sAnugAH saha cakriNA||4|| |
tatra brahmarSayaH sarvE dEvarSayazca sattama| rAjarSayazca tatrAsandraSTuM bharatapuGgavam||5|| |
parvatO nAradO dhaumyO bhagavAnbAdarAyaNaH| bRhadazvO bharadvAjaH saziSyO rENukAsutaH||6|| |
vasiSTha indrapramadastritO gRtsamadO'sitaH| kakSIvAngautamO'trizca kauzikO'tha sudarzanaH||7|| |
anyE ca munayO brahmanbrahmarAtAdayO'malAH| ziSyairupEtA AjagmuH kazyapAGgirasAdayaH||8|| |
tAnsamEtAnmahAbhAgAnupalabhya vasUttamaH| pUjayAmAsa dharmajJO dEzakAlavibhAgavit||9|| |
kRSNaM ca tatprabhAvajJa AsInaM jagadIzvaram| hRdisthaM pUjayAmAsa mAyayOpAttavigraham||10|| |
pANDuputrAnupAsInAnprazrayaprEmasaGgatAn| abhyAcaSTAnurAgAzrairandhIbhUtEna cakSuSA||11|| |
ahO kaSTamahO'nyAyyaM yadyUyaM dharmanandanAH| jIvituM nArhatha kliSTaM vipradharmAcyutAzrayAH||12|| |
saMsthitE'tirathE pANDau pRthA bAlaprajA vadhUH| yuSmatkRtE bahUnklEzAnprAptA tOkavatI muhuH||13|| |
sarvaM kAlakRtaM manyE bhavatAM ca yadapriyam| sapAlO yadvazE lOkO vAyOriva ghanAvaliH||14|| |
yatra dharmasutO rAjA gadApANirvRkOdaraH| kRSNO'strI gANDivaM cApaM suhRtkRSNastatO vipat||15|| |
na hyasya karhicidrAjanpumAnvEda vidhitsitam| yadvijijJAsayA yuktA muhyanti kavayO'pi hi||16|| |
tasmAdidaM daivatantraM vyavasya bharatarSabha| tasyAnuvihitO'nAthA nAtha pAhi prajAH prabhO||17|| |
ESa vai bhagavAnsAkSAdAdyO nArAyaNaH pumAn| mOhayanmAyayA lOkaM gUDhazcarati vRSNiSu||18|| |
asyAnubhAvaM bhagavAnvEda guhyatamaM zivaH| dEvarSirnAradaH sAkSAdbhagavAnkapilO nRpa||19|| |
yaM manyasE mAtulEyaM priyaM mitraM suhRttamam| akarOH sacivaM dUtaM sauhRdAdatha sArathim||20|| |
sarvAtmanaH samadRzO hyadvayasyAnahaGkRtEH| tatkRtaM mativaiSamyaM niravadyasya na kvacit||21|| |
tathApyEkAntabhaktESu pazya bhUpAnukampitam| yanmE'sUMstyajataH sAkSAtkRSNO darzanamAgataH||22|| |
bhaktyAvEzya manO yasminvAcA yannAma kIrtayan| tyajankalEvaraM yOgI mucyatE kAmakarmabhiH||23|| |
sa dEvadEvO bhagavAnpratIkSatAM kalEvaraM yAvadidaM hinOmyaham| prasannahAsAruNalOcanOllasanmukhAmbujO dhyAnapathazcaturbhujaH||24|| |
sUta uvAca
yudhiSThirastadAkarNya zayAnaM zarapaJjarE| apRcchadvividhAndharmAnRSINAM cAnuzRNvatAm||25|| |
puruSasvabhAvavihitAnyathAvarNaM yathAzramam| vairAgyarAgOpAdhibhyAmAmnAtObhayalakSaNAn||26|| |
dAnadharmAnrAjadharmAnmOkSadharmAnvibhAgazaH| strIdharmAnbhagavaddharmAnsamAsavyAsayOgataH||27|| |
dharmArthakAmamOkSAMzca sahOpAyAnyathA munE| nAnAkhyAnEtihAsESu varNayAmAsa tattvavit||28|| |
dharmaM pravadatastasya sa kAlaH pratyupasthitaH| yO yOginazchandamRtyOrvAJchitastUttarAyaNaH||29|| |
tadOpasaMhRtya giraH sahasraNIrvimuktasaGgaM mana AdipUruSE| kRSNE lasatpItapaTE caturbhujE puraH sthitE'mIlitadRgvyadhArayat||30|| |
vizuddhayA dhAraNayA hatAzubhastadIkSayaivAzu gatAyudhazramaH| nivRttasarvEndriyavRttivibhramastuSTAva janyaM visRjaJjanArdanam||31|| |
zrIbhISma uvAca
iti matirupakalpitA vitRSNA bhagavati sAtvatapuGgavE vibhUmni| svasukhamupagatE kvacidvihartuM prakRtimupEyuSi yadbhavapravAhaH||32|| |
tribhuvanakamanaM tamAlavarNaM ravikaragauravarAmbaraM dadhAnE| vapuralakakulAvRtAnanAbjaM vijayasakhE ratirastu mE'navadyA||33|| |
yudhi turagarajOvidhUmraviSvakkacalulitazramavAryalaGkRtAsyE| mama nizitazarairvibhidyamAna tvaci vilasatkavacE'stu kRSNa AtmA||34|| |
sapadi sakhivacO nizamya madhyE nijaparayOrbalayO rathaM nivEzya| sthitavati parasainikAyurakSNA hRtavati pArthasakhE ratirmamAstu||35|| |
vyavahitapRtanAmukhaM nirIkSya svajanavadhAdvimukhasya dOSabuddhyA| kumatimaharadAtmavidyayA yazcaraNaratiH paramasya tasya mE'stu||36|| |
svanigamamapahAya matpratijJAmRtamadhikartumavaplutO rathasthaH| dhRtarathacaraNO'bhyayAccaladgurhaririva hantumibhaM gatOttarIyaH||37|| |
zitavizikhahatO vizIrNadaMzaH kSatajaparipluta AtatAyinO mE| prasabhamabhisasAra madvadhArthaM sa bhavatu mE bhagavAngatirmukundaH||38|| |
vijayarathakuTumba AttatOtrE dhRtahayarazmini tacchriyEkSaNIyE| bhagavati ratirastu mE mumUrSOryamiha nirIkSya hatA gatAH svarUpam||39|| |
lalitagativilAsavalguhAsa praNayanirIkSaNakalpitOrumAnAH| kRtamanukRtavatya unmadAndhAH prakRtimagankila yasya gOpavadhvaH||40|| |
munigaNanRpavaryasaGkulE'ntaH sadasi yudhiSThirarAjasUya ESAm| arhaNamupapEda IkSaNIyO mama dRzigOcara ESa AvirAtmA||41|| |
tamimamahamajaM zarIrabhAjAM hRdi hRdi dhiSThitamAtmakalpitAnAm| pratidRzamiva naikadhArkamEkaM samadhigatO'smi vidhUtabhEdamOhaH||42|| |
sUta uvAca
kRSNa EvaM bhagavati manOvAgdRSTivRttibhiH| AtmanyAtmAnamAvEzya sO'ntaHzvAsa upAramat||43|| |
sampadyamAnamAjJAya bhISmaM brahmaNi niSkalE| sarvE babhUvustE tUSNIM vayAMsIva dinAtyayE||44|| |
tatra dundubhayO nEdurdEvamAnavavAditAH| zazaMsuH sAdhavO rAjJAM khAtpEtuH puSpavRSTayaH||45|| |
tasya nirharaNAdIni samparEtasya bhArgava| yudhiSThiraH kArayitvA muhUrtaM duHkhitO'bhavat||46|| |
tuSTuvurmunayO hRSTAH kRSNaM tadguhyanAmabhiH| tatastE kRSNahRdayAH svAzramAnprayayuH punaH||47|| |
tatO yudhiSThirO gatvA sahakRSNO gajAhvayam| pitaraM sAntvayAmAsa gAndhArIM ca tapasvinIm||48|| |
pitrA cAnumatO rAjA vAsudEvAnumOditaH cakAra rAjyaM dharmENa pitRpaitAmahaM vibhuH||49|| |
||iti zrImadbhAgavatE mahApurANE pAramahaMsyAM saMhitAyAM prathamaskandhE navamO'dhyAyaH||
