From StotraSamhita
< Bhagavatam | Skandha 07
paJcamO'dhyAyaH
zrInArada uvAca
paurOhityAya bhagavAnvRtaH kAvyaH kilAsuraiH| SaNDAmarkau sutau tasya daityarAjagRhAntikE||1|| |
tau rAjJA prApitaM bAlaM prahlAdaM nayakOvidam| pAThayAmAsatuH pAThyAnanyAMzcAsurabAlakAn||2|| |
yattatra guruNA prOktaM zuzruvE'nupapATha ca| na sAdhu manasA mEnE svaparAsadgrahAzrayam||3|| |
EkadAsurarATputramaGkamArOpya pANDava| papraccha kathyatAM vatsa manyatE sAdhu yadbhavAn||4|| |
zrIprahlAda uvAca
tatsAdhu manyE'suravarya dEhinAM sadA samudvignadhiyAmasadgrahAt| hitvAtmapAtaM gRhamandhakUpaM vanaM gatO yaddharimAzrayEta||5|| |
zrInArada uvAca
zrutvA putragirO daityaH parapakSasamAhitAH| jahAsa buddhirbAlAnAM bhidyatE parabuddhibhiH||6|| |
samyagvidhAryatAM bAlO gurugEhE dvijAtibhiH| viSNupakSaiH praticchannairna bhidyEtAsya dhIryathA||7|| |
gRhamAnItamAhUya prahlAdaM daityayAjakAH| prazasya zlakSNayA vAcA samapRcchanta sAmabhiH||8|| |
vatsa prahlAda bhadraM tE satyaM kathaya mA mRSA| bAlAnati kutastubhyamESa buddhiviparyayaH||9|| |
buddhibhEdaH parakRta utAhO tE svatO'bhavat| bhaNyatAM zrOtukAmAnAM gurUNAM kulanandana||10|| |
zrIprahlAda uvAca
paraH svazcEtyasadgrAhaH puMsAM yanmAyayA kRtaH| vimOhitadhiyAM dRSTastasmai bhagavatE namaH||11|| |
sa yadAnuvrataH puMsAM pazubuddhirvibhidyatE| anya ESa tathAnyO'hamiti bhEdagatAsatI||12|| |
sa ESa AtmA svaparEtyabuddhibhirduratyayAnukramaNO nirUpyatE| muhyanti yadvartmani vEdavAdinO brahmAdayO hyESa bhinatti mE matim||13|| |
yathA bhrAmyatyayO brahmansvayamAkarSasannidhau| tathA mE bhidyatE cEtazcakrapANEryadRcchayA||14|| |
zrInArada uvAca
EtAvadbrAhmaNAyOktvA virarAma mahAmatiH| taM sannibhartsya kupitaH sudInO rAjasEvakaH||15|| |
AnIyatAmarE vEtramasmAkamayazaskaraH| kulAGgArasya durbuddhEzcaturthO'syOditO damaH||16|| |
daitEyacandanavanE jAtO'yaM kaNTakadrumaH| yanmUlOnmUlaparazOrviSNOrnAlAyitO'rbhakaH||17|| |
iti taM vividhOpAyairbhISayaMstarjanAdibhiH| prahlAdaM grAhayAmAsa trivargasyOpapAdanam||18|| |
tata EnaM gururjJAtvA jJAtajJEyacatuSTayam| daityEndraM darzayAmAsa mAtRmRSTamalaGkRtam||19|| |
pAdayOH patitaM bAlaM pratinandyAziSAsuraH| pariSvajya ciraM dOrbhyAM paramAmApa nirvRtim||20|| |
ArOpyAGkamavaghrAya mUrdhanyazrukalAmbubhiH| AsiJcanvikasadvaktramidamAha yudhiSThira||21|| |
hiraNyakazipuruvAca
prahrAdAnUcyatAM tAta svadhItaM kiJciduttamam| kAlEnaitAvatAyuSmanyadazikSadgurOrbhavAn||22|| |
zrIprahlAda uvAca
zravaNaM kIrtanaM viSNOH smaraNaM pAdasEvanam| arcanaM vandanaM dAsyaM sakhyamAtmanivEdanam||23|| |
iti puMsArpitA viSNau bhaktizcEnnavalakSaNA| kriyEta bhagavatyaddhA tanmanyE'dhItamuttamam||24|| |
nizamyaitatsutavacO hiraNyakazipustadA| guruputramuvAcEdaM ruSA prasphuritAdharaH||25|| |
brahmabandhO kimEtattE vipakSaM zrayatAsatA| asAraM grAhitO bAlO mAmanAdRtya durmatE||26|| |
santi hyasAdhavO lOkE durmaitrAzchadmavESiNaH| tESAmudEtyaghaM kAlE rOgaH pAtakinAmiva||27|| |
zrIguruputra uvAca
na matpraNItaM na parapraNItaM sutO vadatyESa tavEndrazatrO| naisargikIyaM matirasya rAjanniyaccha manyuM kadadAH sma mA naH||28|| |
zrInArada uvAca
guruNaivaM pratiprOktO bhUya AhAsuraH sutam| na cEdgurumukhIyaM tE kutO'bhadrAsatI matiH||29|| |
zrIprahlAda uvAca
matirna kRSNE parataH svatO vA mithO'bhipadyEta gRhavratAnAm| adAntagObhirvizatAM tamisraM punaH punazcarvitacarvaNAnAm||30|| |
na tE viduH svArthagatiM hi viSNuM durAzayA yE bahirarthamAninaH| andhA yathAndhairupanIyamAnAstE'pIzatantryAmurudAmni baddhAH||31|| |
naiSAM matistAvadurukramAGghriM spRzatyanarthApagamO yadarthaH| mahIyasAM pAdarajO'bhiSEkaM niSkiJcanAnAM na vRNIta yAvat||32|| |
ityuktvOparataM putraM hiraNyakazipU ruSA| andhIkRtAtmA svOtsaGgAnnirasyata mahItalE||33|| |
AhAmarSaruSAviSTaH kaSAyIbhUtalOcanaH| vadhyatAmAzvayaM vadhyO niHsArayata nairRtAH||34|| |
ayaM mE bhrAtRhA sO'yaM hitvA svAnsuhRdO'dhamaH| pitRvyahantuH pAdau yO viSNOrdAsavadarcati||35|| |
viSNOrvA sAdhvasau kiM nu kariSyatyasamaJjasaH| sauhRdaM dustyajaM pitrOrahAdyaH paJcahAyanaH||36|| |
parO'pyapatyaM hitakRdyathauSadhaM svadEhajO'pyAmayavatsutO'hitaH| chindyAttadaGgaM yadutAtmanO'hitaM zESaM sukhaM jIvati yadvivarjanAt||37|| |
sarvairupAyairhantavyaH sambhOjazayanAsanaiH| suhRlliGgadharaH zatrurmunErduSTamivEndriyam||38|| |
nairRtAstE samAdiSTA bhartrA vai zUlapANayaH| tigmadaMSTrakarAlAsyAstAmrazmazruzirOruhAH||39|| |
nadantO bhairavaM nAdaM chindhi bhindhIti vAdinaH| AsInaM cAhananzUlaiH prahlAdaM sarvamarmasu||40|| |
parE brahmaNyanirdEzyE bhagavatyakhilAtmani| yuktAtmanyaphalA AsannapuNyasyEva satkriyAH||41|| |
prayAsE'pahatE tasmindaityEndraH parizaGkitaH| cakAra tadvadhOpAyAnnirbandhEna yudhiSThira||42|| |
diggajairdandazUkEndrairabhicArAvapAtanaiH| mAyAbhiH sannirOdhaizca garadAnairabhOjanaiH||43|| |
himavAyvagnisalilaiH parvatAkramaNairapi na zazAka yadA hantumapApamasuraH sutam cintAM dIrghatamAM prAptastatkartuM nAbhyapadyata||44|| |
ESa mE bahvasAdhUktO vadhOpAyAzca nirmitAH| taistairdrOhairasaddharmairmuktaH svEnaiva tEjasA||45|| |
vartamAnO'vidUrE vai bAlO'pyajaDadhIrayam| na vismarati mE'nAryaM zunaH zEpa iva prabhuH||46|| |
apramEyAnubhAvO'yamakutazcidbhayO'maraH| nUnamEtadvirOdhEna mRtyurmE bhavitA na vA||47|| |
iti taccintayA kiJcinmlAnazriyamadhOmukham| zaNDAmarkAvauzanasau vivikta iti hOcatuH||48|| |
jitaM tvayaikEna jagattrayaM bhruvOrvijRmbhaNatrastasamastadhiSNyapam| na tasya cintyaM tava nAtha cakSvahE na vai zizUnAM guNadOSayOH padam||49|| |
imaM tu pAzairvaruNasya baddhvA nidhEhi bhItO na palAyatE yathA| buddhizca puMsO vayasAryasEvayA yAvadgururbhArgava AgamiSyati||50|| |
tathEti guruputrOktamanujJAyEdamabravIt| dharmO hyasyOpadESTavyO rAjJAM yO gRhamEdhinAm||51|| |
dharmamarthaM ca kAmaM ca nitarAM cAnupUrvazaH| prahrAdAyOcatU rAjanprazritAvanatAya ca||52|| |
yathA trivargaM gurubhirAtmanE upazikSitam| na sAdhu mEnE tacchikSAM dvandvArAmOpavarNitAm||53|| |
yadAcAryaH parAvRttO gRhamEdhIyakarmasu| vayasyairbAlakaistatra sOpahUtaH kRtakSaNaiH||54|| |
atha tAnzlakSNayA vAcA pratyAhUya mahAbudhaH| uvAca vidvAMstanniSThAM kRpayA prahasanniva||55|| |
tE tu tadgauravAtsarvE tyaktakrIDAparicchadAH| bAlA adUSitadhiyO dvandvArAmEritEhitaiH||56|| |
paryupAsata rAjEndra tannyastahRdayEkSaNAH tAnAha karuNO maitrO mahAbhAgavatO'suraH||57|| |
||iti zrImadbhAgavatE mahApurANE pAramahaMsyAM saMhitAyAM saptamaskandhE paJcamO'dhyAyaH||
