From StotraSamhita
< Bhagavatam | Skandha 10
tRtIyO'dhyAyaH
zrIzuka uvAca
atha sarvaguNOpEtaH kAlaH paramazObhanaH| yarhyEvAjanajanmarkSaM zAntarkSagrahatArakam||1|| |
dizaH prasEdurgaganaM nirmalODugaNOdayam| mahI maGgalabhUyiSTha puragrAmavrajAkarA||2|| |
nadyaH prasannasalilA hradA jalaruhazriyaH| dvijAlikulasannAda stavakA vanarAjayaH||3|| |
vavau vAyuH sukhasparzaH puNyagandhavahaH zuciH| agnayazca dvijAtInAM zAntAstatra samindhata||4|| |
manAMsyAsanprasannAni sAdhUnAmasuradruhAm| jAyamAnE'janE tasminnEdurdundubhayaH samam||5|| |
jaguH kinnaragandharvAstuSTuvuH siddhacAraNAH| vidyAdharyazca nanRturapsarObhiH samaM mudA||6|| |
mumucurmunayO dEvAH sumanAMsi mudAnvitAH| mandaM mandaM jaladharA jagarjuranusAgaram||7|| |
nizIthE tama udbhUtE jAyamAnE janArdanE| dEvakyAM dEvarUpiNyAM viSNuH sarvaguhAzayaH| AvirAsIdyathA prAcyAM dizInduriva puSkalaH||8|| |
tamadbhutaM bAlakamambujEkSaNaM caturbhujaM zaGkhagadAdyudAyudham| zrIvatsalakSmaM galazObhikaustubhaM pItAmbaraM sAndrapayOdasaubhagam||9|| |
mahArhavaidUryakirITakuNDala tviSA pariSvaktasahasrakuntalam| uddAmakAJcyaGgadakaGkaNAdibhirvirOcamAnaM vasudEva aikSata||10|| |
sa vismayOtphullavilOcanO hariM sutaM vilOkyAnakadundubhistadA| kRSNAvatArOtsavasambhramO'spRzanmudA dvijEbhyO'yutamAplutO gavAm||11|| |
athainamastaudavadhArya pUruSaM paraM natAGgaH kRtadhIH kRtAJjaliH| svarOciSA bhArata sUtikAgRhaM virOcayantaM gatabhIH prabhAvavit||12|| |
zrIvasudEva uvAca
viditO'si bhavAnsAkSAtpuruSaH prakRtEH paraH| kEvalAnubhavAnanda svarUpaH sarvabuddhidRk||13|| |
sa Eva svaprakRtyEdaM sRSTvAgrE triguNAtmakam| tadanu tvaM hyapraviSTaH praviSTa iva bhAvyasE||14|| |
yathEmE'vikRtA bhAvAstathA tE vikRtaiH saha| nAnAvIryAH pRthagbhUtA virAjaM janayanti hi||15|| |
sannipatya samutpAdya dRzyantE'nugatA iva| prAgEva vidyamAnatvAnna tESAmiha sambhavaH||16|| |
EvaM bhavAnbuddhyanumEyalakSaNairgrAhyairguNaiH sannapi tadguNAgrahaH| anAvRtatvAdbahirantaraM na tE sarvasya sarvAtmana AtmavastunaH||17|| |
ya AtmanO dRzyaguNESu sanniti vyavasyatE svavyatirEkatO'budhaH| vinAnuvAdaM na ca tanmanISitaM samyagyatastyaktamupAdadatpumAn||18|| |
tvattO'sya janmasthitisaMyamAnvibhO vadantyanIhAdaguNAdavikriyAt| tvayIzvarE brahmaNi nO virudhyatE tvadAzrayatvAdupacaryatE guNaiH||19|| |
sa tvaM trilOkasthitayE svamAyayA bibharSi zuklaM khalu varNamAtmanaH| sargAya raktaM rajasOpabRMhitaM kRSNaM ca varNaM tamasA janAtyayE||20|| |
tvamasya lOkasya vibhO rirakSiSurgRhE'vatIrNO'si mamAkhilEzvara| rAjanyasaMjJAsurakOTiyUthapairnirvyUhyamAnA nihaniSyasE camUH||21|| |
ayaM tvasabhyastava janma nau gRhE zrutvAgrajAMstE nyavadhItsurEzvara| sa tE'vatAraM puruSaiH samarpitaM zrutvAdhunaivAbhisaratyudAyudhaH||22|| |
zrIzuka uvAca
athainamAtmajaM vIkSya mahApuruSalakSaNam| dEvakI tamupAdhAvatkaMsAdbhItA suvismitA||23|| |
zrIdEvakyuvAca
rUpaM yattatprAhuravyaktamAdyaM brahma jyOtirnirguNaM nirvikAram| sattAmAtraM nirvizESaM nirIhaM sa tvaM sAkSAdviSNuradhyAtmadIpaH||24|| |
naSTE lOkE dviparArdhAvasAnE mahAbhUtESvAdibhUtaM gatESu| vyaktE'vyaktaM kAlavEgEna yAtE bhavAnEkaH ziSyatE'zESasaMjJaH||25|| |
yO'yaM kAlastasya tE'vyaktabandhO cESTAmAhuzcESTatE yEna vizvam| nimESAdirvatsarAntO mahIyAMs taM tvEzAnaM kSEmadhAma prapadyE||26|| |
martyO mRtyuvyAlabhItaH palAyanlOkAnsarvAnnirbhayaM nAdhyagacchat| tvatpAdAbjaM prApya yadRcchayAdya susthaH zEtE mRtyurasmAdapaiti||27|| |
sa tvaM ghOrAdugrasEnAtmajAnnastrAhi trastAnbhRtyavitrAsahAsi| rUpaM cEdaM pauruSaM dhyAnadhiSNyaM mA pratyakSaM mAMsadRzAM kRSISThAH||28|| |
janma tE mayyasau pApO mA vidyAnmadhusUdana| samudvijE bhavaddhEtOH kaMsAdahamadhIradhIH||29|| |
upasaMhara vizvAtmannadO rUpamalaukikam| zaGkhacakragadApadma zriyA juSTaM caturbhujam||30|| |
vizvaM yadEtatsvatanau nizAntE yathAvakAzaM puruSaH parO bhavAn| bibharti sO'yaM mama garbhagO'bhUdahO nRlOkasya viDambanaM hi tat||31|| |
zrIbhagavAnuvAca
tvamEva pUrvasargE'bhUH pRzniH svAyambhuvE sati| tadAyaM sutapA nAma prajApatirakalmaSaH||32|| |
yuvAM vai brahmaNAdiSTau prajAsargE yadA tataH| sanniyamyEndriyagrAmaM tEpAthE paramaM tapaH||33|| |
varSavAtAtapahima gharmakAlaguNAnanu| sahamAnau zvAsarOdha vinirdhUtamanOmalau||34|| |
zIrNaparNAnilAhArAvupazAntEna cEtasA| mattaH kAmAnabhIpsantau madArAdhanamIhatuH||35|| |
EvaM vAM tapyatOstIvraM tapaH paramaduSkaram| divyavarSasahasrANi dvAdazEyurmadAtmanOH||36|| |
tadA vAM parituSTO'hamamunA vapuSAnaghE| tapasA zraddhayA nityaM bhaktyA ca hRdi bhAvitaH||37|| |
prAdurAsaM varadarADyuvayOH kAmaditsayA| vriyatAM vara ityuktE mAdRzO vAM vRtaH sutaH||38|| |
ajuSTagrAmyaviSayAvanapatyau ca dampatI| na vavrAthE'pavargaM mE mOhitau dEvamAyayA||39|| |
gatE mayi yuvAM labdhvA varaM matsadRzaM sutam| grAmyAnbhOgAnabhuJjAthAM yuvAM prAptamanOrathau||40|| |
adRSTvAnyatamaM lOkE zIlaudAryaguNaiH samam| ahaM sutO vAmabhavaM pRznigarbha iti zrutaH||41|| |
tayOrvAM punarEvAhamadityAmAsa kazyapAt| upEndra iti vikhyAtO vAmanatvAcca vAmanaH||42|| |
tRtIyE'sminbhavE'haM vai tEnaiva vapuSAtha vAm| jAtO bhUyastayOrEva satyaM mE vyAhRtaM sati||43|| |
EtadvAM darzitaM rUpaM prAgjanmasmaraNAya mE| nAnyathA madbhavaM jJAnaM martyaliGgEna jAyatE||44|| |
yuvAM mAM putrabhAvEna brahmabhAvEna cAsakRt| cintayantau kRtasnEhau yAsyEthE madgatiM parAm||45|| |
zrIzuka uvAca
ityuktvAsIddharistUSNIM bhagavAnAtmamAyayA| pitrOH sampazyatOH sadyO babhUva prAkRtaH zizuH||46|| |
tatazca zaurirbhagavatpracOditaH sutaM samAdAya sa sUtikAgRhAt| yadA bahirgantumiyESa tarhyajA yA yOgamAyAjani nandajAyayA||47|| |
tayA hRtapratyayasarvavRttiSu dvAHsthESu paurESvapi zAyitESvatha| dvArazca sarvAH pihitA duratyayA bRhatkapATAyasakIlazRGkhalaiH||48|| |
tAH kRSNavAhE vasudEva AgatE svayaM vyavaryanta yathA tamO ravEH| vavarSa parjanya upAMzugarjitaH zESO'nvagAdvAri nivArayanphaNaiH||49|| |
maghOni varSatyasakRdyamAnujA gambhIratOyaughajavOrmiphEnilA| bhayAnakAvartazatAkulA nadI mArgaM dadau sindhuriva zriyaH patEH||50|| |
nandavrajaM zaurirupEtya tatra tAn gOpAnprasuptAnupalabhya nidrayA| sutaM yazOdAzayanE nidhAya tat sutAmupAdAya punargRhAnagAt||51|| |
dEvakyAH zayanE nyasya vasudEvO'tha dArikAm| pratimucya padOrlOhamAstE pUrvavadAvRtaH||52|| |
yazOdA nandapatnI ca jAtaM paramabudhyata na talliGgaM parizrAntA nidrayApagatasmRtiH||53|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE tRtIyO'dhyAyaH||
