From StotraSamhita

aSTAdazO'dhyAyaH

zrIzuka uvAca

atha kRSNaH parivRtO jJAtibhirmuditAtmabhiH| anugIyamAnO nyavizadvrajaM gOkulamaNDitam||1||

vrajE vikrIDatOrEvaM gOpAlacchadmamAyayA| grISmO nAmarturabhavannAtiprEyAJcharIriNAm||2||

sa ca vRndAvanaguNairvasanta iva lakSitaH| yatrAstE bhagavAnsAkSAdrAmENa saha kEzavaH||3||

yatra nirjharanirhrAda nivRttasvanajhillikam| zazvattacchIkararjISa drumamaNDalamaNDitam||4||

saritsaraHprasravaNOrmivAyunA kahlArakaJjOtpalarENuhAriNA| na vidyatE yatra vanaukasAM davO nidAghavahnyarkabhavO'tizAdvalE||5||

agAdhatOyahradinItaTOrmibhirdravatpurISyAH pulinaiH samantataH| na yatra caNDAMzukarA viSOlbaNA bhuvO rasaM zAdvalitaM ca gRhNatE||6||

vanaM kusumitaM zrImannadaccitramRgadvijam| gAyanmayUrabhramaraM kUjatkOkilasArasam||7||

krIDiSyamANastatkrSNO bhagavAnbalasaMyutaH| vENuM viraNayangOpairgOdhanaiH saMvRtO'vizat||8||

pravAlabarhastabaka sragdhAtukRtabhUSaNAH| rAmakRSNAdayO gOpA nanRturyuyudhurjaguH||9||

kRSNasya nRtyataH kEcijjaguH kEcidavAdayan| vENupANitalaiH zRGgaiH prazazaMsurathAparE||10||

gOpajAtipraticchannA dEvA gOpAlarUpiNau| IDirE kRSNarAmau ca naTA iva naTaM nRpa||11||

bhramaNairlaGghanaiH kSEpairAsphOTanavikarSaNaiH| cikrIDaturniyuddhEna kAkapakSadharau kvacit||12||

kvacinnRtyatsu cAnyESu gAyakau vAdakau svayam| zazaMsaturmahArAja sAdhu sAdhviti vAdinau||13||

kvacidbilvaiH kvacitkumbhaiH kvacAmalakamuSTibhiH| aspRzyanEtrabandhAdyaiH kvacinmRgakhagEhayA||14||

kvacicca darduraplAvairvividhairupahAsakaiH| kadAcitsyandOlikayA karhicinnRpacESTayA||15||

EvaM tau lOkasiddhAbhiH krIDAbhizcEraturvanE| nadyadridrONikuJjESu kAnanESu saraHsu ca||16||

pazUMzcArayatOrgOpaistadvanE rAmakRSNayOH| gOparUpI pralambO'gAdasurastajjihIrSayA||17||

taM vidvAnapi dAzArhO bhagavAnsarvadarzanaH| anvamOdata tatsakhyaM vadhaM tasya vicintayan||18||

tatrOpAhUya gOpAlAnkRSNaH prAha vihAravit| hE gOpA vihariSyAmO dvandvIbhUya yathAyatham||19||

tatra cakruH parivRDhau gOpA rAmajanArdanau| kRSNasaGghaTTinaH kEcidAsanrAmasya cAparE||20||

AcErurvividhAH krIDA vAhyavAhakalakSaNAH| yatrArOhanti jEtArO vahanti ca parAjitAH||21||

vahantO vAhyamAnAzca cArayantazca gOdhanam| bhANDIrakaM nAma vaTaM jagmuH kRSNapurOgamAH||22||

rAmasaGghaTTinO yarhi zrIdAmavRSabhAdayaH| krIDAyAM jayinastAMstAnUhuH kRSNAdayO nRpa||23||

uvAha kRSNO bhagavAnzrIdAmAnaM parAjitaH| vRSabhaM bhadrasEnastu pralambO rOhiNIsutam||24||

aviSahyaM manyamAnaH kRSNaM dAnavapuGgavaH| vahandrutataraM prAgAdavarOhaNataH param||25||

tamudvahandharaNidharEndragauravaM mahAsurO vigatarayO nijaM vapuH| sa AsthitaH puraTaparicchadO babhau taDiddyumAnuDupativADivAmbudaH||26||

nirIkSya tadvapuralamambarE carat pradIptadRgbhrukuTitaTOgradaMSTrakam| jvalacchikhaM kaTakakirITakuNDala tviSAdbhutaM haladhara ISadatrasat||27||

athAgatasmRtirabhayO ripuM balO vihAya sArthamiva harantamAtmanaH| ruSAhanacchirasi dRDhEna muSTinA surAdhipO girimiva vajraraMhasA||28||

sa AhataH sapadi vizIrNamastakO mukhAdvamanrudhiramapasmRtO'suraH| mahAravaM vyasurapatatsamIrayangiriryathA maghavata AyudhAhataH||29||

dRSTvA pralambaM nihataM balEna balazAlinA| gOpAH suvismitA AsansAdhu sAdhviti vAdinaH||30||

AziSO'bhigRNantastaM prazazaMsustadarhaNam| prEtyAgatamivAliGgya prEmavihvalacEtasaH||31||

pApE pralambE nihatE dEvAH paramanirvRtAH abhyavarSanbalaM mAlyaiH zazaMsuH sAdhu sAdhviti||32||

||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE aSTAdazO'dhyAyaH||

See Also

• http://vedabase.net/sb/10/18/en