From StotraSamhita
< Bhagavatam | Skandha 12
dazamO'dhyAyaH
sUta uvAca
sa EvamanubhUyEdaM nArAyaNavinirmitam| vaibhavaM yOgamAyAyAstamEva zaraNaM yayau||1|| |
zrImArkaNDEya uvAca
prapannO'smyaGghrimUlaM tE prapannAbhayadaM harE| yanmAyayApi vibudhA muhyanti jJAnakAzayA||2|| |
sUta uvAca
tamEvaM nibhRtAtmAnaM vRSENa divi paryaTan| rudrANyA bhagavAnrudrO dadarza svagaNairvRtaH||3|| |
athOmA tamRSiM vIkSya girizaM samabhASata| pazyEmaM bhagavanvipraM nibhRtAtmEndriyAzayam||4|| |
nibhRtOdajhaSavrAtO vAtApAyE yathArNavaH| kurvasya tapasaH sAkSAtsaMsiddhiM siddhidO bhavAn||5|| |
zrIbhagavAnuvAca
naivEcchatyAziSaH kvApi brahmarSirmOkSamapyuta| bhaktiM parAM bhagavati labdhavAnpuruSE'vyayE||6|| |
athApi saMvadiSyAmO bhavAnyEtEna sAdhunA| ayaM hi paramO lAbhO nRNAM sAdhusamAgamaH||7|| |
sUta uvAca
ityuktvA tamupEyAya bhagavAnsa satAM gatiH| IzAnaH sarvavidyAnAmIzvaraH sarvadEhinAm||8|| |
tayOrAgamanaM sAkSAdIzayOrjagadAtmanOH| na vEda ruddhadhIvRttirAtmAnaM vizvamEva ca||9|| |
bhagavAMstadabhijJAya girizO yOgamAyayA| AvizattadguhAkAzaM vAyuzchidramivEzvaraH||10|| |
Atmanyapi zivaM prAptaM taDitpiGgajaTAdharam| tryakSaM dazabhujaM prAMzumudyantamiva bhAskaram||11|| |
vyAghracarmAmbaraM zUla dhanuriSvasicarmabhiH| akSamAlADamaruka kapAlaM parazuM saha||12|| |
bibhrANaM sahasA bhAtaM vicakSya hRdi vismitaH| kimidaM kuta EvEti samAdhErviratO muniH||13|| |
nEtrE unmIlya dadRzE sagaNaM sOmayAgatam| rudraM trilOkaikaguruM nanAma zirasA muniH||14|| |
tasmai saparyAM vyadadhAtsagaNAya sahOmayA| svAgatAsanapAdyArghya gandhasragdhUpadIpakaiH||15|| |
Aha tvAtmAnubhAvEna pUrNakAmasya tE vibhO| karavAma kimIzAna yEnEdaM nirvRtaM jagat||16|| |
namaH zivAya zAntAya sattvAya pramRDAya ca| rajOjuSE'tha ghOrAya namastubhyaM tamOjuSE||17|| |
sUta uvAca
EvaM stutaH sa bhagavAnAdidEvaH satAM gatiH| parituSTaH prasannAtmA prahasaMstamabhASata||18|| |
zrIbhagavAnuvAca
varaM vRNISva naH kAmaM varadEzA vayaM trayaH| amOghaM darzanaM yESAM martyO yadvindatE'mRtam||19|| |
brAhmaNAH sAdhavaH zAntA niHsaGgA bhUtavatsalAH| EkAntabhaktA asmAsu nirvairAH samadarzinaH||20|| |
salOkA lOkapAlAstAnvandantyarcantyupAsatE| ahaM ca bhagavAnbrahmA svayaM ca harirIzvaraH||21|| |
na tE mayyacyutE'jE ca bhidAmaNvapi cakSatE| nAtmanazca janasyApi tadyuSmAnvayamImahi||22|| |
na hyammayAni tIrthAni na dEvAzcEtanOjjhitAH| tE punantyurukAlEna yUyaM darzanamAtrataH||23|| |
brAhmaNEbhyO namasyAmO yE'smadrUpaM trayImayam| bibhratyAtmasamAdhAna tapaHsvAdhyAyasaMyamaiH||24|| |
zravaNAddarzanAdvApi mahApAtakinO'pi vaH| zudhyErannantyajAzcApi kimu sambhASaNAdibhiH||25|| |
sUta uvAca
iti candralalAmasya dharmagahyOpabRMhitam| vacO'mRtAyanamRSirnAtRpyatkarNayOH piban||26|| |
sa ciraM mAyayA viSNOrbhrAmitaH karzitO bhRzam| zivavAgamRtadhvasta klEzapuJjastamabravIt||27|| |
zrImArkaNDEya uvAca
ahO IzvaralIlEyaM durvibhAvyA zarIriNAm| yannamantIzitavyAni stuvanti jagadIzvarAH||28|| |
dharmaM grAhayituM prAyaH pravaktArazca dEhinAm| AcarantyanumOdantE kriyamANaM stuvanti ca||29|| |
naitAvatA bhagavataH svamAyAmayavRttibhiH| na duSyEtAnubhAvastairmAyinaH kuhakaM yathA||30|| |
sRSTvEdaM manasA vizvamAtmanAnupravizya yaH| guNaiH kurvadbhirAbhAti kartEva svapnadRgyathA||31|| |
tasmai namO bhagavatE triguNAya guNAtmanE| kEvalAyAdvitIyAya guravE brahmamUrtayE||32|| |
kaM vRNE nu paraM bhUmanvaraM tvadvaradarzanAt| yaddarzanAtpUrNakAmaH satyakAmaH pumAnbhavEt||33|| |
varamEkaM vRNE'thApi pUrNAtkAmAbhivarSaNAt| bhagavatyacyutAM bhaktiM tatparESu tathA tvayi||34|| |
sUta uvAca
ityarcitO'bhiSTutazca muninA sUktayA girA| tamAha bhagavAJcharvaH zarvayA cAbhinanditaH||35|| |
kAmO maharSE sarvO'yaM bhaktimAMstvamadhOkSajE| AkalpAntAdyazaH puNyamajarAmaratA tathA||36|| |
jJAnaM traikAlikaM brahmanvijJAnaM ca viraktimat| brahmavarcasvinO bhUyAtpurANAcAryatAstu tE||37|| |
sUta uvAca
EvaM varAnsa munayE dattvAgAttryakSa IzvaraH| dEvyai tatkarma kathayannanubhUtaM purAmunA||38|| |
sO'pyavAptamahAyOga mahimA bhArgavOttamaH| vicaratyadhunApyaddhA harAvEkAntatAM gataH||39|| |
anuvarNitamEtattE mArkaNDEyasya dhImataH| anubhUtaM bhagavatO mAyAvaibhavamadbhutam||40|| |
EtatkEcidavidvAMsO mAyAsaMsRtirAtmanaH| anAdyAvartitaM nRRNAM kAdAcitkaM pracakSatE||41|| |
ya EvamEtadbhRguvarya varNitaM rathAGgapANEranubhAvabhAvitam saMzrAvayEtsaMzRNuyAdu tAvubhau tayOrna karmAzayasaMsRtirbhavEt||42|| |
||iti zrImadbhAgavatE mahApurANE pAramahaMsyAM saMhitAyAM dwAdazaskandhE dazamO'dhyAyaH||
