From StotraSamhita
< Bhagavatam | Skandha 10
zrIzuka uvAca
sarasvatyAstaTE rAjannRSayaH satramAsata| vitarkaH samabhUttESAM triSvadhIzESu kO mahAn||1|| |
tasya jijJAsayA tE vai bhRguM brahmasutaM nRpa| tajjJaptyai prESayAmAsuH sO'bhjagAdbrahmaNaH sabhAm||2|| |
na tasmai prahvaNaM stOtraM cakrE sattvaparIkSayA| tasmai cukrOdha bhagavAnprajvalansvEna tEjasA||3|| |
sa AtmanyutthitammanyumAtmajAyAtmanA prabhuH| azIzamadyathA vahniM svayOnyA vAriNAtmabhUH||4|| |
tataH kailAsamagamatsa taM dEvO mahEzvaraH| parirabdhuM samArEbha utthAya bhrAtaraM mudA||5|| |
naicchattvamasyutpathaga iti dEvazcukOpa ha| zUlamudyamya taM hantumArEbhE tigmalOcanaH||6|| |
patitvA pAdayOrdEvI sAntvayAmAsa taM girA| athO jagAma vaikuNThaM yatra dEvO janArdanaH||7|| |
zayAnaM zriya utsaGgE padA vakSasyatADayat| tata utthAya bhagavAnsaha lakSmyA satAM gatiH||8|| |
svatalpAdavaruhyAtha nanAma zirasA munim Aha tE svAgataM brahmanniSIdAtrAsanE kSaNam ajAnatAmAgatAnvaH kSantumarhatha naH prabhO||9|| |
punIhi sahalOkaM mAM lOkapAlAMzca madgatAn| pAdOdakEna bhavatastIrthAnAM tIrthakAriNA||10|| |
adyAhaM bhagavaMllakSmyA AsamEkAntabhAjanam| vatsyatyurasi mE bhUtirbhavatpAdahatAMhasaH||11|| |
zrIzuka uvAca
EvaM bruvANE vaikuNThE bhRgustanmandrayA girA| nirvRtastarpitastUSNIM bhaktyutkaNThO'zrulOcanaH||12|| |
punazca satramAvrajya munInAM brahmavAdinAm| svAnubhUtamazESENa rAjanbhRguravarNayat||13|| |
tannizamyAtha munayO vismitA muktasaMzayAH| bhUyAMsaM zraddadhurviSNuM yataH zAntiryatO'bhayam||14|| |
dharmaH sAkSAdyatO jJAnaM vairAgyaM ca tadanvitam| aizvaryaM cASTadhA yasmAdyazazcAtmamalApaham||15|| |
munInAM nyastadaNDAnAM zAntAnAM samacEtasAm| akiJcanAnAM sAdhUnAM yamAhuH paramAM gatim||16|| |
sattvaM yasya priyA mUrtirbrAhmaNAstviSTadEvatAH| bhajantyanAziSaH zAntA yaM vA nipuNabuddhayaH||17|| |
trividhAkRtayastasya rAkSasA asurAH surAH| guNinyA mAyayA sRSTAH sattvaM tattIrthasAdhanam||18|| |
zrIzuka uvAca
itthaM sArasvatA viprA nRNAmsaMzayanuttayE| puruSasya padAmbhOja sEvayA tadgatiM gatAH||19|| |
zrIsUta uvAca
ityEtanmunitanayAsyapadmagandha pIyUSaM bhavabhayabhitparasya puMsaH| suzlOkaM zravaNapuTaiH pibatyabhIkSNam pAnthO'dhvabhramaNaparizramaM jahAti||20|| |
zrIzuka uvAca
EkadA dvAravatyAM tu viprapatnyAH kumArakaH| jAtamAtrO bhuvaM spRSTvA mamAra kila bhArata||21|| |
viprO gRhItvA mRtakaM rAjadvAryupadhAya saH| idaM prOvAca vilapannAturO dInamAnasaH||22|| |
brahmadviSaH zaThadhiyO lubdhasya viSayAtmanaH| kSatrabandhOH karmadOSAtpaJcatvaM mE gatO'rbhakaH||23|| |
hiMsAvihAraM nRpatiM duHzIlamajitEndriyam| prajA bhajantyaH sIdanti daridrA nityaduHkhitAH||24|| |
EvaM dvitIyaM viprarSistRtIyaM tvEvamEva ca| visRjya sa nRpadvAri tAM gAthAM samagAyata||25|| |
tAmarjuna upazrutya karhicitkEzavAntikE| parEtE navamE bAlE brAhmaNaM samabhASata||26|| |
kiM svidbrahmaMstvannivAsE iha nAsti dhanurdharaH| rAjanyabandhurEtE vai brAhmaNAH satramAsatE||27|| |
dhanadArAtmajApRktA yatra zOcanti brAhmaNAH| tE vai rAjanyavESENa naTA jIvantyasumbharAH||28|| |
ahaM prajAH vAM bhagavanrakSiSyE dInayOriha| anistIrNapratijJO'gniM pravEkSyE hatakalmaSaH||29|| |
zrIbrAhmaNa uvAca
saGkarSaNO vAsudEvaH pradyumnO dhanvinAM varaH| aniruddhO'pratirathO na trAtuM zaknuvanti yat||30|| |
tatkathaM nu bhavAnkarma duSkaraM jagadIzvaraiH| tvaM cikIrSasi bAlizyAttanna zraddadhmahE vayam||31|| |
zrIarjuna uvAca
nAhaM saGkarSaNO brahmanna kRSNaH kArSNirEva ca| ahaM vA arjunO nAma gANDIvaM yasya vai dhanuH||32|| |
mAvamaMsthA mama brahmanvIryaM tryambakatOSaNam| mRtyuM vijitya pradhanE AnESyE tE prajAH prabhO||33|| |
EvaM vizrambhitO vipraH phAlgunEna parantapa| jagAma svagRhaM prItaH pArthavIryaM nizAmayan||34|| |
prasUtikAla AsannE bhAryAyA dvijasattamaH| pAhi pAhi prajAM mRtyOrityAhArjunamAturaH||35|| |
sa upaspRzya zucyambhO namaskRtya mahEzvaram| divyAnyastrANi saMsmRtya sajyaM gANDIvamAdadE||36|| |
nyaruNatsUtikAgAraM zarairnAnAstrayOjitaiH| tiryagUrdhvamadhaH pArthazcakAra zarapaJjaram||37|| |
tataH kumAraH saJjAtO viprapatnyA rudanmuhuH| sadyO'darzanamApEdE sazarIrO vihAyasA||38|| |
tadAha viprO vijayaM vinindankRSNasannidhau| mauDhyaM pazyata mE yO'haM zraddadhE klIbakatthanam||39|| |
na pradyumnO nAniruddhO na rAmO na ca kEzavaH| yasya zEkuH paritrAtuM kO'nyastadavitEzvaraH||40|| |
dhigarjunaM mRSAvAdaM dhigAtmazlAghinO dhanuH| daivOpasRSTaM yO mauDhyAdAninISati durmatiH||41|| |
EvaM zapati viprarSau vidyAmAsthAya phAlgunaH| yayau saMyamanImAzu yatrAstE bhagavAnyamaH||42|| |
viprApatyamacakSANastata aindrImagAtpurIm| AgnEyIM nairRtIM saumyAM vAyavyAM vAruNImatha||43|| |
rasAtalaM nAkapRSThaM dhiSNyAnyanyAnyudAyudhaH tatO'labdhadvijasutO hyanistIrNapratizrutaH agniM vivikSuH kRSNEna pratyuktaH pratiSEdhatA||44|| |
darzayE dvijasUnUMstE mAvajJAtmAnamAtmanA| yE tE naH kIrtiM vimalAM manuSyAH sthApayiSyanti||45|| |
iti sambhASya bhagavAnarjunEna sahEzvaraH| divyaM svarathamAsthAya pratIcIM dizamAvizat||46|| |
sapta dvIpAnsasindhUMzca sapta sapta girInatha| lOkAlOkaM tathAtItya vivEza sumahattamaH||47|| |
tatrAzvAH zaibyasugrIva mEghapuSpabalAhakAH| tamasi bhraSTagatayO babhUvurbharatarSabha||48|| |
tAndRSTvA bhagavAnkRSNO mahAyOgEzvarEzvaraH| sahasrAdityasaGkAzaM svacakraM prAhiNOtpuraH||49|| |
tamaH sughOraM gahanaM kRtaM mahad vidArayadbhUritarENa rOciSA| manOjavaM nirvivizE sudarzanaM guNacyutO rAmazarO yathA camUH||50|| |
dvArENa cakrAnupathEna tattamaH paraM paraM jyOtiranantapAram| samaznuvAnaM prasamIkSya phAlgunaH pratADitAkSO pidadhE'kSiNI ubhE||51|| |
tataH praviSTaH salilaM nabhasvatA balIyasaijadbRhadUrmibhUSaNam| tatrAdbhutaM vai bhavanaM dyumattamaM bhrAjanmaNistambhasahasrazObhitam||52|| |
tasminmahAbhOgamanantamadbhutaM sahasramUrdhanyaphaNAmaNidyubhiH| vibhrAjamAnaM dviguNEkSaNOlbaNaM sitAcalAbhaM zitikaNThajihvam||53|| |
dadarza tadbhOgasukhAsanaM vibhuM mahAnubhAvaM puruSOttamOttamam| sAndrAmbudAbhaM supizaGgavAsasaM prasannavaktraM rucirAyatEkSaNam||54|| |
mahAmaNivrAtakirITakuNDala prabhAparikSiptasahasrakuntalam| pralambacArvaSTabhujaM sakaustubhaM zrIvatsalakSmaM vanamAlayAvRtam||55|| |
mahAmaNivrAtakirITakuNDala prabhAparikSiptasahasrakuntalam| pralambacArvaSTabhujaM sakaustubhaM zrIvatsalakSmaM vanamAlayAvRtam||56|| |
vavanda AtmAnamanantamacyutO jiSNuzca taddarzanajAtasAdhvasaH| tAvAha bhUmA paramESThinAM prabhurbEddhAJjalI sasmitamUrjayA girA||57|| |
dvijAtmajA mE yuvayOrdidRkSuNA mayOpanItA bhuvi dharmaguptayE| kalAvatIrNAvavanErbharAsurAnhatvEha bhUyastvarayEtamanti mE||58|| |
pUrNakAmAvapi yuvAM naranArAyaNAvRSI| dharmamAcaratAM sthityai RSabhau lOkasaGgraham||59|| |
ityAdiSTau bhagavatA tau kRSNau paramESThinA| Om ityAnamya bhUmAnamAdAya dvijadArakAn||60|| |
nyavartEtAM svakaM dhAma samprahRSTau yathAgatam| viprAya dadatuH putrAnyathArUpaM yathAvayaH||61|| |
nizAmya vaiSNavaM dhAma pArthaH paramavismitaH| yatkiJcitpauruSaM puMsAM mEnE kRSNAnukampitam||62|| |
itIdRzAnyanEkAni vIryANIha pradarzayan| bubhujE viSayAngrAmyAnIjE cAtyurjitairmakhaiH||63|| |
pravavarSAkhilAnkAmAnprajAsu brAhmaNAdiSu| yathAkAlaM yathaivEndrO bhagavAnzraiSThyamAsthitaH||64|| |
hatvA nRpAnadharmiSThAnghATayitvArjunAdibhiH aJjasA vartayAmAsa dharmaM dharmasutAdibhiH||65|| |
||iti zrImadbhAgavatE mahApurANE pAramahaMsyAM saMhitAyAM dazamaskandhE uttarArdhE EkOnanavatitamO'dhyAyaH||
