From StotraSamhita
< Bhagavatam | Skandha 08
EkaviMzO'dhyAyaH
zrIzuka uvAca
satyaM samIkSyAbjabhavO nakhEndubhirhatasvadhAmadyutirAvRtO'bhyagAt| marIcimizrA RSayO bRhadvratAH sanandanAdyA naradEva yOginaH||1|| |
vEdOpavEdA niyamA yamAnvitAstarkEtihAsAGgapurANasaMhitAH yE cAparE yOgasamIradIpita jJAnAgninA randhitakarmakalmaSAH vavandirE yatsmaraNAnubhAvataH svAyambhuvaM dhAma gatA akarmakam||2|| |
athAGghrayE prOnnamitAya viSNOrupAharatpadmabhavO'rhaNOdakam| samarcya bhaktyAbhyagRNAcchucizravA yannAbhipaGkEruhasambhavaH svayam||3|| |
dhAtuH kamaNDalujalaM tadurukramasya pAdAvanEjanapavitratayA narEndra| svardhunyabhUnnabhasi sA patatI nimArSTi lOkatrayaM bhagavatO vizadEva kIrtiH||4|| |
brahmAdayO lOkanAthAH svanAthAya samAdRtAH| sAnugA balimAjahruH saGkSiptAtmavibhUtayE||5|| |
tOyaiH samarhaNaiH sragbhirdivyagandhAnulEpanaiH| dhUpairdIpaiH surabhibhirlAjAkSataphalAGkuraiH||6|| |
stavanairjayazabdaizca tadvIryamahimAGkitaiH| nRtyavAditragItaizca zaGkhadundubhiniHsvanaiH||7|| |
jAmbavAnRkSarAjastu bhErIzabdairmanOjavaH| vijayaM dikSu sarvAsu mahOtsavamaghOSayat||8|| |
mahIM sarvAM hRtAM dRSTvA tripadavyAjayAcJayA| UcuH svabharturasurA dIkSitasyAtyamarSitAH||9|| |
na vAyaM brahmabandhurviSNurmAyAvinAM varaH| dvijarUpapraticchannO dEvakAryaM cikIrSati||10|| |
anEna yAcamAnEna zatruNA vaTurUpiNA| sarvasvaM nO hRtaM bharturnyastadaNDasya barhiSi||11|| |
satyavratasya satataM dIkSitasya vizESataH| nAnRtaM bhASituM zakyaM brahmaNyasya dayAvataH||12|| |
tasmAdasya vadhO dharmO bhartuH zuzrUSaNaM ca naH| ityAyudhAni jagRhurbalEranucarAsurAH||13|| |
tE sarvE vAmanaM hantuM zUlapaTTizapANayaH| anicchantO balE rAjanprAdravanjAtamanyavaH||14|| |
tAnabhidravatO dRSTvA ditijAnIkapAnnRpa| prahasyAnucarA viSNOH pratyaSEdhannudAyudhAH||15|| |
nandaH sunandO'tha jayO vijayaH prabalO balaH| kumudaH kumudAkSazca viSvaksEnaH patattrirAT||16|| |
jayantaH zrutadEvazca puSpadantO'tha sAtvataH| sarvE nAgAyutaprANAzcamUM tE jaghnurAsurIm||17|| |
hanyamAnAnsvakAndRSTvA puruSAnucarairbaliH| vArayAmAsa saMrabdhAnkAvyazApamanusmaran||18|| |
hE vipracittE hE rAhO hE nEmE zrUyatAM vacaH| mA yudhyata nivartadhvaM na naH kAlO'yamarthakRt||19|| |
yaH prabhuH sarvabhUtAnAM sukhaduHkhOpapattayE| taM nAtivartituM daityAH pauruSairIzvaraH pumAn||20|| |
yO nO bhavAya prAgAsIdabhavAya divaukasAm| sa Eva bhagavAnadya vartatE tadviparyayam||21|| |
balEna sacivairbuddhyA durgairmantrauSadhAdibhiH| sAmAdibhirupAyaizca kAlaM nAtyEti vai janaH||22|| |
bhavadbhirnirjitA hyEtE bahuzO'nucarA harEH| daivEnarddhaista EvAdya yudhi jitvA nadanti naH||23|| |
EtAnvayaM vijESyAmO yadi daivaM prasIdati| tasmAtkAlaM pratIkSadhvaM yO nO'rthatvAya kalpatE||24|| |
zrIzuka uvAca
patyurnigaditaM zrutvA daityadAnavayUthapAH| rasAM nirvivizU rAjanviSNupArSada tADitAH||25|| |
atha tArkSyasutO jJAtvA virATprabhucikIrSitam| babandha vAruNaiH pAzairbaliM sUtyE'hani kratau||26|| |
hAhAkArO mahAnAsIdrOdasyOH sarvatO dizam| nigRhyamANE'surapatau viSNunA prabhaviSNunA||27|| |
taM baddhaM vAruNaiH pAzairbhagavAnAha vAmanaH| naSTazriyaM sthiraprajJamudArayazasaM nRpa||28|| |
padAni trINi dattAni bhUmErmahyaM tvayAsura| dvAbhyAM krAntA mahI sarvA tRtIyamupakalpaya||29|| |
yAvattapatyasau gObhiryAvadinduH sahODubhiH| yAvadvarSati parjanyastAvatI bhUriyaM tava||30|| |
padaikEna mayAkrAntO bhUrlOkaH khaM dizastanOH| svarlOkastE dvitIyEna pazyatastE svamAtmanA||31|| |
pratizrutamadAtustE nirayE vAsa iSyatE| viza tvaM nirayaM tasmAdguruNA cAnumOditaH||32|| |
vRthA manOrathastasya dUraH svargaH patatyadhaH| pratizrutasyAdAnEna yO'rthinaM vipralambhatE||33|| |
vipralabdhO dadAmIti tvayAhaM cADhyamAninA tadvyalIkaphalaM bhuGkSva nirayaM katicitsamAH||34|| |
||iti zrImadbhAgavatE mahApurANE pAramahaMsyAM saMhitAyAM aSTamaskandhE EkaviMzO'dhyAyaH||
