From StotraSamhita

EkasaptatitamO'dhyAyaH

zrIzuka uvAca

ityudIritamAkarNya dEvaRSEruddhavO'bravIt| sabhyAnAM matamAjJAya kRSNasya ca mahAmatiH||1||

zrIuddhava uvAca

yaduktamRSinA dEva sAcivyaM yakSyatastvayA| kAryaM paitRSvasrEyasya rakSA ca zaraNaiSiNAm||2||

yaSTavyamrAjasUyEna dikcakrajayinA vibhO| atO jarAsutajaya ubhayArthO matO mama||3||

asmAkaM ca mahAnarthO hyEtEnaiva bhaviSyati| yazazca tava gOvinda rAjJO baddhAnvimuJcataH||4||

sa vai durviSahO rAjA nAgAyutasamO balE| balinAmapi cAnyESAM bhImaM samabalaM vinA||5||

dvairathE sa tu jEtavyO mA zatAkSauhiNIyutaH| brAhmaNyO'bhyarthitO viprairna pratyAkhyAti karhicit||6||

brahmavESadharO gatvA taM bhikSEta vRkOdaraH| haniSyati na sandEhO dvairathE tava sannidhau||7||

nimittaM paramIzasya vizvasarganirOdhayOH| hiraNyagarbhaH zarvazca kAlasyArUpiNastava||8||

gAyanti tE vizadakarma gRhESu dEvyO rAjJAM svazatruvadhamAtmavimOkSaNaM ca| gOpyazca kuJjarapatErjanakAtmajAyAH pitrOzca labdhazaraNA munayO vayaM ca||9||

jarAsandhavadhaH kRSNa bhUryarthAyOpakalpatE| prAyaH pAkavipAkEna tava cAbhimataH kratuH||10||

zrIzuka uvAca

ityuddhavavacO rAjansarvatObhadramacyutam| dEvarSiryaduvRddhAzca kRSNazca pratyapUjayan||11||

athAdizatprayANAya bhagavAndEvakIsutaH| bhRtyAndArukajaitrAdInanujJApya gurUnvibhuH||12||

nirgamayyAvarOdhAnsvAnsasutAnsaparicchadAn saGkarSaNamanujJApya yadurAjaM ca zatruhan sUtOpanItaM svarathamAruhadgaruDadhvajam||13||

tatO rathadvipabhaTasAdinAyakaiH karAlayA parivRta AtmasEnayA| mRdaGgabhEryAnakazaGkhagOmukhaiH praghOSaghOSitakakubhO nirakramat||14||

nRvAjikAJcanazibikAbhiracyutaM sahAtmajAH patimanu suvratA yayuH| varAmbarAbharaNavilEpanasrajaH susaMvRtA nRbhirasicarmapANibhiH||15||

narOSTragOmahiSakharAzvataryanaH karENubhiH parijanavArayOSitaH| svalaGkRtAH kaTakuTikambalAmbarAdy upaskarA yayuradhiyujya sarvataH||16||

balaM bRhaddhvajapaTachatracAmarair varAyudhAbharaNakirITavarmabhiH| divAMzubhistumularavaM babhau ravEr yathArNavaH kSubhitatimiGgilOrmibhiH||17||

athO muniryadupatinA sabhAjitaH praNamya taM hRdi vidadhadvihAyasA| nizamya tadvyavasitamAhRtArhaNO mukundasandarazananirvRtEndriyaH||18||

rAjadUtamuvAcEdaM bhagavAnprINayangirA| mA bhaiSTa dUta bhadraM vO ghAtayiSyAmi mAgadham||19||

ityuktaH prasthitO dUtO yathAvadavadannRpAn| tE'pi sandarzanaM zaurEH pratyaikSanyanmumukSavaH||20||

AnartasauvIramarUMstIrtvA vinazanaM hariH| girInnadIratIyAya puragrAmavrajAkarAn||21||

tatO dRSadvatIM tIrtvA mukundO'tha sarasvatIm| paJcAlAnatha matsyAMzca zakraprasthamathAgamat||22||

tamupAgatamAkarNya prItO durdarzanaM nRnAm| ajAtazatrurniragAtsOpadhyAyaH suhRdvRtaH||23||

gItavAditraghOSENa brahmaghOSENa bhUyasA| abhyayAtsa hRSIkEzaM prANAH prANamivAdRtaH||24||

dRSTvA viklinnahRdayaH kRSNaM snEhEna pANDavaH| cirAddRSTaM priyatamaM sasvajE'tha punaH punaH||25||

dOrbhyAM pariSvajya ramAmalAlayaM mukundagAtraM nRpatirhatAzubhaH| lEbhE parAM nirvRtimazrulOcanO hRSyattanurvismRtalOkavibhramaH||26||

taM mAtulEyaM parirabhya nirvRtO bhImaH smayanprEmajalAkulEndriyaH| yamau kirITI ca suhRttamaM mudA pravRddhabASpAH parirEbhirE'cyutam||27||

arjunEna pariSvaktO yamAbhyAmabhivAditaH brAhmaNEbhyO namaskRtya vRddhEbhyazca yathArhataH mAninO mAnayAmAsa kurusRJjayakaikayAn||28||

sUtamAgadhagandharvA vandinazcOpamantriNaH mRdaGgazaGkhapaTaha vINApaNavagOmukhaiH brAhmaNAzcAravindAkSaM tuSTuvurnanRturjaguH||29||

EvaM suhRdbhiH paryastaH puNyazlOkazikhAmaNiH| saMstUyamAnO bhagavAnvivEzAlaGkRtaM puram||30||

saMsiktavartma kariNAM madagandhatOyaiz citradhvajaiH kanakatOraNapUrNakumbhaiH| mRSTAtmabhirnavadukUlavibhUSaNasrag gandhairnRbhiryuvatibhizca virAjamAnam||31||

uddIptadIpabalibhiH pratisadma jAla niryAtadhUparuciraM vilasatpatAkam| mUrdhanyahEmakalazai rajatOruzRGgair juSTaM dadarza bhavanaiH kururAjadhAma||32||

prAptaM nizamya naralOcanapAnapAtram autsukyavizlathitakEzadukUlabandhAH| sadyO visRjya gRhakarma patIMzca talpE draSTuM yayuryuvatayaH sma narEndramArgE||33||

tasminsusaGkula ibhAzvarathadvipadbhiH kRSNamsabhAryamupalabhya gRhAdhirUDhAH| nAryO vikIrya kusumairmanasOpaguhya susvAgataM vidadhurutsmayavIkSitEna||34||

UcuH striyaH pathi nirIkSya mukundapatnIs tArA yathODupasahAH kimakAryamUbhiH| yaccakSuSAM puruSamaulirudArahAsa lIlAvalOkakalayOtsavamAtanOti||35||

tatra tatrOpasaGgamya paurA maGgalapANayaH| cakruH saparyAM kRSNAya zrENImukhyA hatainasaH||36||

antaHpurajanaiH prItyA mukundaH phullalOcanaiH| sasambhramairabhyupEtaH prAvizadrAjamandiram||37||

pRthA vilOkya bhrAtrEyaM kRSNaM tribhuvanEzvaram| prItAtmOtthAya paryaGkAtsasnuSA pariSasvajE||38||

gOvindaM gRhamAnIya dEvadEvEzamAdRtaH| pUjAyAM nAvidatkRtyaM pramOdOpahatO nRpaH||39||

pitRsvasurgurustrINAM kRSNazcakrE'bhivAdanam| svayaM ca kRSNayA rAjanbhaginyA cAbhivanditaH||40||

zvazRvA saJcOditA kRSNA kRSNapatnIzca sarvazaH| Anarca rukmiNIM satyAM bhadrAM jAmbavatIM tathA||41||

kAlindIM mitravindAM ca zaibyAM nAgnajitIM satIm| anyAzcAbhyAgatA yAstu vAsaHsraGmaNDanAdibhiH||42||

sukhaM nivAsayAmAsa dharmarAjO janArdanam| sasainyaM sAnugAmatyaM sabhAryaM ca navaM navam||43||

tarpayitvA khANDavEna vahniM phAlgunasaMyutaH| mOcayitvA mayaM yEna rAjJE divyA sabhA kRtA||44||

uvAsa katicinmAsAnrAjJaH priyacikIrSayA viharanrathamAruhya phAlgunEna bhaTairvRtaH||45||

||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE EkasaptatitamO'dhyAyaH||

See Also

• http://vedabase.net/sb/10/71/en