From StotraSamhita

viMzO'dhyAyaH

zrIuddhava uvAca

vidhizca pratiSEdhazca nigamO hIzvarasya tE| avEkSatE'raviNDAkSa guNaM dOSaM ca karmaNAm||1||

varNAzramavikalpaM ca pratilOmAnulOmajam| dravyadEzavayaHkAlAnsvargaM narakamEva ca||2||

guNadOSabhidAdRSTimantarENa vacastava| niHzrEyasaM kathaM nRRNAM niSEdhavidhilakSaNam||3||

pitRdEvamanuSyAnAM vEdazcakSustavEzvara| zrEyastvanupalabdhE'rthE sAdhyasAdhanayOrapi||4||

guNadOSabhidAdRSTirnigamAttE na hi svataH| nigamEnApavAdazca bhidAyA iti ha bhramaH||5||

zrIbhagavAnuvAca

yOgAstrayO mayA prOktA nRRNAM zrEyOvidhitsayA| jJAnaM karma ca bhaktizca nOpAyO'nyO'sti kutracit||6||

nirviNNAnAM jJAnayOgO nyAsinAmiha karmasu| tESvanirviNNacittAnAM karmayOgastu kAminAm||7||

yadRcchayA matkathAdau jAtazraddhastu yaH pumAn| na nirviNNO nAtisaktO bhaktiyOgO'sya siddhidaH||8||

tAvatkarmANi kurvIta na nirvidyEta yAvatA| matkathAzravaNAdau vA zraddhA yAvanna jAyatE||9||

svadharmasthO yajanyajJairanAzIHkAma uddhava| na yAti svarganarakau yadyanyanna samAcarEt||10||

asmiMllOkE vartamAnaH svadharmasthO'naghaH zuciH| jJAnaM vizuddhamApnOti madbhaktiM vA yadRcchayA||11||

svargiNO'pyEtamicchanti lOkaM nirayiNastathA| sAdhakaM jJAnabhaktibhyAmubhayaM tadasAdhakam||12||

na naraH svargatiM kAGkSEnnArakIM vA vicakSaNaH| nEmaM lOkaM ca kAGkSEta dEhAvEzAtpramAdyati||13||

EtadvidvAnpurA mRtyOrabhavAya ghaTEta saH| apramatta idaM jJAtvA martyamapyarthasiddhidam||14||

chidyamAnaM yamairEtaiH kRtanIDaM vanaspatim| khagaH svakEtamutsRjya kSEmaM yAti hyalampaTaH||15||

ahOrAtraizchidyamAnaM buddhvAyurbhayavEpathuH| muktasaGgaH paraM buddhvA nirIha upazAmyati||16||

nRdEhamAdyaM sulabhaM sudurlabhaM plavaM sukalpaM gurukarNadhAram| mayAnukUlEna nabhasvatEritaM pumAnbhavAbdhiM na tarEtsa AtmahA||17||

yadArambhESu nirviNNO viraktaH saMyatEndriyaH| abhyAsEnAtmanO yOgI dhArayEdacalaM manaH||18||

dhAryamANaM manO yarhi bhrAmyadazvanavasthitam| atandritO'nurOdhEna mArgENAtmavazaM nayEt||19||

manOgatiM na visRjEjjitaprANO jitEndriyaH| sattvasampannayA buddhyA mana AtmavazaM nayEt||20||

ESa vai paramO yOgO manasaH saGgrahaH smRtaH| hRdayajJatvamanvicchandamyasyEvArvatO muhuH||21||

sAGkhyEna sarvabhAvAnAM pratilOmAnulOmataH| bhavApyayAvanudhyAyEnmanO yAvatprasIdati||22||

nirviNNasya viraktasya puruSasyOktavEdinaH| manastyajati daurAtmyaM cintitasyAnucintayA||23||

yamAdibhiryOgapathairAnvIkSikyA ca vidyayA| mamArcOpAsanAbhirvA nAnyairyOgyaM smarEnmanaH||24||

yadi kuryAtpramAdEna yOgI karma vigarhitam| yOgEnaiva dahEdaMhO nAnyattatra kadAcana||25||

svE svE'dhikArE yA niSThA sa guNaH parikIrtitaH karmaNAM jAtyazuddhAnAmanEna niyamaH kRtaH guNadOSavidhAnEna saGgAnAM tyAjanEcchayA||26||

jAtazraddhO matkathAsu nirviNNaH sarvakarmasu| vEda duHkhAtmakAnkAmAnparityAgE'pyanIzvaraH||27||

tatO bhajEta mAM prItaH zraddhAlurdRDhanizcayaH| juSamANazca tAnkAmAnduHkhOdarkAMzca garhayan||28||

prOktEna bhaktiyOgEna bhajatO mAsakRnmunEH| kAmA hRdayyA nazyanti sarvE mayi hRdi sthitE||29||

bhidyatE hRdayagranthizchidyantE sarvasaMzayAH| kSIyantE cAsya karmANi mayi dRSTE'khilAtmani||30||

tasmAnmadbhaktiyuktasya yOginO vai madAtmanaH| na jJAnaM na ca vairAgyaM prAyaH zrEyO bhavEdiha||31||

yatkarmabhiryattapasA jJAnavairAgyatazca yat| yOgEna dAnadharmENa zrEyObhiritarairapi||32||

sarvaM madbhaktiyOgEna madbhaktO labhatE'JjasA| svargApavargaM maddhAma kathaJcidyadi vAJchati||33||

na kiJcitsAdhavO dhIrA bhaktA hyEkAntinO mama| vAJchantyapi mayA dattaM kaivalyamapunarbhavam||34||

nairapEkSyaM paraM prAhurniHzrEyasamanalpakam| tasmAnnirAziSO bhaktirnirapEkSasya mE bhavEt||35||

na mayyEkAntabhaktAnAM guNadOSOdbhavA guNAH| sAdhUnAM samacittAnAM buddhEH paramupEyuSAm||36||

EvamEtAnmayA diSTAnanutiSThanti mE pathaH kSEmaM vindanti matsthAnaM yadbrahma paramaM viduH||37||

||iti zrImadbhAgavatE mahApurANE pAramahaMsyAM saMhitAyAM EkAdazaskandhE viMzO'dhyAyaH||

See Also

• http://vedabase.net/sb/11/20/en