From StotraSamhita
< Bhagavatam | Skandha 03
maitrEya uvAca
avadhArya viriJcasya nirvyalIkAmRtaM vacaH| prahasya prEmagarbhENa tadapAGgEna sO'grahIt||1|| |
tataH sapatnaM mukhatazcarantamakutObhayam| jaghAnOtpatya gadayA hanAvasuramakSajaH||2|| |
sA hatA tEna gadayA vihatA bhagavatkarAt| vighUrNitApatadrEjE tadadbhutamivAbhavat||3|| |
sa tadA labdhatIrthO'pi na babAdhE nirAyudham| mAnayansa mRdhE dharmaM viSvaksEnaM prakOpayan||4|| |
gadAyAmapaviddhAyAM hAhAkArE vinirgatE| mAnayAmAsa taddharmaM sunAbhaM cAsmaradvibhuH||5|| |
taM vyagracakraM ditiputrAdhamEna svapArSadamukhyEna viSajjamAnam| citrA vAcO'tadvidAM khEcarANAM tatra smAsansvasti tE'muM jahIti||6|| |
sa taM nizAmyAttarathAGgamagratO vyavasthitaM padmapalAzalOcanam| vilOkya cAmarSapariplutEndriyO ruSA svadantacchadamAdazacchvasan||7|| |
karAladaMSTrazcakSurbhyAM saJcakSANO dahanniva| abhiplutya svagadayA hatO'sItyAhanaddharim||8|| |
padA savyEna tAM sAdhO bhagavAnyajJasUkaraH| lIlayA miSataH zatrOH prAharadvAtaraMhasam||9|| |
Aha cAyudhamAdhatsva ghaTasva tvaM jigISasi| ityuktaH sa tadA bhUyastADayanvyanadadbhRzam||10|| |
tAM sa ApatatIM vIkSya bhagavAnsamavasthitaH| jagrAha lIlayA prAptAM garutmAniva pannagIm||11|| |
svapauruSE pratihatE hatamAnO mahAsuraH| naicchadgadAM dIyamAnAM hariNA vigataprabhaH||12|| |
jagrAha trizikhaM zUlaM jvalajjvalanalOlupam| yajJAya dhRtarUpAya viprAyAbhicaranyathA||13|| |
tadOjasA daityamahAbhaTArpitaM cakAsadantaHkha udIrNadIdhiti| cakrENa cicchEda nizAtanEminA hariryathA tArkSyapatatramujjhitam||14|| |
vRkNE svazUlE bahudhAriNA harEH pratyEtya vistIrNamurO vibhUtimat| pravRddharOSaH sa kaThOramuSTinA nadanprahRtyAntaradhIyatAsuraH||15|| |
tEnEtthamAhataH kSattarbhagavAnAdisUkaraH| nAkampata manAkkvApi srajA hata iva dvipaH||16|| |
athOrudhAsRjanmAyAM yOgamAyEzvarE harau| yAM vilOkya prajAstrastA mEnirE'syOpasaMyamam||17|| |
pravavurvAyavazcaNDAstamaH pAMsavamairayan| digbhyO nipEturgrAvANaH kSEpaNaiH prahitA iva||18|| |
dyaurnaSTabhagaNAbhraughaiH savidyutstanayitnubhiH| varSadbhiH pUyakEzAsRg viNmUtrAsthIni cAsakRt||19|| |
girayaH pratyadRzyanta nAnAyudhamucO'nagha| digvAsasO yAtudhAnyaH zUlinyO muktamUrdhajAH||20|| |
bahubhiryakSarakSObhiH pattyazvarathakuJjaraiH| AtatAyibhirutsRSTA hiMsrA vAcO'tivaizasAH||21|| |
prAduSkRtAnAM mAyAnAmAsurINAM vinAzayat| sudarzanAstraM bhagavAnprAyuGkta dayitaM tripAt||22|| |
tadA ditEH samabhavatsahasA hRdi vEpathuH| smarantyA bharturAdEzaM stanAccAsRkprasusruvE||23|| |
vinaSTAsu svamAyAsu bhUyazcAvrajya kEzavam| ruSOpagUhamAnO'muM dadRzE'vasthitaM bahiH||24|| |
taM muSTibhirvinighnantaM vajrasArairadhOkSajaH| karENa karNamUlE'hanyathA tvASTraM marutpatiH||25|| |
sa AhatO vizvajitA hyavajJayA paribhramadgAtra udastalOcanaH| vizIrNabAhvaGghrizirOruhO'patadyathA nagEndrO lulitO nabhasvatA||26|| |
kSitau zayAnaM tamakuNThavarcasaM karAladaMSTraM paridaSTadacchadam| ajAdayO vIkSya zazaMsurAgatA ahO imaM kO nu labhEta saMsthitim||27|| |
yaM yOginO yOgasamAdhinA rahO dhyAyanti liGgAdasatO mumukSayA| tasyaiSa daityaRSabhaH padAhatO mukhaM prapazyaMstanumutsasarja ha||28|| |
Etau tau pArSadAvasya zApAdyAtAvasadgatim| punaH katipayaiH sthAnaM prapatsyEtE ha janmabhiH||29|| |
dEvA UcuH
namO namastE'khilayajJatantavE sthitau gRhItAmalasattvamUrtayE| diSTyA hatO'yaM jagatAmaruntudastvatpAdabhaktyA vayamIza nirvRtAH||30|| |
maitrEya uvAca
EvaM hiraNyAkSamasahyavikramaM sa sAdayitvA harirAdisUkaraH| jagAma lOkaM svamakhaNDitOtsavaM samIDitaH puSkaraviSTarAdibhiH||31|| |
mayA yathAnUktamavAdi tE harEH kRtAvatArasya sumitra cESTitam| yathA hiraNyAkSa udAravikramO mahAmRdhE krIDanavannirAkRtaH||32|| |
sUta uvAca
iti kauSAravAkhyAtAmAzrutya bhagavatkathAm| kSattAnandaM paraM lEbhE mahAbhAgavatO dvija||33|| |
anyESAM puNyazlOkAnAmuddAmayazasAM satAm| upazrutya bhavEnmOdaH zrIvatsAGkasya kiM punaH||34|| |
yO gajEndraM jhaSagrastaM dhyAyantaM caraNAmbujam| krOzantInAM karENUnAM kRcchratO'mOcayaddrutam||35|| |
taM sukhArAdhyamRjubhirananyazaraNairnRbhiH| kRtajJaH kO na sEvEta durArAdhyamasAdhubhiH||36|| |
yO vai hiraNyAkSavadhaM mahAdbhutaM vikrIDitaM kAraNasUkarAtmanaH| zRNOti gAyatyanumOdatE'JjasA vimucyatE brahmavadhAdapi dvijAH||37|| |
EtanmahApuNyamalaM pavitraM dhanyaM yazasyaM padamAyurAziSAm prANEndriyANAM yudhi zauryavardhanaM nArAyaNO'ntE gatiraGga zRNvatAm||38|| |
||iti zrImadbhAgavatE mahApurANE pAramahaMsyAM saMhitAyAM tRtIyaskandhE EkOnaviMzO'dhyAyaH||
