From StotraSamhita

SaTtriMzO'dhyAyaH

zrI bAdarAyaNiruvAca

atha tarhyAgatO gOSThamariSTO vRSabhAsuraH| mahImmahAkakutkAyaH kampayankhuravikSatAm||1||

rambhamANaH kharataraM padA ca vilikhanmahIm udyamya pucchaM vaprANi viSANAgrENa cOddharan kiJcitkiJcicchakRnmuJcanmUtrayanstabdhalOcanaH||2||

yasya nirhrAditEnAGga niSThurENa gavAM nRNAm| patantyakAlatO garbhAH sravanti sma bhayEna vai||3||

nirvizanti ghanA yasya kakudyacalazaGkayA| taM tIkSNazRGgamudvIkSya gOpyO gOpAzca tatrasuH||4||

pazavO dudruvurbhItA rAjansantyajya gOkulam| kRSNa kRSNEti tE sarvE gOvindaM zaraNaM yayuH||5||

bhagavAnapi tadvIkSya gOkulaM bhayavidrutam| mA bhaiSTEti girAzvAsya vRSAsuramupAhvayat||6||

gOpAlaiH pazubhirmanda trAsitaiH kimasattama| mayi zAstari duSTAnAM tvadvidhAnAM durAtmanAm||7||

ityAsphOtyAcyutO'riSTaM talazabdEna kOpayan| sakhyuraMsE bhujAbhOgaM prasAryAvasthitO hariH||8||

sO'pyEvaM kOpitO'riSTaH khurENAvanimullikhan| udyatpucchabhramanmEghaH kruddhaH kRSNamupAdravat||9||

agranyastaviSANAgraH stabdhAsRglOcanO'cyutam| kaTAkSipyAdravattUrNamindramuktO'zaniryathA||10||

gRhItvA zRGgayOstaM vA aSTAdaza padAni saH| pratyapOvAha bhagavAngajaH pratigajaM yathA||11||

sO'paviddhO bhagavatA punarutthAya satvaram| ApatatsvinnasarvAGgO niHzvasankrOdhamUrcchitaH||12||

tamApatantaM sa nigRhya zRGgayOH padA samAkramya nipAtya bhUtalE| niSpIDayAmAsa yathArdramambaraM kRtvA viSANEna jaghAna sO'patat||13||

asRgvamanmUtrazakRtsamutsRjankSipaMzca pAdAnanavasthitEkSaNaH| jagAma kRcchraM nirRtEratha kSayaM puSpaiH kirantO harimIDirE surAH||14||

EvaM kukudminaM hatvA stUyamAnaH dvijAtibhiH| vivEza gOSThaM sabalO gOpInAM nayanOtsavaH||15||

ariSTE nihatE daityE kRSNEnAdbhutakarmaNA| kaMsAyAthAha bhagavAnnAradO dEvadarzanaH||16||

yazOdAyAH sutAM kanyAM dEvakyAH kRSNamEva ca rAmaM ca rOhiNIputraM vasudEvEna bibhyatA nyastau svamitrE nandE vai yAbhyAM tE puruSA hatAH||17||

nizamya tadbhOjapatiH kOpAtpracalitEndriyaH| nizAtamasimAdatta vasudEvajighAMsayA||18||

nivAritO nAradEna tatsutau mRtyumAtmanaH| jJAtvA lOhamayaiH pAzairbabandha saha bhAryayA||19||

pratiyAtE tu dEvarSau kaMsa AbhASya kEzinam| prESayAmAsa hanyEtAM bhavatA rAmakEzavau||20||

tatO muSTikacANUra zalatOzalakAdikAn| amAtyAnhastipAMzcaiva samAhUyAha bhOjarAT||21||

bhO bhO nizamyatAmEtadvIracANUramuSTikau| nandavrajE kilAsAtE sutAvAnakadundubhEH||22||

rAmakRSNau tatO mahyaM mRtyuH kila nidarzitaH| bhavadbhyAmiha samprAptau hanyEtAM mallalIlayA||23||

maJcAH kriyantAM vividhA mallaraGgaparizritAH| paurA jAnapadAH sarvE pazyantu svairasaMyugam||24||

mahAmAtra tvayA bhadra raGgadvAryupanIyatAm| dvipaH kuvalayApIDO jahi tEna mamAhitau||25||

ArabhyatAM dhanuryAgazcaturdazyAM yathAvidhi| vizasantu pazUnmEdhyAnbhUtarAjAya mIDhuSE||26||

ityAjJApyArthatantrajJa AhUya yadupuGgavam| gRhItvA pANinA pANiM tatO'krUramuvAca ha||27||

bhO bhO dAnapatE mahyaM kriyatAM maitramAdRtaH| nAnyastvattO hitatamO vidyatE bhOjavRSNiSu||28||

atastvAmAzritaH saumya kAryagauravasAdhanam| yathEndrO viSNumAzritya svArthamadhyagamadvibhuH||29||

gaccha nandavrajaM tatra sutAvAnakadundubhEH| AsAtE tAvihAnEna rathEnAnaya mA ciram||30||

nisRSTaH kila mE mRtyurdEvairvaikuNThasaMzrayaiH| tAvAnaya samaM gOpairnandAdyaiH sAbhyupAyanaiH||31||

ghAtayiSya ihAnItau kAlakalpEna hastinA| yadi muktau tatO mallairghAtayE vaidyutOpamaiH||32||

tayOrnihatayOstaptAnvasudEvapurOgamAn| tadbandhUnnihaniSyAmi vRSNibhOjadazArhakAn||33||

ugrasEnaM ca pitaraM sthaviraM rAjyakAmukaM| tadbhrAtaraM dEvakaM ca yE cAnyE vidviSO mama||34||

tatazcaiSA mahI mitra| bhavitrI naSTakaNTakA||35||

jarAsandhO mama gururdvividO dayitaH sakhA zambarO narakO bANO mayyEva kRtasauhRdAH tairahaM surapakSIyAnhatvA bhOkSyE mahIM nRpAn||36||

EtajjJAtvAnaya kSipraM rAmakRSNAvihArbhakau| dhanurmakhanirIkSArthaM draSTuM yadupurazriyam||37||

zrIakrUra uvAca

rAjanmanISitaM sadhryaktava svAvadyamArjanam| siddhyasiddhyOH samaM kuryAddaivaM hi phalasAdhanam||38||

manOrathAnkarOtyuccairjanO daivahatAnapi| yujyatE harSazOkAbhyAM tathApyAjJAM karOmi tE||39||

zrIzuka uvAca

EvamAdizya cAkrUraM mantriNazca viSRjya saH pravivEza gRhaM kaMsastathAkrUraH svamAlayam||40||

||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE SaTtriMzO'dhyAyaH||

See Also

• http://vedabase.net/sb/10/36/en