triMzO'dhyAyaH

antarhitE bhagavati sahasaiva vrajAGganAH|
atapyaMstamacakSANAH kariNya iva yUthapam||1||

gatyAnurAgasmitavibhramEkSitairmanOramAlApavihAravibhramaiH|
AkSiptacittAH pramadA ramApatEstAstA vicESTA jagRhustadAtmikAH||2||

gatismitaprEkSaNabhASaNAdiSu priyAH priyasya pratirUDhamUrtayaH|
asAvahaM tvityabalAstadAtmikA nyavEdiSuH kRSNavihAravibhramAH||3||

gAyantya uccairamumEva saMhatA vicikyurunmattakavadvanAdvanam|
papracchurAkAzavadantaraM bahirbhUtESu santaM puruSaM vanaspatIn||4||

dRSTO vaH kaccidazvattha plakSa nyagrOdha nO manaH|
nandasUnurgatO hRtvA prEmahAsAvalOkanaiH||5||

kaccitkurabakAzOka nAgapunnAgacampakAH|
rAmAnujO mAninInAmitO darpaharasmitaH||6||

kaccittulasi kalyANi gOvindacaraNapriyE|
saha tvAlikulairbibhraddRSTastE'tipriyO'cyutaH||7||

mAlatyadarzi vaH kaccinmallikE jAtiyUthikE|
prItiM vO janayanyAtaH karasparzEna mAdhavaH||8||

cUtapriyAlapanasAsanakOvidAra jambvarkabilvabakulAmrakadambanIpAH|
yE'nyE parArthabhavakA yamunOpakUlAH zaMsantu kRSNapadavIM rahitAtmanAM naH||9||

kiM tE kRtaM kSiti tapO bata kEzavAGghri
sparzOtsavOtpulakitAGganahairvibhAsi|
apyaGghrisambhava urukramavikramAdvA
AhO varAhavapuSaH parirambhaNEna||10||

apyENapatnyupagataH priyayEha gAtrais
tanvandRzAM sakhi sunirvRtimacyutO vaH|
kAntAGgasaGgakucakuGkumaraJjitAyAH
kundasrajaH kulapatEriha vAti gandhaH||11||

bAhuM priyAMsa upadhAya gRhItapadmO
rAmAnujastulasikAlikulairmadAndhaiH|
anvIyamAna iha vastaravaH praNAmaM
kiM vAbhinandati caranpraNayAvalOkaiH||12||

pRcchatEmA latA bAhUnapyAzliSTA vanaspatEH|
nUnaM tatkarajaspRSTA bibhratyutpulakAnyahO||13||

ityunmattavacO gOpyaH kRSNAnvESaNakAtarAH|
lIlA bhagavatastAstA hyanucakrustadAtmikAH||14||

kasyAcitpUtanAyantyAH kRSNAyantyapibatstanam|
tOkayitvA rudatyanyA padAhanzakaTAyatIm||15||

daityAyitvA jahArAnyAmEkO kRSNArbhabhAvanAm|
riGgayAmAsa kApyaGghrI karSantI ghOSaniHsvanaiH||16||

kRSNarAmAyitE dvE tu gOpAyantyazca kAzcana|
vatsAyatIM hanti cAnyA tatraikA tu bakAyatIm||17||

AhUya dUragA yadvatkRSNastamanuvartatIm|
vENuM kvaNantIM krIDantImanyAH zaMsanti sAdhviti||18||

kasyAJcitsvabhujaM nyasya calantyAhAparA nanu|
kRSNO'haM pazyata gatiM lalitAmiti tanmanAH||19||

mA bhaiSTa vAtavarSAbhyAM tattrANaM vihitaM maya|
ityuktvaikEna hastEna yatantyunnidadhE'mbaram||20||

AruhyaikA padAkramya zirasyAhAparAM nRpa|
duSTAhE gaccha jAtO'haM khalAnAmnanu daNDakRt||21||

tatraikOvAca hE gOpA dAvAgniM pazyatOlbaNam|
cakSUMSyAzvapidadhvaM vO vidhAsyE kSEmamaJjasA||22||

baddhAnyayA srajA kAcittanvI tatra ulUkhalE
badhnAmi bhANDabhEttAraM haiyaGgavamuSaM tviti
bhItA sudRkpidhAyAsyaM bhEjE bhItiviDambanam||23||

EvaM kRSNaM pRcchamAnA vrNdAvanalatAstarUn|
vyacakSata vanOddEzE padAni paramAtmanaH||24||

padAni vyaktamEtAni nandasUnOrmahAtmanaH|
lakSyantE hi dhvajAmbhOja vajrAGkuzayavAdibhiH||25||

taistaiH padaistatpadavImanvicchantyO'gratO'balAH|
vadhvAH padaiH supRktAni vilOkyArtAH samabruvan||26||

kasyAH padAni caitAni yAtAyA nandasUnunA|
aMsanyastaprakOSThAyAH karENOH kariNA yathA||27||

anayArAdhitO nUnaM bhagavAnharirIzvaraH|
yannO vihAya gOvindaH prItO yAmanayadrahaH||28||

dhanyA ahO amI AlyO gOvindAGghryabjarENavaH|
yAnbrahmEzau ramA dEvI dadhurmUrdhnyaghanuttayE||29||

tasyA amUni naH kSObhaM kurvantyuccaiH padAni yat
yaikApahRtya gOpInAmrahO bhunktE'cyutAdharam|
na lakSyantE padAnyatra tasyA nUnaM tRNAGkuraiH
khidyatsujAtAGghritalAmunninyE prEyasIM priyaH||30||

imAnyadhikamagnAni padAni vahatO vadhUm
gOpyaH pazyata kRSNasya bhArAkrAntasya kAminaH
atrAvarOpitA kAntA puSpahEtOrmahAtmanA||31||

atra prasUnAvacayaH priyArthE prEyasA kRtaH|
prapadAkramaNa EtE pazyatAsakalE padE||32||

kEzaprasAdhanaM tvatra kAminyAH kAminA kRtam|
tAni cUDayatA kAntAmupaviSTamiha dhruvam||33||

rEmE tayA cAtmarata AtmArAmO'pyakhaNDitaH|
kAminAM darzayandainyaM strINAM caiva durAtmatAm||34||

ityEvaM darzayantyastAzcErurgOpyO vicEtasaH|
yAM gOpImanayatkRSNO vihAyAnyAH striyO vanE||35||

sA ca mEnE tadAtmAnaM variSThaM sarvayOSitAm|
hitvA gOpIH kAmayAnA mAmasau bhajatE priyaH||36||

tatO gatvA vanOddEzaM dRptA kEzavamabravIt|
na pArayE'haM calituM naya mAM yatra tE manaH||37||

EvamuktaH priyAmAha skandha AruhyatAmiti|
tatazcAntardadhE kRSNaH sA vadhUranvatapyata||38||

hA nAtha ramaNa prESTha kvAsi kvAsi mahAbhuja|
dAsyAstE kRpaNAyA mE sakhE darzaya sannidhim||39||

anvicchantyO bhagavatO mArgaM gOpyO'vidUritaH|
dadRzuH priyavizlESAnmOhitAM duHkhitAM sakhIm||40||

tayA kathitamAkarNya mAnaprAptiM ca mAdhavAt|
avamAnaM ca daurAtmyAdvismayaM paramaM yayuH||41||

tatO'vizanvanaM candra jyOtsnA yAvadvibhAvyatE|
tamaH praviSTamAlakSya tatO nivavRtuH striyaH||42||

tanmanaskAstadalApAstadvicESTAstadAtmikAH|
tadguNAnEva gAyantyO nAtmagArANi sasmaruH||43||

punaH pulinamAgatya kAlindyAH kRSNabhAvanAH
samavEtA jaguH kRSNaM tadAgamanakAGkSitAH||44||