From StotraSamhita
< Bhagavatam | Skandha 04
dazamO'dhyAyaH
maitrEya uvAca
prajApatErduhitaraM zizumArasya vai dhruvaH| upayEmE bhramiM nAma tatsutau kalpavatsarau||1|| |
ilAyAmapi bhAryAyAM vAyOH putryAM mahAbalaH| putramutkalanAmAnaM yOSidratnamajIjanat||2|| |
uttamastvakRtOdvAhO mRgayAyAM balIyasA| hataH puNyajanEnAdrau tanmAtAsya gatiM gatA||3|| |
dhruvO bhrAtRvadhaM zrutvA kOpAmarSazucArpitaH| jaitraM syandanamAsthAya gataH puNyajanAlayam||4|| |
gatvOdIcIM dizaM rAjA rudrAnucarasEvitAm| dadarza himavaddrONyAM purIM guhyakasaGkulAm||5|| |
dadhmau zaGkhaM bRhadbAhuH khaM dizazcAnunAdayan| yEnOdvignadRzaH kSattarupadEvyO'trasanbhRzam||6|| |
tatO niSkramya balina upadEvamahAbhaTAH| asahantastanninAdamabhipEturudAyudhAH||7|| |
sa tAnApatatO vIra ugradhanvA mahArathaH| EkaikaM yugapatsarvAnahanbANaistribhistribhiH||8|| |
tE vai lalATalagnaistairiSubhiH sarva Eva hi| matvA nirastamAtmAnamAzaMsankarma tasya tat||9|| |
tE'pi cAmumamRSyantaH pAdasparzamivOragAH| zarairavidhyanyugapaddviguNaM pracikIrSavaH||10|| |
tataH parighanistriMzaiH prAsazUlaparazvadhaiH| zaktyRSTibhirbhuzuNDIbhizcitravAjaiH zarairapi||11|| |
abhyavarSanprakupitAH sarathaM sahasArathim| icchantastatpratIkartumayutAnAM trayOdaza||12|| |
auttAnapAdiH sa tadA zastravarSENa bhUriNA| na EvAdRzyatAcchanna AsArENa yathA giriH||13|| |
hAhAkArastadaivAsItsiddhAnAM divi pazyatAm| hatO'yaM mAnavaH sUryO magnaH puNyajanArNavE||14|| |
nadatsu yAtudhAnESu jayakAziSvathO mRdhE| udatiSThadrathastasya nIhArAdiva bhAskaraH||15|| |
dhanurvisphUrjayandivyaM dviSatAM khEdamudvahan| astraughaM vyadhamadbANairghanAnIkamivAnilaH||16|| |
tasya tE cApanirmuktA bhittvA varmANi rakSasAm| kAyAnAvivizustigmA girInazanayO yathA||17|| |
bhallaiH saJchidyamAnAnAM zirObhizcArukuNDalaiH| UrubhirhEmatAlAbhairdOrbhirvalayavalgubhiH||18|| |
hArakEyUramukuTairuSNISaizca mahAdhanaiH| AstRtAstA raNabhuvO rEjurvIramanOharAH||19|| |
hatAvaziSTA itarE raNAjirAdrakSOgaNAH kSatriyavaryasAyakaiH| prAyO vivRkNAvayavA vidudruvurmRgEndravikrIDitayUthapA iva||20|| |
apazyamAnaH sa tadAtatAyinaM mahAmRdhE kaJcana mAnavOttamaH| purIM didRkSannapi nAvizaddviSAM na mAyinAM vEda cikIrSitaM janaH||21|| |
iti bruvaMzcitrarathaH svasArathiM yattaH parESAM pratiyOgazaGkitaH| zuzrAva zabdaM jaladhErivEritaM nabhasvatO dikSu rajO'nvadRzyata||22|| |
kSaNEnAcchAditaM vyOma ghanAnIkEna sarvataH| visphurattaDitA dikSu trAsayatstanayitnunA||23|| |
vavRSU rudhiraughAsRk pUyaviNmUtramEdasaH| nipEturgaganAdasya kabandhAnyagratO'nagha||24|| |
tataH khE'dRzyata girirnipEtuH sarvatOdizam| gadAparighanistriMza musalAH sAzmavarSiNaH||25|| |
ahayO'zaniniHzvAsA vamantO'gniM ruSAkSibhiH| abhyadhAvangajA mattAH siMhavyAghrAzca yUthazaH||26|| |
samudra UrmibhirbhImaH plAvayansarvatO bhuvam| AsasAda mahAhrAdaH kalpAnta iva bhISaNaH||27|| |
EvaMvidhAnyanEkAni trAsanAnyamanasvinAm| sasRjustigmagataya AsuryA mAyayAsurAH||28|| |
dhruvE prayuktAmasuraistAM mAyAmatidustarAm| nizamya tasya munayaH zamAzaMsansamAgatAH||29|| |
munaya UcuH
auttAnapAda bhagavAMstava zArGgadhanvA dEvaH kSiNOtvavanatArtiharO vipakSAn yannAmadhEyamabhidhAya nizamya cAddhA lOkO'JjasA tarati dustaramaGga mRtyum||30|| |
||iti zrImadbhAgavatE mahApurANE pAramahaMsyAM saMhitAyAM caturthaskandhE dazamO'dhyAyaH||
