Jump to: navigation, search

saptamO'dhyAyaH

zrIzuka uvAca

mAndhAtuH putrapravarO yO'mbarISaH prakIrtitaH
pitAmahEna pravRtO yauvanAzvastu tatsutaH
hArItastasya putrO'bhUnmAndhAtRpravarA imE||1||

narmadA bhrAtRbhirdattA purukutsAya yOragaiH|
tayA rasAtalaM nItO bhujagEndraprayuktayA||2||

gandharvAnavadhIttatra vadhyAnvai viSNuzaktidhRk|
nAgAllabdhavaraH sarpAdabhayaM smaratAmidam||3||

trasaddasyuH paurukutsO yO'naraNyasya dEhakRt|
haryazvastatsutastasmAtprAruNO'tha tribandhanaH||4||

tasya satyavrataH putrastrizaGkuriti vizrutaH|
prAptazcANDAlatAM zApAdgurOH kauzikatEjasA||5||

sazarIrO gataH svargamadyApi divi dRzyatE|
pAtitO'vAkSirA dEvaistEnaiva stambhitO balAt||6||

traizaGkavO harizcandrO vizvAmitravasiSThayOH|
yannimittamabhUdyuddhaM pakSiNOrbahuvArSikam||7||

sO'napatyO viSaNNAtmA nAradasyOpadEzataH|
varuNaM zaraNaM yAtaH putrO mE jAyatAM prabhO||8||

yadi vIrO mahArAja tEnaiva tvAM yajE iti|
tathEti varuNEnAsya putrO jAtastu rOhitaH||9||

jAtaH sutO hyanEnAGga mAM yajasvEti sO'bravIt|
yadA pazurnirdazaH syAdatha mEdhyO bhavEditi||10||

nirdazE ca sa Agatya yajasvEtyAha sO'bravIt|
dantAH pazOryajjAyErannatha mEdhyO bhavEditi||11||

dantA jAtA yajasvEti sa pratyAhAtha sO'bravIt|
yadA patantyasya dantA atha mEdhyO bhavEditi||12||

pazOrnipatitA dantA yajasvEtyAha sO'bravIt|
yadA pazOH punardantA jAyantE'tha pazuH zuciH||13||

punarjAtA yajasvEti sa pratyAhAtha sO'bravIt|
sAnnAhikO yadA rAjanrAjanyO'tha pazuH zuciH||14||

iti putrAnurAgENa snEhayantritacEtasA|
kAlaM vaJcayatA taM tamuktO dEvastamaikSata||15||

rOhitastadabhijJAya pituH karma cikIrSitam|
prANaprEpsurdhanuSpANiraraNyaM pratyapadyata||16||

pitaraM varuNagrastaM zrutvA jAtamahOdaram|
rOhitO grAmamEyAya tamindraH pratyaSEdhata||17||

bhUmEH paryaTanaM puNyaM tIrthakSEtraniSEvaNaiH|
rOhitAyAdizacchakraH sO'pyaraNyE'vasatsamAm||18||

EvaM dvitIyE tRtIyE caturthE paJcamE tathA|
abhyEtyAbhyEtya sthavirO viprO bhUtvAha vRtrahA||19||

SaSThaM saMvatsaraM tatra caritvA rOhitaH purIm|
upavrajannajIgartAdakrINAnmadhyamaM sutam||20||

zunaHzEphaM pazuM pitrE pradAya samavandata|
tataH puruSamEdhEna harizcandrO mahAyazAH||21||

muktOdarO'yajaddEvAnvaruNAdInmahatkathaH|
vizvAmitrO'bhavattasminhOtA cAdhvaryurAtmavAn||22||

jamadagnirabhUdbrahmA vasiSThO'yAsyaH sAmagaH|
tasmai tuSTO dadAvindraH zAtakaumbhamayaM ratham||23||

zunaHzEphasya mAhAtmyamupariSTAtpracakSyatE|
satyaM sAraM dhRtiM dRSTvA sabhAryasya ca bhUpatEH||24||

vizvAmitrO bhRzaM prItO dadAvavihatAM gatim|
manaH pRthivyAM tAmadbhistEjasApO'nilEna tat||25||

khE vAyuM dhArayaMstacca bhUtAdau taM mahAtmani|
tasminjJAnakalAM dhyAtvA tayAjJAnaM vinirdahan||26||

hitvA tAM svEna bhAvEna nirvANasukhasaMvidA
anirdEzyApratarkyENa tasthau vidhvastabandhanaH||27||

||iti zrImadbhAgavatE mahApurANE pAramahaMsyAM saMhitAyAM navamaskandhE saptamO'dhyAyaH||

See Also