From StotraSamhita

viMzO'dhyAyaH

zaunaka uvAca

mahIM pratiSThAmadhyasya sautE svAyambhuvO manuH| kAnyanvatiSThaddvArANi mArgAyAvarajanmanAm||1||

kSattA mahAbhAgavataH kRSNasyaikAntikaH suhRt| yastatyAjAgrajaM kRSNE sApatyamaghavAniti||2||

dvaipAyanAdanavarO mahitvE tasya dEhajaH| sarvAtmanA zritaH kRSNaM tatparAMzcApyanuvrataH||3||

kimanvapRcchanmaitrEyaM virajAstIrthasEvayA| upagamya kuzAvarta AsInaM tattvavittamam||4||

tayOH saMvadatOH sUta pravRttA hyamalAH kathAH| ApO gAGgA ivAghaghnIrharEH pAdAmbujAzrayAH||5||

tA naH kIrtaya bhadraM tE kIrtanyOdArakarmaNaH| rasajJaH kO nu tRpyEta harilIlAmRtaM piban||6||

EvamugrazravAH pRSTa RSibhirnaimiSAyanaiH| bhagavatyarpitAdhyAtmastAnAha zrUyatAmiti||7||

sUta uvAca

harErdhRtakrODatanOH svamAyayA nizamya gOruddharaNaM rasAtalAt| lIlAM hiraNyAkSamavajJayA hataM saJjAtaharSO munimAha bhArataH||8||

vidura uvAca

prajApatipatiH sRSTvA prajAsargE prajApatIn| kimArabhata mE brahmanprabrUhyavyaktamArgavit||9||

yE marIcyAdayO viprA yastu svAyambhuvO manuH| tE vai brahmaNa AdEzAtkathamEtadabhAvayan||10||

sadvitIyAH kimasRjansvatantrA uta karmasu| AhO svitsaMhatAH sarva idaM sma samakalpayan||11||

maitrEya uvAca

daivEna durvitarkyENa parENAnimiSENa ca| jAtakSObhAdbhagavatO mahAnAsIdguNatrayAt||12||

rajaHpradhAnAnmahatastriliGgO daivacOditAt| jAtaH sasarja bhUtAdirviyadAdIni paJcazaH||13||

tAni caikaikazaH sraSTumasamarthAni bhautikam| saMhatya daivayOgEna haimamaNDamavAsRjan||14||

sO'zayiSTAbdhisalilE ANDakOzO nirAtmakaH| sAgraM vai varSasAhasramanvavAtsIttamIzvaraH||15||

tasya nAbhErabhUtpadmaM sahasrArkOrudIdhiti| sarvajIvanikAyaukO yatra svayamabhUtsvarAT||16||

sO'nuviSTO bhagavatA yaH zEtE salilAzayE| lOkasaMsthAM yathA pUrvaM nirmamE saMsthayA svayA||17||

sasarja cchAyayAvidyAM paJcaparvANamagrataH| tAmisramandhatAmisraM tamO mOhO mahAtamaH||18||

visasarjAtmanaH kAyaM nAbhinandaMstamOmayam| jagRhuryakSarakSAMsi rAtriM kSuttRTsamudbhavAm||19||

kSuttRDbhyAmupasRSTAstE taM jagdhumabhidudruvuH| mA rakSatainaM jakSadhvamityUcuH kSuttRDarditAH||20||

dEvastAnAha saMvignO mA mAM jakSata rakSata| ahO mE yakSarakSAMsi prajA yUyaM babhUvitha||21||

dEvatAH prabhayA yA yA dIvyanpramukhatO'sRjat| tE ahArSurdEvayantO visRSTAM tAM prabhAmahaH||22||

dEvO'dEvAJjaghanataH sRjati smAtilOlupAn| ta EnaM lOlupatayA maithunAyAbhipEdirE||23||

tatO hasansa bhagavAnasurairnirapatrapaiH| anvIyamAnastarasA kruddhO bhItaH parApatat||24||

sa upavrajya varadaM prapannArtiharaM harim| anugrahAya bhaktAnAmanurUpAtmadarzanam||25||

pAhi mAM paramAtmaMstE prESaNEnAsRjaM prajAH| tA imA yabhituM pApA upAkrAmanti mAM prabhO||26||

tvamEkaH kila lOkAnAM kliSTAnAM klEzanAzanaH| tvamEkaH klEzadastESAmanAsannapadAM tava||27||

sO'vadhAryAsya kArpaNyaM viviktAdhyAtmadarzanaH| vimuJcAtmatanuM ghOrAmityuktO vimumOca ha||28||

tAM kvaNaccaraNAmbhOjAM madavihvalalOcanAm| kAJcIkalApavilasad dukUlacchannarOdhasam||29||

anyOnyazlESayOttuGga nirantarapayOdharAm| sunAsAM sudvijAM snigdha hAsalIlAvalOkanAm||30||

gUhantIM vrIDayAtmAnaM nIlAlakavarUthinIm| upalabhyAsurA dharma sarvE sammumuhuH striyam||31||

ahO rUpamahO dhairyamahO asyA navaM vayaH| madhyE kAmayamAnAnAmakAmEva visarpati||32||

vitarkayantO bahudhA tAM sandhyAM pramadAkRtim| abhisambhAvya vizrambhAtparyapRcchankumEdhasaH||33||

kAsi kasyAsi rambhOru kO vArthastE'tra bhAmini| rUpadraviNapaNyEna durbhagAnnO vibAdhasE||34||

yA vA kAcittvamabalE diSTyA sandarzanaM tava| utsunOSIkSamANAnAM kandukakrIDayA manaH||35||

naikatra tE jayati zAlini pAdapadmaM ghnantyA muhuH karatalEna patatpataGgam| madhyaM viSIdati bRhatstanabhArabhItaM zAntEva dRSTiramalA suzikhAsamUhaH||36||

iti sAyantanIM sandhyAmasurAH pramadAyatIm| pralObhayantIM jagRhurmatvA mUDhadhiyaH striyam||37||

prahasya bhAvagambhIraM jighrantyAtmAnamAtmanA| kAntyA sasarja bhagavAngandharvApsarasAM gaNAn||38||

visasarja tanuM tAM vai jyOtsnAM kAntimatIM priyAm| ta Eva cAdaduH prItyA vizvAvasupurOgamAH||39||

sRSTvA bhUtapizAcAMzca bhagavAnAtmatandriNA| digvAsasO muktakEzAnvIkSya cAmIlayaddRzau||40||

jagRhustadvisRSTAM tAM jRmbhaNAkhyAM tanuM prabhOH nidrAmindriyaviklEdO yayA bhUtESu dRzyatE yEnOcchiSTAndharSayanti tamunmAdaM pracakSatE||41||

UrjasvantaM manyamAna AtmAnaM bhagavAnajaH| sAdhyAngaNAnpitRgaNAnparOkSENAsRjatprabhuH||42||

ta AtmasargaM taM kAyaM pitaraH pratipEdirE| sAdhyEbhyazca pitRbhyazca kavayO yadvitanvatE||43||

siddhAnvidyAdharAMzcaiva tirOdhAnEna sO'sRjat| tEbhyO'dadAttamAtmAnamantardhAnAkhyamadbhutam||44||

sa kinnarAnkimpuruSAnpratyAtmyEnAsRjatprabhuH| mAnayannAtmanAtmAnamAtmAbhAsaM vilOkayan||45||

tE tu tajjagRhU rUpaM tyaktaM yatparamESThinA| mithunIbhUya gAyantastamEvOSasi karmabhiH||46||

dEhEna vai bhOgavatA zayAnO bahucintayA| sargE'nupacitE krOdhAdutsasarja ha tadvapuH||47||

yE'hIyantAmutaH kEzA ahayastE'Gga jajJirE| sarpAH prasarpataH krUrA nAgA bhOgOrukandharAH||48||

sa AtmAnaM manyamAnaH kRtakRtyamivAtmabhUH| tadA manUnsasarjAntE manasA lOkabhAvanAn||49||

tEbhyaH sO'sRjatsvIyaM puraM puruSamAtmavAn| tAndRSTvA yE purA sRSTAH prazazaMsuH prajApatim||50||

ahO EtajjagatsraSTaH sukRtaM bata tE kRtam| pratiSThitAH kriyA yasminsAkamannamadAma hE||51||

tapasA vidyayA yuktO yOgEna susamAdhinA| RSInRSirhRSIkEzaH sasarjAbhimatAH prajAH||52||

tEbhyazcaikaikazaH svasya dEhasyAMzamadAdajaH yattatsamAdhiyOgarddhi tapOvidyAviraktimat||53||

||iti zrImadbhAgavatE mahApurANE pAramahaMsyAM saMhitAyAM tRtIyaskandhE viMzO'dhyAyaH||

See Also

• http://vedabase.net/sb/3/20/en