From StotraSamhita
< Bhagavatam | Skandha 08
caturthO'dhyAyaH
zrIzuka uvAca
tadA dEvarSigandharvA brahmEzAnapurOgamAH| mumucuH kusumAsAraM zaMsantaH karma taddharEH||1|| |
nEdurdundubhayO divyA gandharvA nanRturjaguH| RSayazcAraNAH siddhAstuSTuvuH puruSOttamam||2|| |
yO'sau grAhaH sa vai sadyaH paramAzcaryarUpadhRk| muktO dEvalazApEna hUhUrgandharvasattamaH||3|| |
praNamya zirasAdhIzamuttamazlOkamavyayam| agAyata yazOdhAma kIrtanyaguNasatkatham||4|| |
sO'nukampita IzEna parikramya praNamya tam| lOkasya pazyatO lOkaM svamagAnmuktakilbiSaH||5|| |
gajEndrO bhagavatsparzAdvimuktO'jJAnabandhanAt| prAptO bhagavatO rUpaM pItavAsAzcaturbhujaH||6|| |
sa vai pUrvamabhUdrAjA pANDyO draviDasattamaH| indradyumna iti khyAtO viSNuvrataparAyaNaH||7|| |
sa EkadArAdhanakAla AtmavAngRhItamaunavrata IzvaraM harim| jaTAdharastApasa AplutO'cyutaM samarcayAmAsa kulAcalAzramaH||8|| |
yadRcchayA tatra mahAyazA muniH samAgamacchiSyagaNaiH parizritaH| taM vIkSya tUSNImakRtArhaNAdikaM rahasyupAsInamRSizcukOpa ha||9|| |
tasmA imaM zApamadAdasAdhurayaM durAtmAkRtabuddhiradya| viprAvamantA vizatAM tamisraM yathA gajaH stabdhamatiH sa Eva||10|| |
zrIzuka uvAca
EvaM zaptvA gatO'gastyO bhagavAnnRpa sAnugaH| indradyumnO'pi rAjarSirdiSTaM tadupadhArayan||11|| |
ApannaH kauJjarIM yOnimAtmasmRtivinAzinIm| haryarcanAnubhAvEna yadgajatvE'pyanusmRtiH||12|| |
EvaM vimOkSya gajayUthapamabjanAbhas tEnApi pArSadagatiM gamitEna yuktaH| gandharvasiddhavibudhairupagIyamAna karmAdbhutaM svabhavanaM garuDAsanO'gAt||13|| |
EtanmahArAja tavEritO mayA kRSNAnubhAvO gajarAjamOkSaNam| svargyaM yazasyaM kalikalmaSApahaM duHsvapnanAzaM kuruvarya zRNvatAm||14|| |
yathAnukIrtayantyEtacchrEyaskAmA dvijAtayaH| zucayaH prAtarutthAya duHsvapnAdyupazAntayE||15|| |
idamAha hariH prItO gajEndraM kurusattama| zRNvatAM sarvabhUtAnAM sarvabhUtamayO vibhuH||16|| |
zrIbhagavAnuvAca
yE mAM tvAM ca sarazcEdaM girikandarakAnanam| vEtrakIcakavENUnAM gulmAni surapAdapAn||17|| |
zRGgANImAni dhiSNyAni brahmaNO mE zivasya ca| kSIrOdaM mE priyaM dhAma zvEtadvIpaM ca bhAsvaram||18|| |
zrIvatsaM kaustubhaM mAlAM gadAM kaumOdakIM mama| sudarzanaM pAJcajanyaM suparNaM patagEzvaram||19|| |
zESaM ca matkalAM sUkSmAM zriyaM dEvIM madAzrayAm| brahmANaM nAradamRSiM bhavaM prahrAdamEva ca||20|| |
matsyakUrmavarAhAdyairavatAraiH kRtAni mE| karmANyanantapuNyAni sUryaM sOmaM hutAzanam||21|| |
praNavaM satyamavyaktaM gOviprAndharmamavyayam| dAkSAyaNIrdharmapatnIH sOmakazyapayOrapi||22|| |
gaGgAM sarasvatIM nandAM kAlindIM sitavAraNam| dhruvaM brahmaRSInsapta puNyazlOkAMzca mAnavAn||23|| |
utthAyApararAtrAntE prayatAH susamAhitAH| smaranti mama rUpANi mucyantE tE'MhasO'khilAt||24|| |
yE mAM stuvantyanEnAGga pratibudhya nizAtyayE| tESAM prANAtyayE cAhaM dadAmi vipulAM gatim||25|| |
zrIzuka uvAca
ityAdizya hRSIkEzaH prAdhmAya jalajOttamam harSayanvibudhAnIkamArurOha khagAdhipam||26|| |
||iti zrImadbhAgavatE mahApurANE pAramahaMsyAM saMhitAyAM aSTamaskandhE caturthO'dhyAyaH||
