From StotraSamhita

dwicatvAriMzO'dhyAyaH

zrIzuka uvAca

atha vrajanrAjapathEna mAdhavaH striyaM gRhItAGgavilEpabhAjanAm| vilOkya kubjAM yuvatIM varAnanAM papraccha yAntIM prahasanrasapradaH||1||

kA tvaM varOrvEtadu hAnulEpanaM kasyAGganE vA kathayasva sAdhu naH| dEhyAvayOraGgavilEpamuttamaM zrEyastatastE na cirAdbhaviSyati||2||

sairandhryuvAca

dAsyasmyahaM sundara kaMsasammatA trivakranAmA hyanulEpakarmaNi| madbhAvitaM bhOjapatEratipriyaM vinA yuvAM kO'nyatamastadarhati||3||

rUpapEzalamAdhurya hasitAlApavIkSitaiH| dharSitAtmA dadau sAndramubhayOranulEpanam||4||

tatastAvaGgarAgENa svavarNEtarazObhinA| samprAptaparabhAgEna zuzubhAtE'nuraJjitau||5||

prasannO bhagavAnkubjAM trivakrAM rucirAnanAm| RjvIM kartuM manazcakrE darzayandarzanE phalam||6||

padbhyAmAkramya prapadE dryaGgulyuttAnapANinA| pragRhya cibukE'dhyAtmamudanInamadacyutaH||7||

sA tadarjusamAnAGgI bRhacchrONipayOdharA| mukundasparzanAtsadyO babhUva pramadOttamA||8||

tatO rUpaguNaudArya sampannA prAha kEzavam| uttarIyAntamakRSya smayantI jAtahRcchayA||9||

Ehi vIra gRhaM yAmO na tvAM tyaktumihOtsahE| tvayOnmathitacittAyAH prasIda puruSarSabha||10||

EvaM striyA yAcyamAnaH kRSNO rAmasya pazyataH| mukhaM vIkSyAnu gOpAnAM prahasaMstAmuvAca ha||11||

ESyAmi tE gRhaM subhru puMsAmAdhivikarzanam| sAdhitArthO'gRhANAM naH pAnthAnAM tvaM parAyaNam||12||

visRjya mAdhvyA vANyA tAmvrajanmArgE vaNikpathaiH| nAnOpAyanatAmbUla sraggandhaiH sAgrajO'rcitaH||13||

taddarzanasmarakSObhAdAtmAnaM nAvidanstriyaH| visrastavAsaHkavara valayA lEkhyamUrtayaH||14||

tataH paurAnpRcchamAnO dhanuSaH sthAnamacyutaH| tasminpraviSTO dadRzE dhanuraindramivAdbhutam||15||

puruSairbahubhirguptamarcitaM paramarddhimat| vAryamANO nRbhiH kRSNaH prasahya dhanurAdadE||16||

karENa vAmEna salIlamuddhRtaM sajyaM ca kRtvA nimiSENa pazyatAm| nRNAM vikRSya prababhaJja madhyatO yathEkSudaNDaM madakaryurukramaH||17||

dhanuSO bhajyamAnasya zabdaH khaM rOdasI dizaH| pUrayAmAsa yaM zrutvA kaMsastrAsamupAgamat||18||

tadrakSiNaH sAnucaraM kupitA AtatAyinaH| gRhItukAmA AvavrurgRhyatAM vadhyatAmiti||19||

atha tAndurabhiprAyAnvilOkya balakEzavau| kruddhau dhanvana AdAya zakalE tAMzca jaghnatuH||20||

balaM ca kaMsaprahitaM hatvA zAlAmukhAttataH| niSkramya cEraturhRSTau nirIkSya purasampadaH||21||

tayOstadadbhutaM vIryaM nizAmya puravAsinaH| tEjaH prAgalbhyaM rUpaM ca mEnirE vibudhOttamau||22||

tayOrvicaratOH svairamAdityO'stamupEyivAn| kRSNarAmau vRtau gOpaiH purAcchakaTamIyatuH||23||

gOpyO mukundavigamE virahAturA yA AzAsatAziSa RtA madhupuryabhUvan| sampazyatAM puruSabhUSaNagAtralakSmIM hitvEtarAnnu bhajatazcakamE'yanaM zrIH||24||

avaniktAGghriyugalau bhuktvA kSIrOpasEcanam| USatustAM sukhaM rAtriM jJAtvA kaMsacikIrSitam||25||

kaMsastu dhanuSO bhaGgaM rakSiNAM svabalasya ca| vadhaM nizamya gOvinda rAmavikrIDitaM param||26||

dIrghaprajAgarO bhItO durnimittAni durmatiH| bahUnyacaSTObhayathA mRtyOrdautyakarANi ca||27||

adarzanaM svazirasaH pratirUpE ca satyapi| asatyapi dvitIyE ca dvairUpyaM jyOtiSAM tathA||28||

chidrapratItizchAyAyAM prANaghOSAnupazrutiH| svarNapratItirvRkSESu svapadAnAmadarzanam||29||

svapnE prEtapariSvaGgaH kharayAnaM viSAdanam| yAyAnnaladamAlyEkastailAbhyaktO digambaraH||30||

anyAni cEtthaMbhUtAni svapnajAgaritAni ca| pazyanmaraNasantrastO nidrAM lEbhE na cintayA||31||

vyuSTAyAM nizi kauravya sUryE cAdbhyaH samutthitE| kArayAmAsa vai kaMsO mallakrIDAmahOtsavam||32||

AnarcuH puruSA raGgaM tUryabhEryazca jaghnirE| maJcAzcAlaGkRtAH sragbhiH patAkAcailatOraNaiH||33||

tESu paurA jAnapadA brahmakSatrapurOgamAH| yathOpajOSaM vivizU rAjAnazca kRtAsanAH||34||

kaMsaH parivRtO'mAtyai rAjamaJca upAvizat| maNDalEzvaramadhyasthO hRdayEna vidUyatA||35||

vAdyamAnEsu tUryESu mallatAlOttarESu ca| mallAH svalaGkRtAH dRptAH sOpAdhyAyAH samAsata||36||

cANUrO muSTikaH kUtaH zalastOzala Eva ca| ta AsEdurupasthAnaM valguvAdyapraharSitAH||37||

nandagOpAdayO gOpA bhOjarAjasamAhutAH nivEditOpAyanAsta EkasminmaJca Avizan||38||

||iti zrImadbhAgavatE mahApurANE pAramahaMsyAM saMhitAyAM dazamaskandhE pUrvArdhE dwicatvAriMzO'dhyAyaH||

See Also

• http://vedabase.net/sb/10/42/en